Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

JW.ORG—Nọ Diọ Gbẹzan Mẹtọn Do Dagbe Ji

JW.ORG—Nọ Diọ Gbẹzan Mẹtọn Do Dagbe Ji

Gbẹtọ lẹ to filẹpo wẹ to ale jw.org tọn dù. Hogbe pinpẹn-nutọn-yinyọnẹn tọn he mẹsusu kàn hlan tatọ́-tẹnnọ aihọn tọn he yin Kunnudetọ Jehovah tọn lẹ tọn to mai 2014 mẹ lẹ yin sislẹ to odò.

Alọgigọna Ovi Lẹ

“Ovi ṣie nọ saba hẹn wekantin họntọn etọn lẹ tọn, aihundanu pẹvipẹvi lẹ, podọ etlẹ yin gànnukun he yè do nọ glọn owhè sọn wehọmẹ wá whégbè. Mí ko nọ tẹnpọn whlasusu nado gọalọna ẹn nido mọnukunnujẹemẹ dọ nuhe wà e te zẹẹmẹdo ajo podọ ajo ma yọ́n. Vivẹnudido mítọn ma tindo kọdetọn dagbe kakajẹ whenue mí yí video lọ C’est mal de voler (Ajo Ma Yọ́n) sọn jw.org ji. Video lọ yin azọ́nwanu huhlọnnọ de podọ amasinkún he sọgbe de na visunnu mítọn. Whenue e pọ́n video lọ godo, e dọ dọ emi na gọ̀ onú lọ lẹ jo, na e ko kudeji todin dọ ajo ma yọ́n to nukun Jiwheyẹwhe tọn mẹ wutu. Lehe nọtẹn ehe gọalọna mí do sọ!”—D. N., Aflika.

“Video lọ C’est mal de voler (Ajo Ma Yọ́n) he tin to jw.org ji . . . yin azọ́nwanu huhlọnnọ de podọ amasinkún he sọgbe de na visunnu mítọn”

“Ovi ṣie lẹ yiwanna nọtẹn lọ. Yé nọ yí video ṣiṣavi tọn kleun kleun he na gọalọna yé nado yí nunọwhinnusẹ́n Biblu tọn he gando lalodido po ajo po go lẹ do yizan mẹ. Yé sọ nọ plọn jẹhẹnu dagbedagbe devo lẹ he yé sọgan yizan to gbẹzan yetọn lẹ mẹ, gbọnmọ dali yé sọgan yọ́n-na-yizan to aihọn lọ mẹ.”—O. W., Whèyihọ Inde tọn.

Alọgigọna Mẹhe to Wehọmẹ Yì Lẹ

“N’nọ pọ́n wehọmẹ yìyì taidi nuhe vẹawu, podọ n’jẹ linlẹn ji dọ na do wehọmẹ te. Amọ́ to gbèdopo, N’hia hosọ lọ Et si j’arrêtais l’école? (Be N’Dona Doalọtena Wehọmẹ Yìyì Wẹ Ya?) to nọtẹn jw.org ji. Hosọ lọ gọalọna mi nado pọ́n wehọmẹ yìyì hlan to aliho dagbe mẹ. N’sọ mọdọ wehọmẹ yìyì na plọn mi nuhe na pehẹ to sọgodo bo nasọ gọalọna mi nado lẹzun mẹhe go yè sọgan dejido.”—N. F., Aflika.

“Ayinamẹ he tin to nọtẹn ehe ji na jọja lẹ ko plọn mi lehe n’sọgan hẹn walọ dagbe go to wehọmẹ do”

“Ayinamẹ he tin to nọtẹn ehe ji na jọja lẹ ko plọn mi lehe n’sọgan hẹn walọ dagbe go to wehọmẹ do. N’ko sọ plọn lehe n’na penukundo nupinplọn ṣie go bo dapana ayihafẹsẹnamẹnu lẹ do.”—G., Aflika.

