Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Hodo Apajlẹ Yise Yetọn Tọn

 WETA AWE

E “Zinzọnlin hẹ Jiwheyẹwhe” Nugbo Lọ

E “Zinzọnlin hẹ Jiwheyẹwhe” Nugbo Lọ

1, 2. Azọ́n titengbe tẹwẹ Noa po whẹndo etọn po to wiwà, podọ avùnnukundiọsọmẹnu tẹlẹ wẹ yé pehẹ?

NOA nọte vude nado dlẹn. Yí nukun homẹ tọn do pọ́n ẹn dile e sinai do atin daho he yin pipà de ji, bo yí whenu vude zan nado gbọjẹ bosọ to aki daho he yin gigla dote lọ pọ́n. Osẹ̀n vonọtaun he na yin sisá do aki lọ to wánlùn; podọ azọ́nwanu lẹ to núdọ. To fihe Noa sinai te, e sọgan mọ visunnu etọn lẹ to azọ́nwa klinkán-klinkán to adà voovo aki daho lọ tọn lẹ go. E ko yì owhe susu todin he asi yiwanna etọn, visunnu etọn lẹ, po asi yetọn lẹ po to azọ́nwa hẹ ẹ to azọ́n titengbe ehe kọ̀n. Yé ko hẹn azọ́n lọ yinukọn taun, ṣigba azọ́n susu gbẹ́ pò bọ yé na wà!

2 Gbẹtọ he nọ nọ̀ lẹdo lọ mẹ lẹ nọ pọ́n whẹndo lọ blebu hlan taidi mẹhe hùn tadu lẹ. Dile azọ́n aki lọ bibasi tọn to nukọnzindo, mọ wẹ gbẹtọ lẹ to yé ṣanko po linlẹn lọ po dọ singigọ de ma sọgan và aigba lọ blebu sudo do niyẹn. Yé lẹndọ nugbajẹmẹji he go Noa nọ to avase na yé gando lọ yin hopàdọ kavi hójijlẹ de poun! Yé mọdọ ewọ to gbẹzan etọn po whẹndo etọn blebu po tọn hẹngu nado doafọna yanwle de he taidi nulunu. Ṣigba, nukun he gbọnvo pete wẹ Jehovah, yèdọ Jiwheyẹwhe Noa tọn nọ yí do pọ́n ẹn.

3. Linlẹn tẹ mẹ wẹ Noa zinzọnlin hẹ Jiwheyẹwhe te?

3 Ohó Jiwheyẹwhe tọn dọmọ: “Noa sọ zinzọnlin hẹ Jiwheyẹwhe” nugbo lọ. (Hia Gẹnẹsisi 6:9.) Etẹwẹ enẹ zẹẹmẹdo? Enẹ ma dohia dọ Jiwheyẹwhe wá aigba ji, kavi dọ Noa yì olọn mẹ gba. Kakatimọ, Noa yiwanna Jiwheyẹwhe etọn bosọ setonuna ẹn sọmọ bọ e sọgan yin didọ dọ ewọ po Jehovah po zinzọnlin dopọ taidi họntọn. To owhe fọtọ́n susu godo, Biblu dọ gando Noa go dọmọ: “Gbọn yise [etọn] dali, e gblewhẹdo aihọn lọ.” (Heb. 11:7) Nawẹ e wà ehe gbọn? Etẹwẹ mí sọgan plọn sọn apajlẹ yise etọn tọn mẹ to egbehe?

Dawe Madoblọnọ de to Aihọn Ylankan de Mẹ

4, 5. To azán Noa tọn gbè, nawẹ ninọmẹ aihọn lọ tọn ylan deji gbọn?

