Yì hosọ lẹ ji

Yì hosọ flinflin lẹ ji

Kunnudetọ Jehovah Tọn Lẹ

Gungbe

Etẹlẹ Wẹ Yin Nuyise Kunnudetọ Jehovah Tọn lẹ Tọn?

Etẹlẹ Wẹ Yin Nuyise Kunnudetọ Jehovah Tọn lẹ Tọn?

Taidi Kunnudetọ Jehovah tọn lẹ, mí nọ dovivẹnu nado tẹdo nuwiwa sinsẹ̀n Klistiani tọn he Jesu plọnmẹ bọ apọsteli lẹ hodo pẹkipẹki lẹ go. Hosọ ehe basi bladopọ nuyise tangan mítọn lẹ tọn.

  1. Jiwheyẹwhe. Mí nọ sẹ̀n Jiwheyẹwhe nugbo dopo akàn lọ, yèdọ Ganhunupotọ podọ Mẹdatọ lọ, mẹhe yinkọ etọn nọ yin Jehovah. (Psalm 83:18; Osọhia 4:11) Ewọ wẹ Jiwheyẹwhe Ablaham tọn, Mose tọn, podọ Jesu tọn.​—Eksọdusi 3:6; 32:11; Johanu 20:17.

  2. Biblu. Mí nọ pọ́n Biblu hlan taidi owẹ̀n gbọdo Jiwheyẹwhe tọn na gbẹtọvi lẹ. (Johanu 17:17; 2 Timoti 3:16) Mí nọ ze nuyise mítọn lẹ sinai do owe voovo 66 he to e mẹ lẹ ji, ehe bẹ “Alẹnu Hoho” po “Alẹnu Yọyọ” po hẹn. Mẹplọntọ wehọmẹ alavọ tọn Jason D. BeDuhn basi zẹẹmẹ etọn po gbesisọ po to whenue e kàn dọ Kunnudetọ Jehovah tọn lẹ nọ ze “nuyise po aṣa yetọn lẹ po sinai do nudọnamẹ dodonu tọn he to Biblu mẹ lẹ ji, bo ma nọ hẹn Biblu nado dọ nuhe yewlẹ jlo dọ e ni dọ.” *

    Dile etlẹ yindọ mí nọ kẹalọyi nuhe to Biblu mẹ lẹpo, mí ma nọ yin hẹngogonọ. Mí yọnẹn dọ adà Biblu tọn delẹ yin kinkan po hogbe yẹhiadonu tọn lẹ po bọ zẹẹmẹ yetọn nọ gbloada hú nuhe hogbe lọ lẹ dọ to paa mẹ.​—Osọhia 1:1.

  3. Jesu. Mí nọ hodo nuplọnmẹ po apajlẹ Jesu Klisti tọn lẹ po bo nọ gbògbéna ẹn taidi Mẹwhlẹngántọ Mítọn podọ Visunnu Jiwheyẹwhe tọn. (Matiu 20:28; Owalọ lẹ 5:31) Enẹwutu, Klistiani lẹ wẹ mí yin. (Owalọ lẹ 11:26) Ṣigba, mí ko plọn to Biblu mẹ dọ Jesu ma yin Jiwheyẹwhe Ganhunupotọ lọ podọ wefọ Owe-wiwe lẹ tọn depope ma nọgodona sinsẹ̀n-nuplọnmẹ Atọ̀n-to-Dopomẹ tọn.​—Johanu 14:28.

  4. Ahọluduta Jiwheyẹwhe tọn. E ma yin ninọmẹ ahun mẹ tọn de he Klistiani lẹ nọ tindo, ṣigba gandudu nujọnu tọn de wẹ e yin bo tin to olọn mẹ. E na yitẹn to gandudu gbẹtọvi tọn lẹ si bo na hẹn lẹndai Jiwheyẹwhe tọn na aigba di. (Daniẹli 2:44; Matiu 6:9, 10) E na wà ehe to madẹnmẹ, na dọdai Biblu tọn lẹ dohia dọ mí to gbẹnọ to “azán godo tọn lẹ” mẹ.​—2 Timoti 3:1-5; Matiu 24:3-14.