“Azọ́nwatọgbẹ́ de wule dọ wehọmẹvi lẹ nọ vannukundo viyọnnu emitọn to wehọmẹ, titengbe viyọnnu de. Ehe yinuwado ovi lọ ji to aliho agọ̀ mẹ sọmọ bọ e ma yì wehọmẹ na azán kleun de na e to budi wutu. N’dọhona azọ́nwatọgbẹ́ ṣie lọ do nuagokun delẹ ji sọn video lọ, Mets un harceleur k.-o. sans utiliser les poings (Hihò Nukunvandomẹtọ de Matin Akotokún-Yìnyìn) he tin to jw.org ji mẹ. Azọ́nwatọgbẹ́ lọ yiwanna ayinamẹ lọ he dọ nado yí fànfún do duto ninọmẹ lọ ji. E dọho hẹ viyọnnu etọn do lehe e na nọ duto nukunvandomẹtọ de ji do ji. Taidi kọdetọn de, viyọnnu lọ wleawuna jidide dogọ bo yì wehọmẹ. To nukọn mẹ, ninọmẹ lọ diọ bọ nukunvandomẹtọ lọ tlẹ lẹzun họntọn viyọnnu lọ tọn.”—V. K., Whèzẹtẹn-Waji Europe tọn.

Alọgigọna Jọja He Ko Whẹ́n Lẹ

“Mì wanu na hosọ lọ, Pourquoi est-ce que je me coupe? (Naegbọn Nado Húnú Dee?) he tin to nọtẹn lọ ji. Nuhahun he n’ko diahi hẹ na ojlẹ dindẹn de wẹ. N’lẹndọ yẹn kẹdẹ wẹ adán ehe nọ gbò podọ eyin n’dọna mẹdevo lẹ, yé ma sọgan mọnukunnujẹemẹ. Apajlẹ he tin to hosọ lọ mẹ lẹ gọalọna mi taun. To godo mẹ, mẹde mọnukunnujẹemẹ!”—Yọnnu jọja de to Australie

“Apajlẹ he tin to hosọ lọ mẹ lẹ gọalọna mi taun. To godo mẹ, mẹde mọnukunnujẹemẹ!”

“Nọtẹn jw.org tọn ko hẹn ẹn bọawuna mi taun nado mọ alọgọ gando nuhahun he jọja lẹ to pipehẹ lẹ go yí. Hosọ de gọalọna mi taun nado yọ́n wunmẹ tukladomẹ zanhẹmẹ tọn lẹ, n’sọ mọdọ n’tin to nuhahun enẹ mẹ, podọ n’plọn aliho dagbe he mẹ n’sọgan pehẹ ẹ te.”—T. W., Whèyihọ Inde tọn.

Alọgigọna Mẹjitọ Lẹ

“Visunnu ṣie ma nọ sinai do fidopo. Agbọ́ nọ saba pé mi na fidopo ma nọ etọn po walọ madonukun he e nọ zan lẹ po. Ehe nọ zọ́n bọ mí ma nọ tindo hodọdopọ dagbe de. To gbèdopo, n’yì jw.org ji bo de adà asu po asi po gọna mẹjitọ lẹ tọn. N’mọ hosọ susu he gando ninọmẹ ṣie go podọ enẹ plọn mi lehe n’sọgan dọhona visunnu ṣie do. Ewọ lọsu ko dù ale nọtẹn lọ tọn. Todin, e nọ hùn ahun etọn bo nọ dọhona mi gando ayajẹ he e tindo po nuhahun etọn lẹ po go.”—C. B., Aflika.

“Hosọ de nọ saba sọawuhia to jw.org ji janwẹ to ojlẹ he sọgbe mẹ nado gọalọna mí nido pehẹ avùnnukundiọsọmẹnu de he ovi lẹ to pipehẹ”

“Na mí mẹhe yin mẹjitọ lẹ, jw.org nọ wleawuna aliho mẹdọndogo tọn he mí sọgan yizan nado plọn ovi mítọn lẹ. Di apajlẹ, yẹdide ṣiṣavi tọn he dọhodo lehe mí sọgan mọ họntọn nugbo de do gọalọna ovi mítọn lẹ nado tindo pọndohlan he sọgbe gando họntọnjiji go, podọ nado de họntọn he na tindo nuyiwadomẹji dagbe do yé ji lẹ. Hosọ de nọ saba sọawuhia to jw.org ji janwẹ to ojlẹ he sọgbe mẹ nado gọalọna mí na mí nido sọgan pehẹ avùnnukundiọsọmẹnu de he ovi lẹ to pipehẹ. Ayinamẹ nujọnu tọn de wẹ.”—E. L., Europe.