4 Noa nọgbẹ̀ to aihọn he fọ́n bo to yinylan deji de mẹ. Aihọn lọ ko ylan to azán tọgbo etọn Enọku tọn gbè, yèdọ dawe dodonọ devo he zinzọnlin hẹ Jiwheyẹwhe. Enọku dọ dọdai dọ azán whẹdida tọn de  na wá mẹhe ma yọ́n Jiwheyẹwhe to aihọn lọ mẹ lẹ ji. To whenue e jẹ azán Noa tọn gbè, walọ ylankan ko jideji taun. Na nugbo tọn, aigba lọ ko gble to pọndohlan Jehovah tọn mẹ, na e gọ́ na danuwiwa wutu. (Gẹn. 5:22; 6:11; Juda 14, 15) Etẹwẹ zọ́n bọ ninọmẹ lọ do ylan sọmọ?

5 Nujijọ ylankan de wá aimẹ to visunnu gbigbọmẹ tọn Jiwheyẹwhe tọn lẹ ṣẹnṣẹn, yèdọ angẹli lẹ. Dopo to yé mẹ ṣiatẹ sọta Jehovah bo lẹzun Satani Lẹgba, na e dolalo dokọna Jiwheyẹwhe bosọ klọ Adam po Evi po nado waylando wutu. To azán Noa tọn gbè, angẹli devo lẹ lọsu ṣiatẹ sọta gandudu dodo Jehovah tọn. Yé jo azọ́ntẹn he Jiwheyẹwhe na yé to olọn mẹ do, bo wá aigba ji bo ze agbasa gbẹtọvi tọn do, bosọ dà yọnnu whanpẹnọ lẹ. Angẹli goyitọ po atẹṣitọ enẹlẹ po tindo nuyiwadomẹji ylankan do gbẹtọvi lẹ ji.—Gẹn. 6:1, 2; Juda 6, 7.

6. Nuyiwadomẹji tẹwẹ Nẹfilimi lẹ tindo do aihọn lọ ji, podọ etẹwẹ Jehovah magbe nado wà?

6 Humọ, to whenue angẹli he ze agbasa gbẹtọvi tọn do enẹlẹ dà yọnnu lẹ, yé ji visunnu asuka he tọ́nalùn lẹ. Biblu ylọ yé dọ Nẹfilimi lẹ, ehe zẹẹmẹdo “Mẹzejaitọ lẹ.” Nẹfilimi danuwatọ enẹlẹ yidogọna danuwiwa to aihọn lọ mẹ. Abajọ Mẹdatọ lọ do mọdọ “kanyinylan gbẹtọ tọn sù gbau to aigba mẹ, podọ ayilinlẹn ayiha etọn mẹ tọn lẹpo oylan dodo wẹ to whepoponu.” Jehovah magbe nado và titonu ylankan enẹ sudo to owhe 120 godo.—Hia Gẹnẹsisi 6:3-5.

7. Avùnnukundiọsọmẹnu tẹwẹ Noa po asi etọn po pehẹ nado basi hihọ́na visunnu yetọn lẹ sọn nuyiwadomẹji ylankan lẹ si?

7 Yí nukun homẹ tọn do pọ́n lehe e na ko vẹawu nado penukundo whẹndo de go to aihọn mọnkọtọn mẹ do sọ! Etomọṣo, Noa wàmọ po kọdetọn dagbe po. E dà asi dagbe de. To whenue Noa tindo owhe 500 godo wẹ asi etọn ji visunnu atọ̀n yetọn lẹ, yèdọ Ṣẹm, Ham  po Jafẹti po. * To pọmẹ, yé dona basi hihọ́na visunnu yetọn lẹ sọn nuyiwadomẹji ylankan he tin to lẹdo yetọn mẹ lẹ si. To paa mẹ, visunnu jọja lẹ nọ tindo ojlo sinsinyẹn na ‘omẹ hlọnhlọnnọ lẹ’ po “sunnu he diyin lẹ” po, podọ ovi lọ lẹ na ko nọ tindo ojlo to Nẹfilimi lẹ mẹ. E na ko vẹawuna Noa po asi etọn po nado basi hihọ́na visunnu yetọn lẹ sọn nuyiwahẹmẹ agọ̀ asuka enẹlẹ tọn si mlẹnmlẹn, ṣigba yé penugo nado plọn yé nugbo lọ gando Jehovah Jiwheyẹwhe go, yèdọ mẹhe gbẹwanna kanyinylan wunmẹ lẹpo. Yé dona gọalọna visunnu yetọn lẹ nado yọnẹn dọ homẹ Jehovah tọn ma hùn do aihọn danuwiwa po atẹṣiṣi po tọn enẹ go.—Gẹn. 6:6.

