Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Hodo Apajlẹ Yise Yetọn Tọn

 WETA KO-NUKUNDOPO

E Diahi hẹ Obu po Ayihaawe Tintindo Po

E Diahi hẹ Obu po Ayihaawe Tintindo Po

1-3. Nujijọ tẹlẹ wẹ Pita mọ to gbèdopo, podọ etẹwẹ jọ to ozán lọ mẹ?

PITA to nukọn pọ́n tlintlin dile e to tọjihun kùn po huhlọn po to zánmẹ. Be hinhọ́n he mọ hlan e te to whèzẹtẹn-waji lọ dohia dọ ai ko jẹ hinhọ́n ji wẹ ya? Nẹgbé po abọ́ po to vivẹ́ ẹ, na e ko yí azẹ̀ do kùn tọjihun na gànhiho susu wutu. Jẹhọn sinsinyẹn he to oda etọn fúfú dopolọ wẹ zọ́n bọ Ohù Galili tọn do to adán ji. Podọ, agbówhẹn he to hihò do tọjihun whèhuhu tọn lọ go lẹ sọ to osin fúnfún do Pita go. Ṣogan, e zindonukọn nado to tọjihun lọ kùn.

2 Jẹnukọnna nujijọ enẹ, Pita po hagbẹ etọn lẹ po ko jo Jesu do agé ji. To gbenẹgbe, yé mọ bọ Jesu yí akla po whèvi vude po do na núdùdù gbẹtọ fọtọ́n susu he huvẹ to hùhù lẹ. Enẹwutu, gbẹtọ lọ lẹ jlo na yí Jesu do basi ahọlu, ṣigba e ma jlo na doalọ to tonudidọ mẹ. E sọ jlo na plọn devi etọn lẹ ma nado nọ tindo mahẹ to tonudidọ mẹ. Nado họ̀nna gbẹtọgun lọ, e dọna devi etọn lẹ nado biọ tọjihun mẹ bo dedo awà awetọ ohù lọ tọn ji bọ ewọ dedo osó ji edeṣo nado hodẹ̀.—Malku 6:35-45; hia Johanu 6:14-17.

3 To whenuena devi lẹ dedo to whèjai enẹ, osun ko wá aga; ṣigba todin e ko to doyi dẹẹdẹ to whèyihọ-waji. Ṣogan, yé ma tlẹ ko jẹ fide. Huhlọn he do yé te gọna nudidọ mapote jẹhọn po agbówhẹn lẹ po tọn zọ́n bọ e vẹawuna yé nado dọhodopọ. Podọ vlavo, Pita na ko to nulẹnpọn do nujijọ delẹ ji.

To owhe awe gblamẹ, Pita plọn nususu sọn Jesu dè, ṣigba nususu gbẹ́ pò bọ e dona plọn

4. Naegbọn Pita do yin apajlẹ ayidego tọn de na mí?

4 Nuhe ji Pita sọgan lẹnnupọndo lẹ ma whè! E ko hugan owhe awe he e yọ́n Jesu Nazalẹti tọn, podọ nususu ko jọ sọn whenẹnu. E ko plọn nususu, ṣigba nususu gbẹ́ pò bọ e dona plọn. Apajlẹ ayidego tọn de wẹ ewọ yin na mí, na ojlo he e tindo nado plọnnu  bo diahi hẹ aliglọnnamẹnu delẹ taidi ayihaawe tintindo po obu po wutu. Mì gbọ mí ni pọ́n nuhewutu mí do dọ mọ.

“Mí Ko Mọ Mẹsia Lọ”!

5, 6. Gbẹzan wunmẹ tẹwẹ Pita zan?

