Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Hodo Apajlẹ Yise Yetọn Tọn

 WETA ṢINAWE

E ‘to Whinwhẹ́n to Jehovah Nukọn’

E ‘to Whinwhẹ́n to Jehovah Nukọn’

1, 2. Ninọmẹ tẹ mẹ wẹ Samuẹli dọhona Islaelivi lẹ te, podọ naegbọn ewọ dona gọalọna yé nado lẹnvọjọ?

SAMUẸLI ko sẹ̀n taidi yẹwhegán podọ whẹdatọ na owhe susu. E basi oylọna akọta lọ nado pli to tòpẹvi Gilgali tọn mẹ. Todin, dawe nugbonọ ehe to nukunji pọ́n na gbẹtọgun lọ. Osun mai kavi juin tọn mẹ wẹ sọgbe hẹ sunzanhiawe egbezangbe tọn, podọ ojlẹ akúdido tọn ko sẹyì taun. Likun he tin to ogle lẹdo lọ tọn mẹ lẹ ko bia na gbingbẹ̀n. Gbẹtọgun lọ nabọẹ whii. Nawẹ Samuẹli sọgan jẹ ahun yetọn mẹ gbọn?

2 Gbẹtọ lọ lẹ ma yọ́n obá he mẹ ylando yetọn sinyẹn jẹ. Yé tẹkudeji dọ gbẹtọvi de ni duahọlu do emi ji. Yé ma yọ́n obá he mẹ yé ko do sisi matindo hia Jehovah Jiwheyẹwhe po yẹwhegán etọn po jẹ. Na taun tọn, Jehovah wẹ yé gbẹdai taidi Ahọlu yetọn! Nawẹ Samuẹli sọgan gọalọna yé nado lẹnvọjọ gbọn?

Mí sọgan plọn nususu sọn apajlẹ Samuẹli tọn to ovu whenu mẹ gando awuwiwlena yise to Jehovah mẹ mahopọnna nuyiwadomẹji ylankan lẹ go

3, 4. (a) Naegbọn Samuẹli do dọho gando ovu whenu etọn go? (b) Naegbọn apajlẹ yise Samuẹli tọn do yọ́n-na-yizan na mí to egbehe?

3 Samuẹli bẹ hodidọ jẹeji. E dọna gbẹtọgun lọ dọmọ: “Yẹn sọ yin yọnhonọ po ota owhànọ po.” Ota owhànọ etọn zọ́n bọ hodidọ etọn tindo huhlọn taun. Enẹgodo, e dọmọ: “Yẹn ko sọ to zọnlinzin to mì nukọn sọn ovu ṣie jẹ azán he gbè.” (1 Sam. 11:14, 15; 12:2) Dile etlẹ yindọ Samuẹli ko poyọnho, e ma wọn ovu whenu etọn. E gbẹ́ nọ flin jọja whenu etọn ganji. Nudide he ewọ basi to ojlẹ enẹlẹ mẹ dile e to whinwhẹ́n, ko gọalọna ẹn nado tindo yise bo ze ede jo na Jehovah Jiwheyẹwhe to gbẹzan etọn blebu mẹ.

4 Samuẹli dona wleawuna yise bo hẹn e go, na sọn ojlẹ de mẹ jẹ devo mẹ wẹ ewọ nọgbẹ̀ to mẹhe ma tindo yise bo masọ yin nugbonọ lẹ ṣẹnṣẹn. To egbehe, avùnnukundiọsọmẹnu wẹ e nọ yin na mílọsu nado wleawuna yise, na mí to gbẹnọ to aihọn he ma tindo yise bo  gblezọn de mẹ wutu. (Hia Luku 18:8.) Mì gbọ mí ni pọ́n nuhe mí sọgan plọn sọn apajlẹ Samuẹli tọn mẹ bẹsọn ovu whenu etọn.

‘Devizọnwiwa to Jehovah Nukọn Taidi Yọpọ De’

5, 6. Naegbọn mí sọgan dọ dọ ovu whenu Samuẹli tọn yin vonọtaun, ṣigba naegbọn mẹjitọ etọn lẹ kudeji dọ ewọ na yin nukunpedego?