Noa po asi etọn po dona basi hihọ́na ovi yetọn lẹ sọn nuyiwadomẹji ylankan lẹ si

8. To egbehe, nawẹ mẹjitọ nuyọnẹntọ lẹ sọgan hodo apajlẹ Noa po asi etọn po tọn gbọn?

8 To egbehe, mẹjitọ lẹ sọgan mọnukunnujẹ nuhe Noa po asi etọn po pehẹ mẹ ganji. Aihọn egbezangbe tọn lọsu gọ́ na danuwiwa po atẹṣiṣi po. Pipli jọja danuwatọ lẹ tọn nọ gọ́ tòdaho lẹ mẹ. Ayidedai he yin awuwlena na ovi pẹvi lẹ tlẹ sọ nọ bẹ danuwiwa hẹn. Mẹjitọ he yọnnuin lẹ nọ wà nuhe go yé pé lẹpo nado basi hihọ́na ovi yetọn lẹ sọn nuyiwadomẹji mọnkọtọn lẹ si gbọn nupinplọn yé gando Jehovah, Jiwheyẹwhe jijọho tọn lọ go dali, yèdọ mẹhe na doalọtena danuwiwa wunmẹ lẹpo to gbèdopo. (Ps. 11:5; 37:10, 11) Mẹjitọ lẹ sọgan tindo kọdetọn dagbe, na Noa po asi etọn po tindo kọdetọn dagbe wutu. Visunnu yetọn lẹ whẹ́n bo wá lẹzun gbẹtọ-jọ-gbẹtọ lẹ, podọ yé dà yọnnu he tindo ojlo nado ze Jehovah, Jiwheyẹwhe nugbo lọ sinsẹ̀n do otẹn tintan mẹ to gbẹzan yetọn mẹ.

“Basi Aki De”

9, 10. (a) Gbedide Jehovah tọn tẹwẹ diọ gbẹzan Noa tọn? (b) Nudọnamẹ tẹwẹ Jehovah na Noa gando awusọhia po lẹndai aki lọ tọn po go?

9 To gbèdopo, gbẹzan Noa tọn diọ. Jehovah dọhona devizọnwatọ yiwanna ehe gando lẹndai Etọn nado hẹn aihọn whenẹnu tọn wá opodo go. Jiwheyẹwhe degbena Noa dọmọ: “Hiẹ ni yí atin gofa tọn do basi aki de.”—Gẹn. 6:14.

10 Aki ehe ma yin bato de, dile mẹdelẹ nọ lẹn do. E ma tindo ohúnkọ̀ po húnyonu po, podọ e masọ taidi tọjihun egbezangbe tọn lẹ. Ṣigba, e taidi apotin daho de. Jehovah na nudọnamẹ gigọ́ Noa gando lehe e na jlẹ aki lọ do, lehe e na yin bibasi do, gọna osẹ̀n vonọtaun he e na sá do homẹ po gbonu etọn po go. Podọ, e dọ lẹndai aki lọ tọn na Noa dọmọ: “Yẹn hẹn gigọ́ osin lẹ tọn lọ ja aigba ji . . . Onú he sọ tin to aigba ji lẹpo wẹ na kú.” Ṣigba, Jehovah basi alẹnu kavi gbekọndopọ ehe hẹ Noa dọmọ: “Hiẹ nasọ wá biọ aki lọ mẹ, hiẹ po visunnu towe lẹ po, po asi towe po, po asi visunnu towe lẹ tọn lẹ po hẹ we.” Noa sọ dona  hẹn wunmẹ kanlin lẹpo tọn sọha de wá aki lọ mẹ. Mẹhe tin to aki lọ mẹ lẹ kẹdẹ wẹ sọgan lùn Singigọ he ja lọ tọ́n!—Gẹn. 6:17-20.

