Yì hosọ lẹ ji

Yì hosọ flinflin lẹ ji

Kunnudetọ Jehovah Tọn Lẹ

Gungbe

Be Kunnudetọ Jehovah Tọn lẹ Tindo Yise to Alẹnu Hoho lọ mẹ Ya?

Be Kunnudetọ Jehovah Tọn lẹ Tindo Yise to Alẹnu Hoho lọ mẹ Ya?

Mọwẹ. Kunnudetọ Jehovah tọn lẹ tindo yise dọ Biblu lọ blebu yin “gbigbọdo sọn Jiwheyẹwhe dè bo yin alenu.” (2 Timoti 3:16) Ehe bẹ Alẹnu Hoho po Alẹnu Yọyọ lọ po hẹn, dile mẹsusu nọ saba ylọ yé dọ. To paa mẹ, Kunnudetọ Jehovah tọn lẹ nọ ylọ adà voovo awe Biblu tọn enẹlẹ dọ Owe-wiwe Heblu tọn lẹ po Owe-wiwe Glẹki tọn lẹ po. Gbọnmọ dali, mí ma nọ dohia dọ adà Biblu tọn delẹ ko dohó kavi masọ yọ́n-na-yizan ba.

Naegbọn Klistiani lẹ do tindo nuhudo Alẹnu Hoho lọ po Alẹnu Yọyọ lọ po tọn?

Apọsteli Paulu wlan to gbọdo glọ dọmọ: “Nuhe ko yin kinkandai jẹnukọn lẹpo yin kinkandai na oplọn mítọn.” (Lomunu lẹ 15:4) Enẹwutu, Owe-wiwe Heblu tọn lẹ bẹ nudọnamẹ họakuẹ lẹ hẹn na ale mítọn. Di apajlẹ, yé bẹ whenuho he plọnnumẹ po ayinamẹ yọ́n-na-yizan lẹ po hẹn.

  • Whenuho he plọnnumẹ. Owe-wiwe Heblu tọn lẹ bẹ zẹẹmẹ gigọ́ lẹ hẹn gando lehe nulẹ yin didá do po lehe gbẹtọvi lẹ jẹ ylando mẹ do po go. Eyin mí ma ko tindo nudọnamẹ enẹlẹ wẹ, mí ma na mọ gblọndo nujọnu tọn na kanbiọ delẹ taidi: Fie wẹ mí wá sọn? Naegbọn gbẹtọ do nọ kú? (Gẹnẹsisi 2:7, 17) Humọ, Owe-wiwe Heblu tọn lẹ dọ lehe Jehovah Jiwheyẹwhe yinuwa hẹ gbẹtọ lẹ do, yèdọ gbẹtọ he tindo ayajẹ bosọ pehẹ nuhahun taidi mítọn nkọ lẹ.—Jakọbu 5:17.

  • Ayinamẹ yọ́n-na-yizan lẹ. Owe Biblu tọn he nọ yin Howhinwhẹn lẹ po Yẹwhehodọtọ po he yin apadewhe Owe-wiwe Heblu tọn lẹ tọn bẹ nuyọnẹn gbẹ̀mẹ tọn he ma nọ dohó hẹn. Yé na ayinamẹ gando lehe mẹde sọgan tindo whẹndo ayajẹnọ de do (Howhinwhẹn lẹ 15:17) po lehe mẹde sọgan tindo pọndohlan jlẹkaji tọn to whẹho agbasazọ́n tọn mẹ do po go (Howhinwhẹn lẹ 10:4; Yẹwhehodọtọ 4:6), gọna lehe jọja lẹ sọgan zan jọja whenu yetọn do nado tindo ayajẹ susu (Yẹwhehodọtọ 11:9–12:1).

Humọ, Osẹ́n Mose tọn he tin to Torah (owe atọ́n tintan Biblu tọn lẹ) mẹ pinplọn sọgan hẹn ale wá na mí. Dile etlẹ yindọ Klistiani lẹ masọ tin to Osẹ́n enẹ glọ ba, e gbẹ́ bẹ nunọwhinnusẹ́n họakuẹ he sọgan gọalọna mí nado tindo ayajẹ to gbẹ̀mẹ lẹ hẹn.—Levitiku 19:18; Deutelonomi 6:5-7.