    Jesu wẹ yin Ahọlu na Ahọluduta Jiwheyẹwhe tọn he to olọn mẹ. E ko jẹ gandu ji sọn 1914.​—Osọhia 11:15.

  5. Whlẹngán. Avọ́sinsan ofligọ tọn he Jesu basi wẹ hẹn ẹn yọnbasi na mí nado jẹ mẹdekannu sọn ylando po okú po si. (Matiu 20:28; Owalọ lẹ 4:12) Nado mọaleyi sọn avọ́sinsan enẹ mẹ, yise tintindo to Jesu mẹ kẹdẹ ma ko pé, ṣigba gbẹtọ lẹ sọ dona jo walọyizan yetọn hoho lẹ do bo yí baptẹm. (Matiu 28:19, 20; Johanu 3:16; Owalọ lẹ 3:19, 20) Nuyiwa mẹde tọn wẹ nọ dohia eyin yise etọn togbẹ̀. (Jakọbu 2:24, 26) Etomọṣo, mẹde ma sọgan mọ whlẹngán yí gbọn vivẹnudido edetiti tọn dali, adavo gbọn “nukundagbe majẹhẹ Jiwheyẹwhe tọn” dali.​— Galatianu lẹ 2:16, 21.

  6. Olọn. Jehovah Jiwheyẹwhe, Jesu Klisti po angẹli nugbonọ lẹ po wẹ nọ nọ̀ lẹdo gbigbọ tọn ehe mẹ. * (Psalm 103:19-21; Owalọ lẹ 7:55) Gbẹtọ vude, ehe sọha yetọn yin 144 000, na yin finfọnsọnku nado yì nọgbẹ̀ to olọn mẹ bo dugán hẹ Jesu to Ahọluduta lọ mẹ.​—Daniẹli 7:27; 2 Timoti 2:12; Osọhia 5:9, 10; 14:1, 3.

  7. Aigba. Jiwheyẹwhe dá aigba na gbẹtọvi lẹ nido nọ nọ̀ e ji kakadoi. (Psalm 104:5; 115:16; Yẹwhehodọtọ 1:4.) Jiwheyẹwhe na dona gbẹtọvi tonusetọ lẹ bọ yé na tindo agbasalilo pipé bo nasọ nọgbẹ̀ kakadoi to aigba he na lẹzun paladisi de ji.​—Psalm 37:11, 34.

  8. Ylanwiwa po yajiji po. Onú ehelẹ bẹjẹeji to whenue angẹli Jiwheyẹwhe tọn dopo ṣiatẹ. (Johanu 8:​44) To whenue angẹli ehe ko ṣiatẹ bo wá yin yiylọdọ “Satani” podọ “Lẹgba” godo, e sọ sisẹ́ asu po asi po tintan lọ nado vẹtoli di ewọ, podọ kọdetọn he ehe hẹnwa na ovivi yetọn lẹ ylan taun. (Gẹnẹsisi 3:1-6; Lomunu lẹ 5:12) Nado didẹ whẹho nugbonọ-yinyin tọn he Satani fọndote, Jiwheyẹwhe jotẹnna ylanwiwa po yajiji po, ṣigba e ma na dike nuylankan enẹlẹ ni gbọṣi aimẹ kakadoi.

  9. Okú. Mẹhe kú lẹ masọ nọ tin to fide ba. (Psalm 146:4; Yẹwhehodọtọ 9:5, 10) Zòmẹ de ma tin he mẹ yé nọ jiya te.

    Jiwheyẹwhe na hẹn gbẹtọ liva susu lẹ gọwá ogbẹ̀ gbọn fọnsọnku gblamẹ. (Owalọ lẹ 24:15) Ṣigba, mẹhe ma na kẹalọyi anademẹ Jiwheyẹwhe tọn to fọnsọnku yetọn godo lẹ na yin vivasudo mlẹnmlẹn bo ma nasọ yin finfọnsọnku gbede ba.​—Osọhia 20:5.