5 Pita ma na wọn azán he gbè e dukosọ hẹ Jesu whla tintan pọ́n gbede. Nọvisunnu etọn Andle wẹ hẹn owẹ̀n vonọtaun lọ wá na ẹn dọmọ: “Mí ko mọ Mẹsia lọ.” Hogbe enẹlẹ zọ́n bọ gbẹzan Pita tọn jẹ didiọ ji. Bẹsọn gbenẹgbe, aliho he mẹ e nọ pọ́n nulẹ hlan te ma nasọ yin dopolọ ba.—Joh. 1:41.

6 Pita nọ nọ̀ Kapẹlnaumi, yèdọ tòdaho de to agewaji otọ̀ he nọ yin yiylọdọ Ohù Galili tọn. Ewọ po Andle po nọ wà azọ́n whèhuhu tọn to pọmẹ hẹ Jakọbu po Johanu po he yin visunnu Zebede tọn lẹ. Gbọnvona asi Pita tọn, asi-nọ̀ etọn po nọvisunnu etọn Andle po sọ nọ nọ̀ owhé etọn gbè. Matin ayihaawe, e na biọ azọ́n sinsinyẹn wiwà, huhlọn po azọ́nyinyọnẹn po to whèhutọ de si nado penukundo whédo mọnkọtọn go. Mí sọgan yí nukun homẹ tọn do pọ́n azọ́n sinsinyẹn he whèhutọ lọ lẹ nọ wà na gànhiho susu to ozán mẹ, yé nọ nọ̀ tọjihun voovo awe mẹ bo nọ dlan odọ̀-gbó yetọn do otọ̀ mẹ bosọ nọ dọ̀n ẹn nado bẹ whèvi depope he odọ̀ lọ wle do ohún mẹ. Mí sọgan sọ lẹnnupọndo azọ́n sinsinyẹn he yé nọ wà to okle ji nado didẹ whèvi lẹ bo sà yé, podọ nado vọ́ odọ̀ lọ lẹ tọ̀ bo klọ́ yé.

7. Etẹwẹ Pita sè gando Jesu go, podọ naegbọn enẹ do yin linlin ojlofọndotenamẹ tọn?

7 Biblu dọna mí dọ Andle yin dopo to devi Johanu Baptizitọ tọn lẹ mẹ. Pita na ko nọ yí sọwhiwhe do dotoaina linlin he nọvisunnu etọn nọ na gando owẹ̀n Johanu tọn go. To gbèdopo, Andle mọ bọ Johanu dlẹnalọdo Jesu Nazalẹti tọn bo dọmọ: “Mì pọ́n, Lẹngbọvu Jiwheyẹwhe tọn lọ!” To afọdopolọji, Andle lẹzun hodotọ Jesu tọn bo yí jejejininọ do hẹn linlin ojlofọndotenamẹ tọn lọ wá na Pita dọ, Mẹsia lọ ko wá! (Joh. 1:35-40) To atẹṣiṣi Edẹni mẹ tọn godo to nudi owhe 4 000 jẹnukọn, Jehovah Jiwheyẹwhe dopagbe dọ omẹ vonọtaun de na wá nado hẹn todido nujọnu tọn wá na gbẹtọvi lẹ. (Gẹn. 3:15) Andle ko mọ Whlẹngántọ ehe, yèdọ Mẹsia lọ! Pita lọsu yawu yì Jesu dè.