Noa po whẹndo etọn po wazọ́n to pọmẹ nado hẹn gbedide Jiwheyẹwhe tọn lẹ di

11, 12. Azọ́n daho tẹwẹ Noa dona wà, podọ nawẹ e yinuwa gando avùnnukundiọsọmẹnu he azọ́n lọ bẹhẹn lẹ go gbọn?

11 Azọ́n daho de wẹ Noa dona wà. Aki lọ na klo taun, e na dite na nudi mẹtlu 133, bo gblo na nudi mẹtlu 22, bosọ yiaga na nudi mẹtlu 13. E klo hugan bato daho he yè yí atin do basi lẹpo etlẹ yin to ojlẹ mítọn mẹ. Be Noa tẹnpọn nado dapana azọ́ndenamẹ ehe, bo wule gando avùnnukundiọsọmẹnu he e na pehẹ lẹ go kavi de nudọnamẹ lọ lẹ pò nado sọgan hẹn azọ́n lọ bọawu na ede wẹ ya? Biblu na gblọndo dọmọ: “Mọ wẹ Noa sọ basi; kẹdẹdi enẹ he Jiwheyẹwhe ko degbena ẹn lẹpo; mọ wẹ e basi do.”—Gẹn. 6:22.

12 Azọ́n lọ yí owhe susu lẹ, vlavo owhe 40 jẹ 50. Yé dona họ́ atin lẹ, sẹtẹnna yé, zẹ̀ yé bo whlẹ́ yé bosọ whè ode do dego. Aki lọ dona yin petlezìn atọ̀nnọ, bo na tindo abò susu lẹ, gọna ohọ̀n dopo to adà etọn mẹ. E họnwun dọ fleṣe lẹ yin bibasi do aki lọ go to aga, podọ họta etọn fọ́n to ṣẹnṣẹn bọ tónu họta lọ tọn lẹ wá odò na e nido sọgan nọ kọ̀n osin.—Gẹn. 6:14-16.

13. Adà azọ́ndenamẹ Noa tọn tẹwẹ na ko bẹ avùnnukundiọsọmẹnu hẹn hugan aki lọ bibasi, podọ nawẹ gbẹtọ lẹ yinuwa gbọn?

13 Dile owhe lẹ to yìyì, awusọhia aki lọ tọn jẹ wunhọ́n ji, podọ homẹ Noa tọn dona ko hùn nado mọ godonọnamẹ whẹndo etọn tọn! Ṣigba, adà azọ́ndenamẹ etọn tọn devo tlẹ sọ bẹ avùnnukundiọsọmẹnu hẹn hugan aki lọ bibasi. Biblu dọna mí dọ Noa yin “yẹwhehodọtọ dodo tọn.” (Hia 2 Pita 2:5.) Enẹwutu, e yí adọgbigbo do yinuwa taidi nukọntọ bo na avase gbẹtọ ylankan he ma to ojlo Jiwheyẹwhe tọn wà enẹlẹ gando vasudo he ja lọ go. Nawẹ gbẹtọ lọ lẹ yinuwa gbọn? To nukọn mẹ, Jesu Klisti flin ojlẹ enẹ bo dọ gandego dọ gbẹtọ enẹlẹ “ma doayi e go.” E dọ dọ yé hẹn alọnu yetọn ján to nuwiwa egbesọ tọn lẹ mẹ, enẹ wẹ, dùdù, nùnù po alọwiwle po, podọ yé ma na ayidonugo avase Noa tọn. (Mat. 24:37-39) Matin ayihaawe, susu yetọn lẹ na ko ṣàn ewọ po whẹndo etọn po kò, podọ mẹdelẹ sọgan ko vannukundo e bo diọnukunsọ ẹ po kanyinylan po. Yé tlẹ sọgan ko tẹnpọn nado hẹn aki he yé to bibasi lọ gble.