  10. Whẹndo. To gbesisọ mẹ hẹ nujinọtedo dowhenu tọn Jiwheyẹwhe tọn, mí nọ pọ́n alọwle hlan taidi kọndopọ sunnu dopo po yọnnu dopo po tọn, podọ fẹnnuwiwa zanhẹmẹ tọn wẹ yin dodonu dopo gee lọ na gbẹdai. (Matiu 19:4-9) Mí kudeji dọ nuyọnẹn he tin to Biblu mẹ sọgan gọalọna whẹndo lẹ nado tindo kọdetọn dagbe.​—Efesunu lẹ 5:22–​6:1.

  11. Sinsẹ̀n-bibasi mítọn. Mí ma nọ sẹ̀n satin kavi boṣiọ devo depope. (Deutelonomi 4:15-19; 1 Johanu 5:21) Delẹ to adà tangan he sinsẹ̀n-bibasi mítọn bẹhẹn lẹ mẹ die:

  12. Titobasinanu mítọn. Mí yin tito-basina do agun lẹ mẹ, ehe dopodopo yetọn nọ yin nukunpedego gbọn pipli mẹho lẹ tọn de dali. Ṣigba, mẹho ehelẹ ma yin pipli sinsẹ̀ngán lẹ tọn de gba, podọ yé ma nọ mọ sunmẹ-kuẹ de yí. (Matiu 10:8; 23:8) Mí ma nọ na mado-ao, kavi yí agbánmẹ-kuẹ to opli mítọn lẹ ji. (2 Kọlintinu lẹ 9:7) Nuwiwa mítọn lẹpo wẹ nọ yin godonọna gbọn nunina sọn ojlo mẹ wá lẹ dali.

    Pipli Klistiani he whèwhín lẹ tọn de he nọ yin yiylọdọ Hagbẹ Anademẹtọ bo nọ wazọ́n to tatọ́-tẹnnọ mítọn wẹ nọ deanana nuwiwa Kunnudetọ Jehovah tọn lẹ tọn lẹdo aihọn pé.​—Matiu 24:45.

  13. Pọninọ mítọn. Nuyise dopolọ lẹ wẹ mímẹpo tindo lẹdo aihọn pé. (1 Kọlintinu lẹ 1:​10) Mí sọ nọ dovivẹnu taun ma nado natẹn kinklan hẹnnu, akọ̀, sinmẹ agbasa tọn, kavi kinklan wunmẹ devo depope to ṣẹnṣẹn mítọn. (Owalọ lẹ 10:34, 35; Jakọbu 2:4) Ṣigba, pọninọ mítọn ma nọ glọnalina mẹdopodopo nado basi nudide edetiti tọn. Kunnudetọ dopodopo nọ basi nudide etọn lẹ sọgbe hẹ ayihadawhẹnamẹnu etọn he ko yin pinplọn gbọn Biblu dali.​—Lomunu lẹ 14:1-4; Heblu lẹ 5:14.

  14. Walọyizan mítọn. Mí nọ dovivẹnu nado do owanyi matin ṣejannabi hia to nuyiwa mítọn lẹpo mẹ. (Johanu 13:34, 35) Mí nọ dapana walọ he nọ hẹn homẹgble Jiwheyẹwhe lẹ taidi ohùn ṣiṣizan gbọn dido e do lanmẹ dali. (Owalọ lẹ 15:28, 29; Galatianu lẹ 5:19-21) Mí nọ dín jijọho bo ma nọ doalọ to awhànfunfun mẹ. (Matiu 5:9; Isaia 2:4) Mí nọ na sisi aṣẹpatọ lẹ to fie mí nọ nọ̀ bo nọ setonuna osẹ́n yetọn lẹ eyin yé ma ko gbẹ́ biọ to mí si nado gbàsẹ́n Jiwheyẹwhe tọn.​—Matiu 22:21; Owalọ lẹ 5:29.