8. Etẹwẹ yinkọ he Jesu na Pita zẹẹmẹdo, podọ naegbọn mẹdelẹ nọ mọhodọdo yinkọ lọ go?

8 Kakajẹ azán enẹ gbè, Simọni wẹ Pita nọ yin yiylọdọ. Ṣigba, Jesu pọ́n ẹn bo dọmọ: “‘Hiẹ wẹ Simọni visunnu Johanu tọn; hiẹ na nọ yin yiylọdọ Kefa’ (he lẹdogbedevomẹ etọn zẹẹmẹdo Pita).” (Joh. 1:42) “Kefa” yin yinkọ paa de he zẹẹmẹdo “zannu” kavi “osé.” E họnwun dọ, dọdai dọ wẹ Jesu te. E mọ hlan nukọn dọ Pita na wá taidi osé de, enẹ wẹ yindọ e na yin mẹhe go yè sọgan dejido, podọ e na yinuwado hodotọ Klisti tọn lẹ ji to aliho dagbe mẹ bo hẹn yé lodo. Be  nukun he Pita nọ yí do pọ́n ede niyẹn ya? E na vẹawu dọ ni yinmọ. Delẹ to mẹhe nọ hia owe Wẹndagbe tọn lẹ to egbehe lẹ mẹ ma tlẹ nọ pọ́n Pita hlan taidi mẹhe lodo di osé, mẹhe go yè sọgan dejido. Mẹdelẹ dọ dọ e taidi dọ nuyiwa etọn he yin nùdego to Biblu mẹ lẹ dohia dọ ewọ ma yin nujikudonọ bosọ nọ yawu diọ linlẹn.

9. Etẹwẹ Jehovah po Visunnu etọn po nọ mọ, podọ naegbọn hiẹ lẹndọ mí dona dejido pọndohlan yetọn go?

9 Nugbo wẹ dọ Pita tindo awugbopo etọn lẹ. Podọ Jesu yọ́n yé ganji. Ṣigba taidi Otọ́ etọn Jehovah, Jesu nọ mọ onú dagbe he gbẹtọ lẹ nọ wà to whepoponu. Jesu mọdọ Pita tindo nugopipe susu, podọ Ewọ jlo na gọalọna ẹn nado hẹn jẹhẹnu dagbe enẹlẹ pọnte dogọ. Mọdopolọ to egbehe, Jehovah po Visunnu etọn po nọ mọ dagbe he mí nọ wà lẹ. E sọgan vẹawuna mí nado lẹndọ yé na mọ onú dagbe susu he mí nọ wà lẹ. Ṣigba, mí dona dejido pọndohlan yetọn go bo dohia dọ mí ko wleawufo nado yin pinplọn bosọ yin anadena taidi Pita.—Hia 1 Johanu 3:19, 20.

“A Dibu Ba Blo”

10. Nuwiwa Jesu tọn tẹlẹ wẹ Pita na ko yin kunnudetọ na, ṣigba etẹ kọ̀n wẹ e lẹkọ do?

10 E yọnbasi dọ Pita hodo Jesu na ojlẹ de to gbejizọnlin yẹwhehodidọ tọn he bọdego whenu. Gbọnmọ dali, e sọgan ko mọ whenue Jesu wà azọ́njiawu etọn tintan bo diọ osin zun ovẹn to hùnwhẹ alọwle tọn de tẹnmẹ to Kana. Nuhe tlẹ sọ yin nujọnu hugan wẹ yindọ, e sè owẹ̀n ayidego tọn he gọ́ na todido he Jesu lá gando Ahọluduta Jiwheyẹwhe tọn go. Etomọṣo, e jo Jesu do bo lẹkọyi azọ́n whèhuhu tọn etọn kọ̀n. Ṣigba to osun delẹ godo, Pita po Jesu po sọ wá pé whladopo dogọ, podọ to ojlẹ ehe mẹ, Jesu basi oylọna ẹn nado hodo e na pipotọ gbẹzan etọn tọn.

11, 12. (a) Etẹwẹ yin kọdetọn lọ to whenue Pita wazọ́n na ozán dopo blebu? (b) Dile Pita to todoaina nuplọnmẹ Jesu tọn, kanbiọ tẹlẹ wẹ sọgan ko fọ́n to ayiha etọn mẹ?