Mahopọnna kunnudenu lẹ dọ Jiwheyẹwhe dona Noa, gbẹtọ lẹ ṣàn ẹn kò bo ma na ayidonugo owẹ̀n etọn

14. To egbehe, etẹwẹ whẹndo Klistiani tọn lẹ sọgan plọn sọn Noa po whẹndo etọn po dè?

14 Etomọṣo, Noa po whẹndo etọn po ma hònúpla. Yé zindonukọn to aki lọ bibasi mẹ, dile etlẹ yindọ gbẹtọ he ṣẹnṣẹn yé to gbẹnọ te lẹ nọ pọ́n azọ́n yetọn taidi nuvọ́, nuhe ma sọgbe kavi nulunu. To egbehe, whẹndo Klistiani tọn lẹ sọgan plọn nususu sọn yise Noa po whẹndo etọn po tọn mẹ. Na nugbo tọn, mí to gbẹnọ to ojlẹ he Biblu ylọdọ “azán godo tọn” titonu ehe tọn lẹ mẹ. (2 Tim. 3:1) Jesu dọ dọ ojlẹ mítọn na taidi ojlẹ he mẹ Noa basi aki te. Eyin aihọn lọ ma tindo ojlo to owẹ̀n Ahọluduta Jiwheyẹwhe tọn mẹ, bo ṣàn mí kò kavi  tlẹ dohomẹkẹn mí, mí dona flin apajlẹ Noa tọn. Mí ma yin omẹ tintan he pehẹ avùnnukundiọsọmẹnu mọnkọtọn lẹ.

‘Biọ Aki lọ Mẹ’

15. Mẹyiwanna Noa tọn tẹlẹ wẹ e hẹnbu to okú mẹ to whenue owhe etọn to sisẹpọ 600?

15 To owhe susu godo, azọ́n aki lọ bibasi tọn sẹpọ vivọnu. Dile owhe Noa tọn to sisẹpọ 600, e hẹn mẹyiwanna etọn delẹ bu to okú mẹ. Otọ́ etọn Lamẹki kú. * To owhe atọ́n godo, otọ́ Lamẹki tọn, yèdọ baba-daho Noa tọn Mẹtusela kú to whenue e tindo owhe 969, bo gbọnmọ dali yin mẹhe nọgbẹ̀ hugan to kandai Biblu tọn mẹ. (Gẹn. 5:27) Mẹtusela po Lamẹki po nọgbẹ̀ to ojlẹ dopolọ mẹ hẹ sunnu tintan lọ, Adam.

16, 17. (a) Owẹ̀n yọyọ tẹwẹ Noa mọyi to whenue e tindo owhe 600? (b) Nujijọ he ma sọgan yin winwọn tẹwẹ Noa po whẹndo etọn po tindo numimọ etọn?

16 To whenue Noa tindo owhe 600, e mọ owẹ̀n yọyọ de yí sọn Jehovah Jiwheyẹwhe dè dọmọ: “Hiẹ wá biọ aki [lọ] mẹ po whédo towe lẹpo po.” To ojlẹ dopolọ mẹ, Jiwheyẹwhe dọna Noa nado hẹn delẹ to kanlin wunmẹ lẹpo mẹ biọ aki lọ mẹ, yèdọ kanlin ṣinawe-ṣinawe sọn kanlin wiwe he sọgan yin yiyizan na avọ́sinsan lẹ mẹ, podọ kanlin he pò lẹ awe-awe.—Gẹn. 7:1-3.

 17 Nujijọ he yè ma sọgan wọn de wẹ enẹ na ko yin. Kanlin susu lẹ wá sọn awà voovo lẹ ji, delẹ to zọnlinzin, delẹ to zinzlọn, delẹ to sisá, delẹ to yede dọ̀n gbọn kọmẹ, dopodopo yetọn sọ tindo awusọhia po kiklo voovo po, podọ yé ma nọ yinuwa to aliho dopolọ mẹ. Noa ma jẹtukla vonọtaun nado hẹn kanlin gbémẹ tọn enẹ lẹpo wá aki lọ mẹ gba. Kandai lọ dọ dọ yé “wá Noa dè biọ aki mẹ.”—Gẹn. 7:9.