Alọgigọna Asu po Asi po He Yin Alọwlemẹ Lẹ

“E ko yì owhe ṣidopo todin he yẹn po asi e po wlealọ. Taidi alọwlemẹ devo lẹ, mí ko pehẹ nuhahun lọ nado nọ dọwhẹgbọ do aliho hodidọ tọn lẹ, mẹpinplọn whẹndo tọn he mí mọyi, po pọndohlan voovo he mí nọ tindo lẹ po ji. Hosọ lọ Comment mieux ecouter (Lehe A Sọgan Yin Todoaitọ Dagbe De Do) he tin to jw.org ji dọ̀n ayidonugo ṣie. Hosọ lọ na ayinamẹ dagbe lẹ do lehe yè sọgan nọ dotoaina ode awetọ ganji do. N’hia hosọ lọ, enẹgodo n’dọ nuhe n’hia lẹ na asi ṣie. Mí ko tẹnpọn nado yí ayinamẹ dagbe lọ lẹ do yizan mẹ.”—B. B., Whèyihọ Inde tọn.

“Nọtẹn ehe wẹ zọ́n bọ alọwle ṣie ma gbakija”

“Sọn owhe he wayi mẹ gbọ́n wẹ n’ko to gbẹdo hẹ Kunnudetọ Jehovah tọn lẹ, podọ n’jlo na do pinpọn-nutọn-yinyọnẹn ṣie hia gando nọtẹn jw.org tọn go. N’ko plọn nususu sọn nọtẹn lọ ji, lehe n’sọgan nọ dava homẹgble ṣie do, podọ lehe n’sọgan yin asu kavi otọ́ dagbe de do. N’sọgan yí ahundopo do dọ dọ nọtẹn ehe wẹ zọ́n bọ alọwle ṣie ma gbakija.”—L. G., Whèyihọ Inde tọn.

Alọgigọna Tókunọ Lẹ

“Nọtẹn jw.org tọn zọ́n bọ n’mọdọ n’gọwá gbẹ̀mẹ whladopo dogọ. Na video lẹ tin to Tókunọ-gbè Amelika tọn mẹ wutu, enẹ zọ́n bọ n’yọ́n tókunọ-gbè dogọ. N’nọ lẹn dai dọ n’ma sọgan ze yanwle dagbe de donukọnna dee to gbẹ̀mẹ, ṣigba, to whenue n’pọ́n video lọ ‘Je «vois» la Parole de Dieu dans ma langue’ (N’mọ Ohó Jiwheyẹwhe Tọn to Ogbè Ṣie Mẹ), e yinuwado ahun ṣie ji taun bo hẹn gbemima ṣie lodo nado nọ ze ayidonugo do adà dagbe gbẹ̀mẹ tọn lẹ ji.”—J. N., Aflika.

“Nọtẹn jw.org tọn zọ́n bọ n’mọdọ n’gọwá gbẹ̀mẹ whladopo dogọ”

“Alọgọnamẹnu daho de wẹ nọtẹn lọ. Mẹdezejotọ he nọ gọalọna tókunọ lẹ wẹ n’yin, titengbe tókunọ he yin jọja lẹ. Nudọnamẹ susu he tin to tókunọ-gbè mẹ ko gọalọna mi nado yọ́n tókunọ-gbè dogọ. Nọtẹn lọ ko sọ gọalọna mi nado penugo bo na alọgọ mẹhe jlo na hẹn whẹndo yetọn pọnte dogọ po haṣinṣan họntọnjiji tọn yetọn lẹ po lẹ.”—K. J., Whèyihọ Inde tọn.