11 Pita ko wazọ́n na ozán dopo blebu to ovọ́ mẹ. Ewọ po whèhutọ-gbẹ́ etọn lẹ po yìn odọ̀ yetọn lẹ whlasusu bo ma mọ nude wle. Pita na ko yí numimọ po azọ́nyinyọnẹn etọn lẹpo po zan nado dín whèvi. E na ko yìn odọ̀ gbọn ofi voovo he e lẹndọ whèvi lẹ sọgan tin te to otọ̀ lọ mẹ. Matin ayihaawe, taidi whèhutọ susu, e na ko nọ jlo e to whedelẹnu nado mọ whèvi he to yìyì to pọmẹ to otọ̀ glọ lẹ bo deanana odọ̀ etọn lẹ nado wle yé. Ṣigba, nulinlẹnpọn do onú mọnkọtọn lẹ ji na yidogọna flumẹjijẹ etọn poun wẹ. Pita ma to whèvi hù nado deayidai gba; azọ́n he e nọ wà nado penukundo whédo etọn go niyẹn. Yigodo yinukọn, e gọwá agé asigbá-alọgbá. Etomọṣo, e dona klọ́ odọ̀ etọn lẹ. Podọ, ehe wà wẹ e te klinkán-klinkán to whenuena Jesu dọnsẹpọ ẹ.

Agbọ́ ma nọ pé Pita gbede nado dotoaina Jesu dile ewọ nọ to zẹẹmẹ basi do hosọ tangan yẹwhehodidọ etọn tọn ji, yèdọ Ahọluduta Jiwheyẹwhe tọn

 12 Gbẹtọgun de lẹdo Jesu bo to todoaina ẹn po sọwhiwhe po. Na gbẹtọ lọ lẹ sù taun wutu, Jesu biọ tọjihun Pita tọn mẹ bo biọ to e si nado sẹ̀ ohún lọ sọn agé vude. To whenue Jesu tin to otọ̀ lọ ji, ogbè etọn sọgan yin sisè po awubibọ po bọ e jẹ nuplọn gbẹtọgun lọ ji. Pita dotoai po sọwhiwhe po dile mẹhe to agé ji lẹ lọsu wà do. Agbọ́ ma nọ pé e gbede nado dotoaina Jesu dile ewọ nọ to zẹẹmẹ basi do hosọ tangan yẹwhehodidọ etọn tọn ji, yèdọ Ahọluduta Jiwheyẹwhe tọn. Pita sọgan ko lẹndọ lẹblanulọkẹyi daho de wẹ e na yin nado gọalọna Klisti lọ to owẹ̀n todido tọn ehe lilá mẹ! Ṣigba, be e sọgbe hẹ lẹnpọn dagbe nado wàmọ ya? Nawẹ Pita na penukundo whẹndo etọn go gbọn? Vlavo Pita na ko vọ́ nulẹnpọn do tukla he e jẹ to ozán lọ blebu mẹ bo ma mọ whèvi depope wle ji.—Luku 5:1-3.

13, 14. Azọ́njiawu tẹwẹ Jesu wà na Pita, podọ nawẹ Pita yinuwa gbọn?

13 To whenuena Jesu dọho pó, e dọna Pita dọmọ: “Sẹ̀ ohún lọ yì fihe siso, na mì ni yìn odọ̀ mìtọn lẹ nado wle whèvi.” Pita tindo ayihaawe gando nuhe Jesu dọ go. E dọmọ: “Nuplọnmẹtọ, ozán lọ pete wẹ mí ko yí do jẹtukla bo ma wle nudepope, ṣigba na hiẹ degbe wutu, yẹn na yìn odọ̀ lọ lẹ.” Pita ṣẹṣẹ klọ odọ̀ etọn lẹ fó wẹ. E họnwun dọ, onú godo tọn he Pita na ko jlo nado wà wẹ nado gọ̀ odọ̀ lọ lẹ yìn do otọ̀ mẹ, titengbe todin he whèvi lẹ na ko dùnú fó bo gbàdo! Etomọṣo e setonu, vlavo bo mìalọ na hagbẹ etọn he tin to tọjihun devo mẹ lẹ nado hodo yé.—Luku 5:4, 5.

