Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

Naegbọn Kunnudetọ Jehovah Tọn lẹ Nọ Gbọṣi Kada Na Tonudidọ?

Naegbọn Kunnudetọ Jehovah Tọn lẹ Nọ Gbọṣi Kada Na Tonudidọ?

Whẹwhinwhẹ́n sinsẹ̀n tọn he sinai do nuhe Biblu plọnmẹ lẹ ji wutu wẹ Kunnudetọ Jehovah tọn lẹ nọ gbọṣi kada na tonudidọ. Mí ma nọ tẹnpọn nado diọlinlẹnnamẹ, blavo nado ze tonudọgbẹ́ de kavi tonudọtọ he ze yinkọ dai nado dugán lẹ, ze yinkọ dai na ogántẹn, kavi tindo mahẹ to nuyiwa depope mẹ nado diọ gandudu lẹ. Mí yise dọ Biblu na whẹwhinwhẹ́n dolido lẹ nado yinuwa domọ.

  • Mí nọ hodo apajlẹ Jesu tọn, he gbẹ́ nado kẹalọyi ogántẹn tonudidọ tọn. (Johanu 6:15) E plọn devi etọn lẹ ma nado “yin apadewhe aihọn lọ tọn,” podọ e hẹn ẹn họnwun dọ yé dona nọ kada na whẹho tonudidọ tọn.Johanu 17:14, 16; 18:36; Malku 12:13-17.

  • Mí nọ yin nugbonọ na Ahọluduta Jiwheyẹwhe tọn he hó Jesu dọ to whenue e dọmọ: “Yẹwheho wẹndagbe Ahọluduta lọ tọn ehe na yin didọ to aigba fininọ lẹpo ji.” (Matiu 24:14) Taidi afọzedaitọ Ahọluduta Jiwheyẹwhe tọn he yin azọ́ndena nado lá wiwá etọn lẹ, mí nọ gbọṣi kada na whẹho tonudidọ tọn to otò lẹpo mẹ, etlẹ yin dehe mẹ mí nọ nọ̀ lẹ.2 Kọlintinu lẹ 5:20; Efesunu lẹ 6:20.

  • Na mí nọ gbọṣi kada wutu, mí nọ penugo nado dọho po awuvivo po na gbẹtọ he tin to tonudọgbẹ́ voovo mẹ lẹ gando wẹndagbe Ahọluduta Jiwheyẹwhe tọn go. Mí nọ tẹnpọn nado dohia to hodidọ po walọ mítọn lẹ po mẹ dọ mí deji do Ahọluduta Jiwheyẹwhe tọn go nado didẹ nuhahun aihọn lọ tọn lẹ.Psalm 56:11.

  • Na mí nọ dapana kinklan tonudidọ tọn lẹ wutu, ogbè mítọn topọ taidi pipli mẹmẹsunnu lẹ tọn de lẹdo aihọn pé. (Kọlọsinu lẹ 3:14; 1 Pita 2:17) To vogbingbọn mẹ, sinsẹ̀n he nọ donù tonudidọ mẹ lẹ nọ hẹn ogbẹ́ yetọn lẹ klan.1 Kọlintinu lẹ 1:10.

Mí nọ tindo sisi na gandudu lẹ. Dile etlẹ yindọ mí ma nọ dádo tonudidọ mẹ, mí nọ tindo sisi na aṣẹpipa gandudu he glọ mí tin te lẹ tọn. Ehe sọgbe hẹ gbedide Biblu tọn dọmọ: “Mì gbọ alindọn lẹpo ni yin mẹmẹglọ na aṣẹpipa daho lẹ.” (Lomunu lẹ 13:1) Mí nọ setonuna osẹ́n, nọ sú takuẹ, bo nọ kọngbedopọ hẹ vivẹnudido gandudu lẹ tọn nado penukundo dagbemẹninọ tòvi yetọn lẹ tọn go. Kakati mí ni tẹnpọn nado de gandudu de sẹ̀, mí nọ hodo ayinamẹ Biblu tọn nado nọ hodẹ̀ “do ota ahọlu lẹ tọn mẹ podọ do ota mẹhe tin to otẹn [aṣẹpipa tọn] mẹ lẹpo tọn mẹ,” titengbe to whenue yé to nudide he sọgan yinuwado mẹdekannujẹ sinsẹ̀n-bibasi tọn ji lẹ basi.1 Timoti 2:1, 2.

Mí sọ na sisi jlọjẹ mẹdevo lẹ tọn nado basi nudide mẹdetiti tọn yetọn to whẹho tonudidọ tọn mẹ. Di apajlẹ, mí ma nọ hẹn hunyanhunyan wá to vòbibla lẹ whenu kavi glọnalina mẹhe basi nudide nado blavo lẹ.

Be nuyọyọ de wẹ kadaninọ mítọn yin ya? Lala. Apọsteli lẹ po Klistiani owhe kanweko tintan whenu tọn devo lẹ po ko do teninọ mọnkọtọn hia gando aṣẹpipa gandudu lẹ tọn go. Owe lọ Beyond Good Intentions dọmọ: “Dile etlẹ yindọ Klistiani owhe kanweko tintan whenu tọn lẹ yise dọ dandan wẹ e yin dọ emi ni do gbégbò hia aṣẹpatọ lẹ, yé ma yise dọ emi dona tindo mahẹ to whẹho tonudidọ tọn lẹ mẹ.” Mọdopolọ, owe lọ On the Road to Civilization dọ dọ Klistiani dowhenu tọn lẹ “ma nọ kẹalọyi ogántẹn depope to tonudidọ-liho.”

Be kadaninọ mítọn nọ ze hihọ́ otò de tọn do owù mẹ wẹ ya? Lala. Tòvi he yiwanna jijọho lẹ wẹ mí yin, enẹwutu whẹwhinwhẹ́n depope ma tin na aṣẹpatọ lẹ nado dibuna mí. Lẹnnupọndo linlin he Académie Nationale des Sciences Ukraine tọn wleawuna to 2001 ji. Linlin lọ dọho gando kadaninọ mítọn to whẹho tonudidọ tọn mẹ go dọmọ: “To egbehe, mẹdelẹ sọgan jẹagọdo teninọ he Kunnudetọ Jehovah tọn lẹ nọ ze ehe; na taun tọn, whẹwhinwhẹ́n enẹ lọ wutu janwẹ gandudu aṣẹglanglan panamẹ tọn Nazi lẹ po communiste lẹ po tọn do sawhẹdokọna yé wayi.” Etomọṣo, to whenue yé tin to kọgbidinamẹ sinsinyẹn gandudu Union Soviétique tọn glọ, Kunnudetọ lẹ “zindonukọn nado yin tòvi he nọ setonuna osẹ́n lẹ. Yé yí ahundopo po gbigbọ mẹde-yido-sanvọ́ po tọn do wazọ́n to ogle mẹlẹpo tọn lẹ po azọ́nwhé dahodaho lẹ po mẹ, podọ yé ma yin owùnu depope na gandudu communiste lẹ tọn.” Mọdopolọ to egbehe, nuyise po aṣa Kunnudetọ Jehovah tọn lẹ po ma nọ “ze hihọ́ po pọninọ otò depope tọn po do owù mẹ” dile linlin lọ dotana do.

Plọnnu Dogọ

Naegbọn Kunnudetọ Jehovah Tọn lẹ Ma Nọ Yì Awhàn?

Mẹlẹpo wẹ yọnẹn lẹdo aihọn pé dọ Kunnudetọ Jehovah tọn lẹ ma nọ yì awhàn. Pọ́n nuhewutu yé ma nọ yì awhàn.