18, 19. (a) Nawẹ mí sọgan na gblọndo kanbiọ he mẹdelẹ nọ fọndote gando nujijọ he yin nùdego to kandai Noa tọn mẹ lẹ go tọn gbọn? (b) Nawẹ nuyọnẹn Jehovah tọn sọawuhia to aliho he mẹ e whlẹn kanlin lẹ te mẹ gbọn?

18 Mẹdelẹ sọgan kanse dọ: ‘Nawẹ onú mọnkọtọn sọgan jọ gbọn? Podọ nawẹ kanlin enẹ lẹpo sọgan nọpọ́ to nọtẹn kleun de mẹ gbọn?’ Lẹnnupọndo ehe ji: Be Didatọ wẹkẹ lọ tọn ma tindo huhlọn nado deanana kanlin he e dá lẹ, bo tlẹ yinuwado yé ji ma nado gbleawunamẹ eyin e biọ domọ wẹ ya? Flindọ Jehovah Jiwheyẹwhe wẹ dá kanlin lẹ. To owhe susu godo, e sọ má Ohù Vẹẹ do awe bosọ hẹn owhè nado nọte guun. Be ewọ ma sọgan basi nuhe kandai Noa tọn donù e go lẹ wẹ ya? Na nugbo tọn, e sọgan wàmọ, podọ nuhe e wà pẹpẹ niyẹn!

19 Nugbo wẹ dọ Jiwheyẹwhe sọgan ko de aliho devo nado whlẹn kanlin lẹ gán. Ṣigba, aliho nuyọnẹn tọn he mẹ e whlẹn kanlin lẹ te flin mí azọ́n he ewọ dena gbẹtọvi lẹ to dowhenu nado penukundo nutogbẹ̀ he tin to aigba ji lẹpo go. (Gẹn. 1:28) To egbehe, mẹjitọ susu wẹ nọ yí otàn Noa tọn zan nado plọnnu ovi yetọn lẹ dọ Jehovah nọ yí nukun họakuẹ do pọ́n gbẹtọvi lẹ po kanlin he e dá lẹ po.

20. Nawẹ Noa po whẹndo etọn po na ko hẹn alọnu yetọn ján to osẹ dopo he pò bọ Singigọ lọ nado bẹjẹeji gblamẹ gbọn?

20 Jehovah dọna Noa dọ osẹ dopo wẹ pò bọ Singigọ lọ na bẹjẹeji.  Alọnu whẹndo lọ tọn na ko ján taun to ojlẹ enẹ mẹ. Pọ́n azọ́n he dona yin wiwà whẹpo kanlin lẹ nido sọgan yì otẹn yetọn mẹ, bọ núdùdù kanlin lẹ tọn po whẹndo lọ tọn po gọna nutindo whẹndo lọ tọn lẹ nido sọgan yin tito do aki lọ mẹ. Asi Noa tọn gọna asi Ṣẹm, Ham po Jafẹti po tọn lẹ na ko hẹn alọnu yetọn ján nado wleawu nọtẹn dagbe de tọn na whẹndo lọ to aki lọ mẹ.

21, 22. (a) Naegbọn ojlo matindo gbẹtọ lẹ tọn to azán Noa tọn gbè ma dona paṣa mí? (b) Whetẹnu wẹ kọmẹnu Noa po whẹndo etọn po tọn lẹ doalọtena mẹṣanko yetọn?

21 Etẹwẹ dogbọn kọmẹnu yetọn lẹ dali? Yé “ma doayi e go,” etlẹ yin to whenue yé mọ kunnudenu lẹpo dọ Jehovah to didona Noa po vivẹnudido etọn lẹ po. E whè gbau, yé mọ whenue kanlin lẹ to aki lọ mẹ biọ. Ṣigba, ojlo matindo yetọn ma dona paṣa mí. Nudopolọ wẹ to jijọ to egbehe, na gbẹtọ lẹ ma nọ doayi kunnudenu susu he dohia dọ mí to gbẹnọ to azán godo tọn titonu ehe tọn mẹ lẹ go. Podọ dile apọsteli Pita dọ dọdai do, mẹṣankotọ lẹ na wá po mẹṣanko yetọn po bo na ṣàn mẹhe to tonusena avase Jiwheyẹwhe tọn lẹ kò. (Hia 2 Pita 3:3-6.) E họnwun dọ mọ wẹ gbẹtọ lẹ ṣàn Noa po whẹndo etọn po kò do.