14 To whenue Pita jẹ odọ̀ lọ lẹ dọ̀n ji, e paṣa ẹ nado mọdọ yé pẹ̀n. E ma sọgan yise. E dohuhlọn dogọ, podọ to ojlẹ vude godo, e mọ whèvi susugege lẹ to linlọ́n to odọ̀ mẹ! Po ayimajai po, e mìalọ hlan mẹhe tin to tọjihun awetọ mẹ lẹ nado wá gọalọ. To whenue yé wá, e họnwun na yé dọ ohún dopo ma sọgan hẹn whèvi lọ lẹpo. Yé bẹ whèvi gọ́ ohún awe lọ lẹpo, ganṣo e gbẹsọ pò janwẹ, ohún lọ lẹ tlẹ jẹ sisiọ ji. Avò daho vò Pita. E ko mọ bọ Klisti wà azọ́njiawu pọ́n, ṣigba ehe gando Pita lọsu go tlọlọ! Etẹ nkọ, dawe ehe sọgan wà azọ́njiawu bọ whèvi lẹ na biọ odọ̀ mẹ! Obu jẹ Pita ji. E jẹklo bo dọmọ: “Yì sọn dè e, Oklunọ, na ylandonọ de wẹ yẹn.” Nawẹ e sọgan pegan nado dogbẹ́ hẹ Omẹ lọ he mọ huhlọn yí sọn Jiwheyẹwhe dè nado wà azọ́njiawu mọnkọtọn lẹ gbọn?—Hia Luku 5:6-9.

“Oklunọ . . . ylandonọ de wẹ yẹn”

15. Nawẹ Jesu plọn Pita dọ ayihaawe he e tindo po obu he di e te po ma sọgbe gbọn?

15 Po homẹdagbe po, Jesu dọmọ: “A dibu ba blo. Na sọn din sọyi, hiẹ na nọ wle gbẹtọ lẹ gbẹ̀te.” (Luku 5:10) Ojlẹ lọ ma die nado  tindo ayihaawe kavi dibu gba. Pita ma dona ko tindo ayihaawe gando lehe e na penukundo nuhudo whẹndo etọn tọn lẹ go do, mọjanwẹ e ma dona dibuna awugbopo po nugomape etọn titi lẹ nado dọyẹwheho lọ po do niyẹn. Jesu tindo azọ́n daho de nado wà, enẹ wẹ lizọnyizọn he na diọ whenuho gbẹtọvi lẹ tọn. Podọ Jiwheyẹwhe he Pita nọ sẹ̀n nọ ‘jonamẹ susugege.’ (Isa. 55:7) Jehovah na penukundo nuhudo Pita po whẹndo etọn tọn po go to agbasa-liho podọ to gbigbọ-liho.—Mat. 6:33.

16. Nawẹ Pita, Jakọbu po Johanu po yinuwa gbọn to whenue Jesu basi oylọna yé, podọ naegbọn enẹ do yin nudide dagbe hugan he yé sọgan basi?

16 Pita yinuwa to niyaniya mẹ dile Jakọbu po Johanu po wà do. “Yé hẹn tọjihun lọ gọwá agé, bo jo onú lẹpo do bosọ hodo e.” (Luku 5:11) Pita tindo yise to Jesu po Omẹ lọ he do e hlan po mẹ. Nudide  dagbe hugan he e sọgan basi niyẹn. Mọdopolọ to egbehe, Klistiani lẹ lọsu nọ do yise hia bo nọ duto ayihaawe tintindo po obu po ji nado wà sinsẹ̀nzọn hlan Jiwheyẹwhe. Mẹhe dejido Jehovah go to aliho mọnkọtọn mẹ lẹ ma nọ duwinyan gbede.—Ps. 22:4, 5.

“Naegbọn A Do Jẹ Ayihaawe Tindo Ji?”

