Yì hosọ lẹ ji

Yì hosọ flinflin lẹ ji

Kunnudetọ Jehovah Tọn Lẹ

Gungbe

Be Kunnudetọ Jehovah Tọn lẹ Nọ Gbà Whẹndo lẹ Wẹ Ya Kavi Nọ Hẹn Yé Lodo?

Be Kunnudetọ Jehovah Tọn lẹ Nọ Gbà Whẹndo lẹ Wẹ Ya Kavi Nọ Hẹn Yé Lodo?

Taidi Kunnudetọ Jehovah tọn lẹ, mí nọ dovivẹnu nado hẹn whẹndo mílọsu tọn lẹ po kọmẹnu mítọn lẹ po tọn lẹ lodo. Mí nọ na sisi Jiwheyẹwhe, na ewọ wẹ Dowatọ tito whẹndo tọn. (Gẹnẹsisi 2:21-24; Efesunu lẹ 3:14, 15) To Biblu mẹ, ewọ nọ plọnmẹ nunọwhinnusẹ́n he ko gọalọna gbẹtọ susu lẹdo aihọn pé nado tindo alọwle he lodo bosọ yin ayajẹnọ.

Lehe Kunnudetọ Jehovah Tọn lẹ Nọ Gọalọna Whẹndo lẹ Nado Lodo Do

Mí nọ wà nuhe go mí pé lẹpo nado hodo ayinamẹ Biblu tọn lẹ, na ehe nọ gọalọna mí nado yin asu, asi po mẹjitọ dagbe lẹ po. (Howhinwhẹn lẹ 31:10-31; Efesunu lẹ 5:22–6:4; 1 Timoti 5:8) Nuyọnẹn he tin to Biblu mẹ tlẹ nọ gọalọna hagbẹ whẹndo he ma tin to sinsẹ̀n dopolọ mẹ lẹ tọn nado tindo kọdetọn dagbe. (1 Pita 3:1, 2) Lẹnnupọndo hodidọ alọwlemẹ he ma yin Kunnudetọ ehelẹ tọn ji po sọwhiwhe po, mẹhe alọwlemẹ yetọn lẹ lẹzun Kunnudetọ Jehovah tọn lẹ:

  • “Owhe ṣidopo tintan he mí yizan to pọmẹ lẹ gọ́ na jlẹwiwa po flumẹjijẹ po. Ṣigba, to whenue Ivete lẹzun Kunnudetọ Jehovah tọn godo, e nọ do owanyi hia mi dogọ bosọ nọ fahomẹ. Diọdo he e basi lẹ whlẹn alọwle mítọn.”—Clauir, sọn Brésil.

  • “To whenue asu ṣie Chansa jẹ Biblu plọn hẹ Kunnudetọ Jehovah tọn lẹ ji, e ma vivi na mi, na n’lẹndọ yé nọ gbà whẹndo lẹ kija wutu. Ṣigba sọn whenẹnu, n’wá mọdọ Biblu ko gọalọna whẹndo mítọn nugbonugbo.”—Agness, sọn Zambie.

To lizọnyizọn mítọn mẹ, mí nọ dohia kọmẹnu mítọn lẹ lehe nuyọnẹn he tin to Biblu mẹ yiyizan sọgan gọalọna yé nado

Be sinsẹ̀n didiọ nọ hẹn nuhahun wá alọwle de mẹ wẹ ya?

Nado dọ hójọhó, e nọ wàmọ to whedelẹnu. Di apajlẹ, to linlin de mẹ to 1998, azọ́nwhé dodinnanu tọn Sofres dohia dọ alọwle 1 to 20 ji he dopo to alọwlemẹ lẹ mẹ yin Kunnudetọ nọ tindo nuhahun sinsinyẹn to whenue mẹlọ diọ sinsẹ̀n bo lẹzun Kunnudetọ.

Jesu dọdai dọ mẹhe nọ hodo nuplọnmẹ emitọn lẹ na jiya gbemanọpọ tọn to whẹndo mẹ to whedelẹnu. (Matiu 10:32-36) Whenuho-kantọ Will Durant dohia dọ to Ahọluigba Lomu tọn glọ, “gbẹtọ lẹ nọ sawhẹdokọna Sinsẹ̀n Klistiani tọn dọ e nọ gbà whẹndo,” * podọ whẹsadokọnamẹ dopolọ wẹ Kunnudetọ Jehovah tọn delẹ nọ pehẹ to egbehe. Ṣigba, be ehe zẹẹmẹdo dọ Kunnudetọ lọ wẹ hẹn gbemanọpọ lọ wá ya?