Alọgigọna Nukuntọ́nnọ Lẹ

“Nukuntọ́nnọ he jw.org ko gọalọna de wẹ n’yin. Nọtẹn lọ nọ na mi nudọnamẹ he sọgan yì osun lẹ whẹpo do mọyi gbọn wekanhlanmẹ Intẹnẹt ji tọn dali. Nọtẹn lọ ko gọalọna mi nado jla lehe n’nọ yinuwa hẹ whẹndo ṣie do bosọ hẹn mi yin mẹhe yọ́n-na-yizan to lẹdo he mẹ n’nọ nọ̀. E sọ zọ́n bọ n’nọ mọ nudọnamẹ lẹ yí to ojlẹ dopolọ mẹ hẹ họntọn ṣie he ma yin nukuntọ́nnọ lẹ.”—C. A., Amérique du Sud

“Nọtẹn lọ ko gọalọna mi nado jla lehe n’nọ yinuwa hẹ whẹndo ṣie do bosọ hẹn mi yin mẹhe yọ́n-na-yizan to lẹdo he mẹ n’nọ nọ̀”

“Na mẹhe ma nọ hia nukinkan nukuntọ́nnọ lẹ tọn kavi mẹhe ma tindo akuẹ nado họ̀ owe nukuntọ́nnọ lẹ tọn, nuhọakuẹ tlala de wẹ jw.org yin na yé. Gbọn todidoai na hoyidokanji he bẹ nudọnamẹ lẹ hẹn dali, nukuntọ́nnọ lẹ sọgan sè nupinplọn agọe tọn susu. Nọtẹn ehe yin awuwlena mẹlẹpo matin mẹdèpo kavi mẹnukuntahihopọn. E gọalọna mí mẹhe yin nukuntọ́nnọ lẹ nado mọdọ mí yin nujọnu bo ma yin míto-yémẹ poun.”—R. D., Aflika.

Alọgigọna Mẹhe Huvẹ Gbigbọmẹ Tọn to Hùhù Lẹ

“Vogbingbọn he tin to nọtẹn mìtọn po sinsẹ̀n devo lẹ tọn po ṣẹnṣẹn wẹ yindọ e ma nọ bẹ hogbe sinsẹ̀n mìtọn tọn lẹ po hogbe he yẹwhenọ lẹ kẹdẹ sọgan mọnukunnujẹemẹ lẹ po hẹn. Podọ e ma nọ bẹ nudọnamẹ susu hẹn sọmọ bọ a na bu do dewe. Nọtẹn jw.org tọn mìtọn bọawu bosọ to tlọlọ. E ma bẹ hogbe kavi tamẹnuplọnmẹ susu hẹn. E ma nọ dike yise ni yin pinpọnhlan to aliho de mẹ taidi nuhe doglẹ. Kakatimọ, e nọ dohia dọ yise yin nude he gbẹtọ paa lẹ sọgan tindo.”—A. G., Asie.

“Nọtẹn jw.org tọn mìtọn bọawu bosọ to tlọlọ . . . E nọ dohia dọ yise yin nude he gbẹtọ paa lẹ sọgan tindo”

“Tapònọ! Wẹ gbẹzan ṣie na yin eyin jw.org ma tin. To aihọn he tin to zinvlu mẹ ehe mẹ, nọtẹn ehe taidi tọṣì he n’sọgan nọ tá to zinvlu mẹ. To afọdopolọji, n’sọgan nọ mọ bo sè hosọ he basi zẹẹmẹ do pọndohlan Jiwheyẹwhe tọn gando whẹho lẹ go bosọ mọ gblọndo na kanbiọ gbẹ̀mẹ tọn susu.”—J. C., Whèyihọ Inde tọn.

“N’yọ́n pinpẹn alọgọ gbigbọmẹ tọn he n’mọyi lẹpo tọn kakajẹ míwlẹ he tin to zungbo ṣẹnṣẹn to Amérique du Sud. Eyin nọtẹn ehe ma tin wẹ, be n’na ko bu.”—M. F., Amérique du Sud.

Plọnnu Dogọ

Etẹwẹ Sọgan Yin Mimọ to Nọtẹn Intẹnẹt Tọn Mítọn Ji?

A sọgan mọ nudọnamẹ susu dogọ gando omẹ nankọ he mí yin po nuyise mítọn lẹ po go, podọ a na mọ gblọndo Biblu tọn na kanbiọ towe lẹ.