Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

Be Kunnudetọ Jehovah Tọn lẹ Nọ Gọalọ to Nugbajẹmẹji Jọwamọ Tọn lẹ Whenu Ya?

Be Kunnudetọ Jehovah Tọn lẹ Nọ Gọalọ to Nugbajẹmẹji Jọwamọ Tọn lẹ Whenu Ya?

Mọwẹ, Kunnudetọ Jehovah tọn lẹ nọ saba gọalọ to whenue nugbajẹmẹji de wá aimẹ. Mí nọ gọalọna mẹlẹpo, yèdọ mẹhe yin Kunnudetọ po mẹhe ma yin Kunnudetọ po, to kọndopọ mẹ hẹ anademẹ Biblu tọn he tin to Galatianu lẹ 6:10 mẹ: “Mì gbọ mí ni nọ wà nuhe yin dagbe hlan mẹlẹpo, ṣigba, na taun tọn, hlan mẹhe gando mí go to yise mẹ lẹ.” Mí sọ nọ gọalọna mẹhe pehẹ nugbajẹmẹji lọ lẹ to numọtolanmẹ-liho podọ to gbigbọ-liho, na yé tindo nuhudo etọn taun to ojlẹ enẹlẹ mẹ.—2 Kọlintinu lẹ 1:3, 4.

Lehe mí nọ basi tito do

To nugbajẹmẹji de godo, mẹho agun he tin to lẹdo lọ mẹ lẹ tọn nọ doafọna hagbẹ agun lọ tọn lẹpo nado yọnẹn eyin yé tin to hihọ́ glọ bosọ yọ́n alọgọ he sin nuhudo yé tindo. To enẹgodo, mẹho lẹ nọ na linlin nuhe yé mọ lẹ gọna alọgọ he yé ko penugo nado na lẹ tọn hlan azọ́nwatẹn Kunnudetọ Jehovah tọn lẹ tọn he tin to lẹdo lọ mẹ.

Eyin alọgọ he dona yin awuwlena lọ zẹ̀ nugopipe agun lẹ tọn go, Hagbẹ Anademẹtọ Kunnudetọ Jehovah tọn lẹ tọn nọ wleawuna nuhe sin nuhudo tin lẹ. Ehe sọgbe hẹ aliho he mẹ Klistiani owhe kanweko tintan tọn lẹ penukundo nuhudo ode awetọ tọn go te to whenue huvẹ de wá aimẹ. (1 Kọlintinu lẹ 16:1-4) Azọ́nwatẹn Kunnudetọ Jehovah tọn lẹ tọn he tin to lẹdo lọ mẹ nọ wleawuna Wedegbẹ́ Kọgbọ tọn de nado deanana tito lẹ dile e jẹ do. Kunnudetọ he tin to lẹdo devo mẹ lẹ lọsu nọ yí whenu po nutindo yetọn lẹ po do gọalọ.—Howhinwhẹn lẹ 17:17.

Akuẹ he nọ yin zinzan

Dopo to aliho he mẹ nunina he nọ yin didohlan azọ́nwatẹn Kunnudetọ Jehovah tọn lẹ tọn nọ yin yiyizan te wẹ nado gọalọ to nugbajẹmẹji lẹ whenu. (Owalọ lẹ 11:27-30; 2 Kọlintinu lẹ 8:13-15) Na yè ma nọ suahọ mẹhe nọ wazọ́n lọ lẹ wutu, akuẹ he nọ yin awuwlena lẹ nọ yin yiyizan na nugbajẹmẹji lẹ, kakati nido yin na mẹhe nọ wazọ́n to azọ́nwatẹn lẹ. Mí nọ nọ̀ aṣeji taun gando nunina lẹpo go.—2 Kọlintinu lẹ 8:20.