  15. Haṣinṣan mítọn hẹ mẹdevo lẹ. Jesu degbe dọmọ: “Hiẹ dona yiwanna kọmẹnu towe di dewe.” E sọ dọ dọ Klistiani lẹ ma dona “yin apadewhe aihọn tọn.” (Matiu 22:39; Johanu 17:16) Enẹwutu, mí nọ tẹnpọn nado “wà nuhe yin dagbe hlan mẹlẹpo,” ṣigba bo nọ nọ̀ kada to whẹho tonudidọ tọn lẹ mẹ bosọ nọ dapana gbẹdido pẹkipẹki hẹ pipli sinsẹ̀n tọn devo lẹ. (Galatianu lẹ 6:10; 2 Kọlintinu lẹ 6:14) Etomọṣo, mí nọ na sisi nudide he mẹdevo lẹ basi do whẹho ehelẹ ji.​—Lomunu lẹ 14:12.

Eyin a tindo kanbiọ devo lẹ do nuyise Kunnudetọ Jehovah tọn lẹ tọn ji, a sọgan hia nudọnamẹ susu dogọ gando mí go to nọtẹn Intẹnẹt tọn mítọn ji, kanwehlan dopo to azọ́nwatẹn mítọn lẹ mẹ, yì opli to Plitẹnhọ Ahọluduta tọn he sẹpọ we de mẹ, kavi dọho hẹ Kunnudetọ Jehovah tọn de to lẹdo towe mẹ.

^ huk. 4 Pọ́n owe lọ Truth in Translation, weda 165.

^ huk. 10 Angẹli ylankan lẹ ko yin yinyan sọn olọn mẹ, dile etlẹ yindọ yé gbẹ́ nọ nọ̀ lẹdo gbigbọ tọn mẹ.​—Osọhia 12:​7-9.

Plọnnu Dogọ

KANBIỌ HE MẸSUSU NỌ KANSE LẸ

Mẹnu Wẹ Do Sinsẹ̀n Kunnudetọ Jehovah Tọn lẹ Tọn Ai?

Hia nuhewutu Charles Taze Russell ma nọ yin pinpọnhlan di mẹhe do sinsẹ̀n yọyọ de ai.

KANBIỌ HE MẸSUSU NỌ KANSE LẸ

Be Kunnudetọ Jehovah Tọn lẹ Tindo Biblu Yetọn Titi Wẹ Ya?

Lẹdogbedevomẹ Biblu tọn voovo lẹ yiyizan sọgan hẹn Biblu pinplọn towe pọnte. E jẹ dọ a ni nọ yí Owe-Wiwe lẹ—Lẹdogbedevomẹ Aihọn Yọyọ Tọn zan to nupinplọn towe whenu, na onú titengbe atọ̀n delẹ he gando lẹdogbedevomẹ ehe go wutu.

KANBIỌ HE MẸSUSU NỌ KANSE LẸ

Naegbọn Kunnudetọ Jehovah Tọn lẹ Ma Nọ Dù Jijizan?

Pọ́n onú ẹnẹ delẹ he dohia dọ homẹ Jiwheyẹwhe tọn ma nọ hùn gando hùnwhẹ jijizan tọn lẹ go.

KANBIỌ HE MẸSUSU NỌ KANSE LẸ

Be Kunnudetọ Jehovah Tọn lẹ Tindo Yise to Jesu mẹ Ya?

Pọ́n nuhewutu yise tintindo to Jesu mẹ do yin dandannu na Klistiani nugbo lẹ.

MẸNU LẸ WẸ TO OJLO JEHOVAH TỌN WÀ TO EGBEHE?

Omẹ Nankọ Wẹ Kunnudetọ Jehovah Tọn lẹ Yin?

Kunnudetọ Jehovah tọn nẹmu wẹ a yọnẹn? Etẹwẹ a yọnẹn taun gando mí go?