Mọwẹ. Mí tindo yise to Jesu mẹ, na e dọmọ: “Yẹn wẹ aliho lọ, nugbo lọ po ogbẹ̀ po. Mẹdepope ma nọ wá Otọ́ dè adavo gbọn yẹn gblamẹ.” (Johanu 14:6) Mí tindo yise dọ Jesu wá aigba ji sọn olọn mẹ bo ze ogbẹ̀ pipé gbẹtọvi tọn etọn jo taidi avọ́sinsan ofligọ tọn. (Matiu 20:28) Okú po fọnsọnku etọn po zọ́n bọ mẹhe tindo yise to ewọ mẹ lẹ sọgan mọ ogbẹ̀ madopodo. (Johanu 3:16) Mí sọ yise dọ Jesu to gandu todin taidi Ahọlu Ahọluduta Jiwheyẹwhe tọn he tin to olọn mẹ tọn, ehe na hẹn jijọho wá aigba lọ blebu ji to madẹnmẹ. (Osọhia 11:15) Amọ́, mí nọ pọ́n Jesu hlan dile e dọ do dọmọ: “Otọ́ klohugan mi.” (Johanu 14:28) Enẹwutu, mí ma nọ sẹ̀n Jesu podọ mí masọ yise dọ ewọ wẹ yin Jiwheyẹwhe Ganhunupotọ lọ.