Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn Yin Pinplọn to Wehọmẹ

Owe Ṣie He Bẹ Otàn Biblu Tọn lẹ Hẹn Yin Pinplọn to Wehọmẹ

Owe Ṣie He Bẹ Otàn Biblu Tọn lẹ Hẹn, he yin didetọn to ogbè Pangasinan tọn mẹ to 2012, to alọgọna wehọmẹvi dokọ̀ tọn lẹ he nọ do ogbè enẹ to Philippines. Owe enẹ wá do gànmẹ taun, titengbe na anademẹ he yin nina gbọn wekantẹn Philippines tọn he nọ penukundo wepinplọn go dali, nado nọ plọnnu ovi lẹ to wehọmẹ dokọ̀ tọn to ogbè yetọn titi mẹ.

Ogbè 100 linlán wẹ nọ yin dido to Philippines, podọ mẹde ma yọ́n ogbè he na nọ yin yiyizan to wehọmẹ taun. To 2012, wekantẹn he nọ penukundo wepinplọn go de gbèta de tọ́n dọ eyin yè nọ yí ogbè he nọ yin yiyizan to whégbè zan to wehọmẹ, wehọmẹvi lẹ na plọnnu ganji bosọ nọ yawu yọnnuin. Taidi kọdetọn de, tito wepinplọn tọn de yin zizedai ehe sinai do ogbè mẹtọn titi pinplọn ji.

Pangasinan yin dopo to ogbè he yin dide nado yin yiyizan lẹ mẹ. Ṣigba nuhahun de tin. Sọgbe hẹ nuhe ogán wehọmẹ de tọn dọ, owe he mẹ yè sọgan hiawe te lẹ ma sù to ogbè Pangasinan tọn mẹ. Enẹwutu, ojlẹ dagbe mẹ wẹ Kunnudetọ Jehovah tọn lẹ de Owe Ṣie He Bẹ Otàn Biblu Tọn lẹ Hẹn tọ́n te to ogbè Pangasinan mẹ to plidopọ daho yetọn he yé basi to novembre 2012 lẹ whenu.

Vọkan owe lọ tọn 10 000 wẹ yin zinzinjẹgbonu nado yin mimá to plidopọ lọ lẹ whenu. Homẹ ovivu lẹ po mẹjitọ yetọn lẹ tọn po tọn hùn taun nado mọ owe de yí do ogbè yetọn titi mẹ. Asu po asi po de dọmọ: “Ovi mítọn lẹ yiwanna ẹn, na yé sọgan mọnukunnujẹemẹ ganji.”

Tlolo to plidopọ lọ godo, Kunnudetọ delẹ hẹn Owe Ṣie He Bẹ Otàn Biblu Tọn lẹ Hẹn yetọn lẹ yì wehọmẹ de to tòdaho Dagupan tọn mẹ. Homẹ mẹplọntọ lọ lẹ tọn hùn taun nado mọ owe lọ, na yé ko to nulẹnpọn nado mọ owe de to ogbè Pangasinan mẹ. Owe lọ 340 linlán wẹ yin mimá. Mẹplọntọ lẹ jẹ owe lọ yizan ji to afọdopolọji nado plọn ovi lẹ wehihia to ogbè yetọn titi mẹ.

E vivi na Kunnudetọ Jehovah tọn lẹ dọ owe enẹ to alọgọ nado plọnwe ovi lẹ. Dopo to mẹhe basi lẹdogbedevomẹ Owe Ṣie He Bẹ Otàn Biblu Tọn lẹ Hẹn tọn lẹ mẹ dọmọ: “E ko dẹn din bọ mí yọnẹn dọ nujọnu wẹ e yin nado nọ wleawuna owe lẹ do ogbè mẹdetiti tọn mẹ, nado sọgan jẹ ahun gbẹtọ lẹ tọn mẹ. Enẹ wẹ zọ́n bọ Kunnudetọ Jehovah tọn lẹ do nọ dovivẹnu nado basi lẹdogbedevomẹ Biblu po owe sinai do Biblu ji lẹ po tọn to ogbè kanweko susu mẹ.”