Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

Nado Mọ Whlẹngán Wẹ Zọ́n bọ Mì Nọ Dọyẹwheho sọn Họndekọn-jẹ-Họndekọn Ya?

Nado Mọ Whlẹngán Wẹ Zọ́n bọ Mì Nọ Dọyẹwheho sọn Họndekọn-jẹ-Họndekọn Ya?

Lala. Nugbo wẹ dọ mí nọ dọyẹwheho whẹwhẹ sọn họndekọn-jẹ-họndekọn, ṣigba mí ma yise dọ azọ́n enẹ wiwà wẹ na zọ́n bọ mí na mọ whlẹngán dandan gba. (Efesunu lẹ 2:8) Etẹwutu?

Lẹnnupọndo apajlẹ ehe ji: Mí ni dọ dọ dawe homẹdagbenọ de dopagbe dọ emi na na nunina he họakuẹ de mẹhe na wá lẹdo tangan de mẹ to azán tangan de gbè lẹpo. Eyin a dejido opagbe dawe lọ tọn go nugbonugbo, be a ma na hodo anademẹ etọn lẹ ya? Gbau! Podọ e sọ yọnbasi dọ a ni dọhona hagbẹ whẹndo towe tọn lẹ po họntọn towe lẹ po gando nunina mọnkọtọn go, na yelọsu nido sọgan duvivi etọn. Etomọṣo, e ma yin mọwiwà wẹ na zọ́n bọ hiẹ na mọ nunina lọ dandan gba, ṣigba na dawe lọ jlo nado na we wutu wẹ.

Mọdopolọ, Kunnudetọ Jehovah tọn lẹ tindo yise to opagbe ogbẹ̀ madopodo tọn he Jiwheyẹwhe do na mẹhe setonuna ẹn lẹpo mẹ. (Lomunu lẹ 6:23) Mí nọ dovivẹnu nado dọ nuyise mítọn lẹ na mẹdevo lẹ, po todido lọ po dọ yelọsu na mọaleyi sọn opagbe Jiwheyẹwhe tọn lẹ mẹ. Ṣigba mí ma yise dọ yẹwhehodidọ mítọn wẹ na zọ́n bọ mí na mọ whlẹngán. (Lomunu lẹ 1:17; 3:28) Na nugbo tọn, gbẹtọvi depope ma sọgan pegan pọ́n gbede gbọn vivẹnudido edetiti tọn dali nado mọ dona daho mọnkọtọn he wá sọn Jiwheyẹwhe dè. “E ma yin na azọ́n dodowiwa tọn he mí ko wà lẹ wutu wẹ gba, ṣigba na lẹblanu etọn wutu wẹ ewọ whlẹn mí gán.Titu 3:5.