22 Whetẹnu wẹ mẹṣanko lọ wá doalọte? Kandai lọ dọna mí dọ tlolo he Noa plan whẹndo etọn po kanlin lẹ po biọ aki lọ mẹ, “OKLUNỌ sọ suhọ̀n do e.” Eyin mẹṣankotọ lẹ sẹpọ finẹ, nuhe Jiwheyẹwhe wà enẹ na ko doalọtena mẹṣanko yetọn. Eyin e ma yinmọ, be jikun lọ na ko bọnùdo na yé to whenue e bẹjẹeji! Podọ e zindonukọn nado to jijà, bo to jijà kaka bọ osin gọ́ aigba lọ ji dile Jehovah dọ do.—Gẹn. 7:16-21.

23. (a) Nawẹ mí wagbọn do yọnẹn dọ homẹ Jehovah tọn ma hùn to whenue mẹylankan lẹ kú to azán Noa tọn gbè? (b) Naegbọn e do yin nuyọnẹnnu nado hodo apajlẹ yise Noa tọn to egbehe?

23 Be homẹ Jehovah tọn hùn dọ mẹylankan ehelẹ kú wẹ ya? Lala! (Ezek. 33:11) Kakatimọ, ewọ ko na yé dotẹnmẹ hundote lẹpo nado diọ aliho yetọn lẹ bo wà nuhe sọgbe. Be yé sọgan ko diọ ya? Gbẹzan Noa tọn gọalọna mí nado mọ gblọndo kanbiọ enẹ tọn. Noa dohia dọ e yọnbasi nado luntọ́n, na e zinzọnlin hẹ Jehovah, bosọ setonuna Jiwheyẹwhe etọn to nulẹpo mẹ. To linlẹn enẹ mẹ, yise etọn gblewhẹdo aihọn azán etọn gbè tọn; bo hùngona kanyinylan azán etọn gbè tọn. Yise etọn whlẹn ewọ po whẹndo etọn po gán. Eyin hiẹ hodo apajlẹ yise Noa tọn, a sọgan whlẹn dewe po mẹyiwanna towe lẹ po. Taidi Noa, hiẹ sọgan zinzọnlin hẹ Jehovah Jiwheyẹwhe taidi Họntọn towe. Podọ họntọnjiji mìtọn sọgan gbọṣi aimẹ kakadoi!

^ huk. 7 To ojlẹ enẹlẹ mẹ, gbẹtọ lẹ nọ nọgbẹ̀ na owhe susu hugan lehe mí nọ nọgbẹ̀ do to egbehe. Ehe sọgan ko yinmọ, na ojlẹ he mẹ yé nọgbẹ̀ te ma dẹn do whenue Adam po Evi po hẹn pipé bu wutu.

^ huk. 15 Lamẹki do yinkọ na visunnu etọn dọ Noa, ehe sọgan ko zẹẹmẹdo “Gbọjẹ” kavi “Homẹmiọn” bo dọ dọdai dọ Noa na yinuwa sọgbe hẹ yinkọ etọn gbọn alọgigọna gbẹtọvi lẹ nado mọ gbọjẹ sọn azọ́n sinsinyẹn wiwà to aigba he yin dẹ̀hodo lọ ji mẹ. (Gẹn. 5:28, 29) Lamẹki ma nọgbẹ̀ nado mọ hẹndi dọdai etọn tọn gba. Onọ̀ Noa tọn, nọvisunnu etọn lẹ po nọviyọnnu etọn lẹ po sọgan ko yin vivasudo to Singigọ lọ whenu.