5 Ovu whenu Samuẹli tọn yin vonọtaun. Na to whenue e tindo nudi owhe atọ̀n kavi humọ bọ onọ̀ etọn deanọ́ na ẹn godo, e jẹ sinsẹ̀nzọnwa ji to gòhọtúntún wiwe Jehovah tọn mẹ to Ṣilo, ehe dẹn na nudi kilomẹtlu 30 do owhé etọn gbè to Lama. Mẹjitọ etọn lẹ, Ẹlkana po Hanna po klan visunnu yetọn do wiwe nado wà sinsẹ̀nzọn vonọtaun de na Jehovah taidi Nazilinu de to gbẹzan etọn blebu mẹ. * Be ehe zẹẹmẹdo dọ mẹjitọ etọn lẹ gbẹwanna ẹn bo gbẹ́ ẹ dai wẹ ya?

6 Paali! Yé yọnẹn dọ ovi yetọn na yin nukunpedego to Ṣilo. Matin ayihaawe, Yẹwhenọ Daho Eli na hẹn ẹn diun dọ ewọ na yin nukunpedego, na Samuẹli nọ wazọ́n hẹ ẹ pẹkipẹki wutu. Humọ, yọnnu susu lẹ nọ gọalọ to azọ́n voovo lẹ mẹ to gòhọtúntún lọ mẹ, podọ e họnwun dọ yé nọ wazọ́n po titojininọ po.—Eks. 38:8; Whẹ. 11:34-40.

7, 8. (a) Nawẹ mẹjitọ Samuẹli tọn lẹ nọ na ẹn tuli to whemẹwhemẹ gbọn? (b) Etẹwẹ mẹjitọ lẹ sọgan plọn sọn apajlẹ mẹjitọ Samuẹli tọn lẹ tọn mẹ?

7 Humọ, Hanna po Elkana po ma wọn viplọnji yiwanna yetọn pọ́n gbede, mẹhe Jiwheyẹwhe na yé taidi gblọndo odẹ̀ Hanna tọn. Hanna biọ visunnu de Jiwheyẹwhe, bo dopà nado klan visunnu lọ do wiwe nado wà sinsẹ̀nzọn wiwe hlan Jiwheyẹwhe. Eyin Hanna dla Samuẹli pọ́n to whemẹwhemẹ, e nọ hẹn tewu yọyọ de he e basi wá na ẹn, na ewọ nido nọ do e nado wà sinsẹ̀nzọn to gòhọtúntún mẹ. Ayihaawe ma tin dọ ovivu lọ nọ yọ́n pinpẹn dlapọn enẹlẹ tọn taun. E họnwun dọ ewọ nọ duvivi tulinamẹ po anademẹ owanyinọ mẹjitọ etọn lẹ po tọn to whenue yé nọ flinnu in dọ lẹblanulọkẹyi de wẹ e tindo nado nọ sẹ̀n Jehovah to nọtẹn vonọtaun enẹ.

8 To egbehe, mẹjitọ lẹ sọgan plọn nususu sọn apajlẹ Hanna po Ẹlkana po tọn mẹ. Mẹjitọ lẹ nọ saba wà nuhe go yé pé lẹpo nado hẹn pekọ wá na nuhudo ovi yetọn lẹ tọn to agbasa-liho, ṣigba bo nọ dovọ́na nuhudo gbigbọmẹ tọn yetọn lẹ. Ṣigba, mẹjitọ Samuẹli tọn lẹ ze onú gbigbọmẹ tọn lẹ do otẹn tintan mẹ, podọ enẹ yinuwado visunnu yetọn ji, mẹhe whẹ́n bo wá lẹzun dawe vonọtaun de.—Hia Howhinwhẹn lẹ 22:6.

9, 10. (a) Basi zẹẹmẹ awusọhia gòhọtúntún lọ tọn po numọtolanmẹ jọja Samuẹli tọn gando nọtẹn wiwe enẹ go po tọn. (Sọ pọ́n nudọnamẹ odò tọn.) (b) Etẹwẹ azọngban Samuẹli tọn sọgan ko bẹhẹn, podọ nawẹ jọja lẹ sọgan hodo apajlẹ etọn to egbehe gbọn?

9 Mí sọgan yí nukun homẹ tọn do pọ́n visunnu lọ dile e to whinwhẹ́n  bo nọ yì disa to pópló he tin to lẹdo Ṣilo tọn mẹ lẹ ji. Dile e to tòpẹvi he to odò po agbàdo he sẹpọ lẹ po pọ́n, e sọgan ko nọ jaya bo nọ doawagun to whenue e mọ gòhọtúntún Jehovah tọn hlan. Na nugbo tọn, gòhọtúntún enẹ yin nọtẹn wiwe taun de. * Finẹ wẹ yin nọtẹn sinsẹ̀n-bibasi wiwe ṣeke Jehovah tọn to aihọn lọ blebu mẹ, podọ e yin gbigbá to nudi owhe 400 jẹnukọn to anademẹ Mose tọn glọ.