17. Etẹlẹ wẹ Pita sọgan ko flin gando owhe awe he e yizan hẹ Jesu lẹ go?

17 To nudi owhe awe to whenue Pita dukosọ hẹ Jesu whla tintan godo wẹ e kùnhún pé yujẹhọn gbọn Ohù Galili tọn ji to zánmẹ dile mí donù e go do to bẹjẹeji weta ehe tọn. Nugbo wẹ dọ mí ma sọgan yọ́n nuhe ji e na ko to nulẹnpọn do to ojlẹ enẹ mẹ, ṣigba ayihaawe matin dọ nuhe ji e na ko to nulẹnpọn do lẹ ma whè! Di apajlẹ, Jesu ko hẹnazọ̀ngbọna asi-nọ̀ Pita tọn. E ko dọ Yẹwhehodidọ Osó ji tọn etọn. E ko dohia whlasusu gbọn nuplọnmẹ po azọ́njiawu etọn lẹ po dali dọ ewọ wẹ Mẹdide Jehovah tọn, yèdọ Mẹsia lọ. Dile osun lẹ to yìyì, awugbopo Pita tọn lẹ, taidi ayilinlẹn etọn nado nọ joawuna obu po ayihaawe tintindo po ko depò jẹ obá de mẹ. Jesu tlẹ ko de Pita taidi dopo to apọsteli 12 lẹ mẹ! Etomọṣo, Pita ma ko duto obu po ayihaawe tintindo po ji mlẹnmlẹn, dile e na wá mọ do to madẹnmẹ.

18, 19. (a) Etẹwẹ Pita mọ to Ohù Galili tọn ji? (b) Nawẹ Jesu kẹalọyi obiọ Pita tọn gbọn?

18 To mimá ẹnẹtọ ozán lọ tọn mẹ, enẹ wẹ to gblagbla ogàn 3 zánmẹ tọn jẹ zánfinfọ́n, Pita wlekli to ajiji mẹ bo doalọtena húnkùnkùn. Nude to tẹnsẹ to agbówhẹn lẹ ji to nukọn etọn! Be hinhọ́n osun tọn wẹ to sisẹ́ to agbówhẹn lẹ ji ya? E ma sọgan yinmọ, na nulọ jlọ ṣite wutu. Gbẹtọ wẹ! Na nugbo tọn, gbẹtọ de wẹ podọ e to zọnlinzin gbọn osin ji! Mẹlọ to dindọnsẹpọ, podọ e taidi dọ e jlo na zẹ̀ yé go. Obu daho jẹ devi lẹ ji bọ yé lẹndọ odlọ de wẹ. Todin mẹlọ dọmọ: “Mì gboadọ, yẹn wẹ; mì dibu blo.” Etẹ nkọ, Jesu wẹ!—Mat. 14:25-27.

19 Pita gblọn dọmọ: “Oklunọ, eyin hiẹ wẹ, degbena mi nado gbọn osin ji wá dè we.” (Mat. 14:28) E yinuwa po adọgbigbo po to tintan whenu. Azọ́njiawu vonọtaun ehe whàn Pita sọmọ bọ e jlo na hẹn yise etọn lodo dogọ. E jlo na tindo mahẹ to nujijọ lọ mẹ. Po homẹdagbe po, Jesu basi oylọna ẹn nado wá ewọ dè. Pita jẹte sọn tọjihun lọ mẹ bo ze afọ do ohù lọ ji. Yí nukun homẹ tọn do pọ́n numọtolanmẹ Pita tọn to whenue afọ etọn nọte to osin nukunta bọ e ṣite to osin ji. Awú na ko ji i tlala dile e zinzọnlin jei Jesu dè. Ṣigba, e ma dẹn bọ numọtolanmẹ devo fọ́n to ahun etọn mẹ.Hia Matiu 14:29.

“To whenuena e pọ́n yujẹhọn lọ, obu di i”

20. (a) Etẹwẹ fẹayihasẹna Pita, podọ etẹwẹ wá yin kọdetọn lọ? (b) Nuplọnmẹ titengbe tẹ ji wẹ Jesu zinnudo na Pita?