Whẹdatẹn Europe Tọn Na Jlọjẹ Gbẹtọvi lẹ Tọn

To whenue Whẹdatẹn Europe Tọn Na Jlọjẹ Gbẹtọvi lẹ tọn to dogbapọnna whẹsadokọnamẹ lọ dọ Kunnudetọ Jehovah tọn lẹ nọ gbà whẹndo lẹ kija, whẹdatẹn lọ dọ dọ hagbẹ whẹndo tọn he ma yin Kunnudetọ lọ lẹ wẹ nọ saba hẹn nuhahun wá to whenue yé gbẹ́ “nado kẹalọyi kavi na sisi jlọjẹ sinsẹ̀n tọn he hagbẹ whẹndo tọn awetọ lọ tindo nado basi sinsẹ̀n etọn bosọ do e hia.” Whẹdatẹn lọ yidogọ dọ: “Ninọmẹ ehe nọ jọ to whẹndo he hagbẹ etọn lẹ ma tin to sinsẹ̀n dopolọ mẹ lẹpo mẹ, e ma yin Kunnudetọ lẹ kẹdẹ dè wẹ onú mọnkọtọn nọ jọ te gba.” * Ṣigba, eyin Kunnudetọ Jehovah tọn lẹ tlẹ pehẹ nuvẹun sinsẹ̀n tọn, yé nọ dovivẹnu nado hodo ayinamẹ Biblu tọn ehe: “Mì yí oylan do suahọ oylan tọn na mẹdepope blo. . . . Eyin e yọnbasi, dile mì penugo do, mì nọ nọ̀ jijọho mẹ hẹ gbẹtọ lẹpo.”Lomunu lẹ 12:17, 18.

Nuhewutu Kunnudetọ Jehovah tọn lẹ yise dọ hagbẹ sinsẹ̀n yetọn tọn lẹ kẹdẹ wẹ yé dona wlealọ hẹ

Kunnudetọ lẹ nọ setonuna ayinamẹ Biblu tọn nado wlealọ “to Oklunọ mẹ kẹdẹ,” enẹ wẹ nado wlealọ hẹ mẹhe tin to sinsẹ̀n yetọn mẹ kẹdẹ. (1 Kọlintinu lẹ 7:39) Gbedide ehe wá sọn Biblu mẹ bosọ sọgbe. Di apajlẹ, hosọ de he yin kinkan to 2010 to owe lọ the Journal of Marriage and Family mẹ dọ dọ e taidi dọ “asu po asi po he tindo sinsẹ̀n, aṣa sinsẹ̀n tọn po nuyise dopolọ lẹ po lẹ” nọ tindo haṣinṣan he pọnte. *

Etomọṣo, Kunnudetọ lẹ ma nọ dotuhomẹna hagbẹ sinsẹ̀n yetọn tọn lẹ nado klan sọn alọwlemẹ de he ma yin Kunnudetọ go. Biblu dọmọ: “Eyin mẹmẹsunnu de tindo asi mayisenọ de, ṣogan bọ yọnnu lọ kẹalọyi nado nọ nọ̀ hẹ ẹ, mì gbọ e jo e do blo; podọ yọnnu de he tindo asu mayisenọ, ṣogan bọ sunnu lọ kẹalọyi nado nọ nọ̀ hẹ ẹ, mì gbọ e jo asu etọn do blo.” (1 Kọlintinu lẹ 7:12, 13) Kunnudetọ Jehovah tọn lẹ nọ nọgbẹ̀ sọgbe hẹ gbedide ehe.

^ huk. 17 Pọ́n César et le Christ, weda 647.

^ huk. 18 Pọ́n tadona he kọ̀n Whẹdatẹn lọ wá to whẹho Kunnudetọ Jehovah tọn Moscou tọn lẹ po Devo lẹ po Sọta Russie tọn mẹ, weda 26-27, hukan 111.

^ huk. 20 Pọ́n the Journal of Marriage and Family, Bladopọ 72, Sọha 4tọ, (Août 2010), weda 963.

Plọnnu Dogọ

WẸNDAGBE DE SỌN JIWHEYẸWHE DÈ!

Nawẹ Whẹndo Towe Sọgan Yin Ayajẹnọ Gbọn?

Jehovah, Jiwheyẹwhe ayajẹnọ lọ, jlo dọ whẹndo lẹ ni tindo ayajẹ. Dindona ayinamẹ dagbe he Biblu na asu lẹ, asi lẹ, mẹjitọ lẹ, po ovi lẹ po.