20 Pita dona ze ayidonugo etọn do Jesu ji. Jesu wẹ hẹn Pita dote  to agbówhẹn lẹ ji gbọn huhlọn Jehovah tọn gblamẹ. Podọ yise he Pita tindo to Jesu mẹ wẹ zọ́n bọ e do wàmọ. Ṣigba, nude wá fẹayihasẹna Pita. Kandai lọ dọmọ: “To whenuena e pọ́n yujẹhọn lọ, obu di i.” Pita yìnnukunpọn agbówhẹn he to hihò do tọjihun lọ go bo to osin fúnfún do jẹhọn mẹ lẹ bọ obu jẹ e ji. E sọgan ko lẹndọ emi na siọ bo na kútọ. Dile obu etọn to susudeji, yise etọn jẹ didepo ji. Dawe enẹ he Jesu do yinkọ na dọ Osé to whenue e mọdọ yise etọn na wá lodo gligli, jẹ sisiọ ji na yise etọn depò wutu. Pita yọ́n sìnlin ganji, ṣigba to ojlẹ enẹ mẹ e ma ganjẹ nugopipe enẹ go. E dawhá dọmọ: “Oklunọ whlẹn mi!” Jesu hẹn alọ go na ẹn bo dọ̀n ẹn wá aga. Enẹgodo, dile yé gbẹ́ pò to osin ji, Jesu zinnudo nuplọnmẹ titengbe de ji na Pita dọmọ: “Hiẹ yise pẹvinọ, naegbọn a do jẹ ayihaawe tindo ji?”—Mat. 14:30, 31.

21. Naegbọn ayihaawe tintindo ylan taun, podọ nawẹ mí sọgan hoavùn sọta ẹ gbọn?

21 Lehe hodidọ lọ dọ Pita “jẹ ayihaawe tindo ji” sọgbe do sọ! Ayihaawe tintindo sọgan hẹnnugble taun. Eyin mí joawuna ẹn, e sọgan hù yise mítọn sudo bo hẹn mí gbọjọ to gbigbọ-liho. Mí dona hoavùn sinsinyẹn sọta ẹ! Gbọnna? Gbọn ayidonugo nina nuhe sọgbe lẹ dali. Eyin mí nọ lẹnnupọndo nuhe nọ dobuna mí, nuhe nọ hẹn mí gbọjọ lẹ gọna nuhe nọ fẹayihasẹna mí sọn Jehovah po Visunnu etọn po ji lẹ ji, ayihaawe tintindo na jideji to ahun mítọn mẹ dogọ. Ṣigba, eyin mí nọ lẹnnupọndo Jehovah po Visunnu etọn po, nuhe yé ko wà, nuhe yé to wiwà, po nuhe yé na wà to sọgodo na mẹhe yiwanna yé lẹ po ji, mí na de ayihaawe depope he na fọ́n to ahun mítọn mẹ sẹ̀.

22. Naegbọn mí dona hodo apajlẹ yise Pita tọn?

22 Dile Pita hodo Jesu lẹkọyi biọ tọjihun lọ mẹ, yujẹhọn lọ doalọte. Ohù Galili tọn nabọẹ whii. Pita po devi hatọ etọn lẹ po dọmọ: “Na nugbo tọn, Visunnu Jiwheyẹwhe tọn wẹ hiẹ.” (Mat. 14:33) Ahun Pita tọn na ko gọ́ na pẹdido to tọjihun lọ mẹ dile ai jẹ hinhọ́n ji. Obu po ayihaawe he e tindo po busẹ. Nugbo wẹ dọ, onú susu gbẹ́ pò bọ e na wà whẹpo do lẹzun Klistiani he yise etọn lodo gligli di osé dile Jesu mọ hlan do. Ṣigba, e magbe nado to vivẹnudo zọnmii. Be hiẹ tindo gbemima mọnkọtọn ya? Matin ayihaawe, hiẹ na mọdọ mí dona hodo apajlẹ yise Pita tọn.