10 Jọja Samuẹli whẹ́n bo yiwanna sinsẹ̀nzọnwiwa to gòhọtúntún lọ mẹ. E wlan to nukọn mẹ dọmọ: “Samuẹli to devizọnwa to OKLUNỌ nukọn, yinyin yọpọ de, yè yí efọdi alavọ tọn de do blagbajana ẹn.” (1 Sam. 2:18) Tewu he ma tindo awà enẹ dohia dọ Samuẹli nọ gọalọna yẹwhenọ lẹ to gòhọtúntún lọ mẹ. Dile etlẹ yindọ Samuẹli ma yin dopo to yẹwhenọ lẹ mẹ, azọ́ndenamẹ etọn bẹ ohọ̀n he biọ awánu gòhọtúntún lọ tọn mẹ lẹ hùnhùn to afọnnu po alọgigọna Eli mẹhomẹ lọ po hẹn. Ṣigba, dile ewọ to vivi lẹblanulọkẹyi enẹ tọn dù, ninọmẹ de wá jẹ tuklado e ji. Nuhe ma sọgbe lẹ to jijọ to owhé Jehovah tọn gbè.

E Hẹn Wiwejininọ Etọn Go

11, 12. (a) Awugbopo titengbe tẹwẹ Họfini po Finehasi po dohia? (b) Ylanwiwa po nuhe ma sọgbe tẹlẹ po wẹ Họfini po Finehasi po to wiwà to gòhọtúntún lọ mẹ? (Sọ pọ́n nudọnamẹ odò tọn.)

11 To whenue Samuẹli gbẹ́ yin jọja de, e mọ ylanwiwa po nuhe ma sọgbe he to jijọ lẹ po. Eli tindo visunnu awe he nọ yin Họfini po Finehasi po. Kandai Samuẹli tọn dọmọ: “Visunnu Eli tọn lẹ yin visunnu Beliali tọn lẹ; yé ma yọ́n OKLUNỌ gba.” (1 Sam. 2:12) Linlẹn awe he tin to wefọ enẹ mẹ lẹ nọgodona ode awetọ. Họfini po Finehasi po yin “visunnu Beliali tọn lẹ,” ehe zẹẹmẹdo “visunnu nuvọ́nọ lẹ,” na yé ma tindo sisi na Jehovah wutu. Yé ma nọ ylọ nujinọtedo dodowiwa tọn etọn lẹ po nubiọtomẹsi etọn lẹ po dọ nude. Ehe zọ́n bọ yé wá tindo mahẹ to ylanwiwa devo lẹ mẹ.

12 Osẹ́n Jiwheyẹwhe tọn na nudọnamẹ tangan lẹ gando azọngban yẹwhenọ lẹ tọn po aliho he mẹ yé dona nọ basi avọ́sinsan lẹ to gòhọtúntún etọn mẹ te po go. Osẹ́n lọ bẹ anademẹ enẹlẹ hẹn, na whẹwhinwhẹ́n dagbe lẹ wutu. Avọ́sinsan voovo enẹlẹ nọtena awuwledainanu Jiwheyẹwhe tọn nado nọ jo ylando gbẹtọvi lẹ tọn na yé, na yé nido sọgan yin wiwe to nukun etọn mẹ bo jẹna dona po anademẹ etọn po. Ṣigba, Họfini  po Finehasi po nọ sisẹ́ yẹwhenọ hatọ yetọn lẹ nado yinuwa to aliho agọ̀ mẹ gando avọ́sinsan lẹ go. *

13, 14. (a) Nawẹ nuylankan he to jijọ to gòhọtúntún lọ mẹ na ko yinuwado gbẹtọ ahunjijlọnọ lẹ ji gbọn? (b) Nawẹ Eli gboawupo nado hẹn azọngban etọn taidi otọ́ podọ taidi yẹwhenọ daho di gbọn?

13 Yí nukun homẹ tọn do pọ́n Samuẹli dile e to nuhe ma sọgbe enẹlẹ mọ bọ nudepope ma yin wiwà nado jla ninọmẹ lọ do. E na ko nọ mọ gbẹtọ susu lẹ, yèdọ wamọnọ, whiwhẹnọ po ayimajainọ lẹ po he nọ wá gòhọtúntún wiwe lọ mẹ po todido lọ po nado yin homẹmiọnna bo yin hinhẹn lodo to gbigbọ-liho, ṣigba bọ yé nọ yin hinhẹn jẹflumẹ kavi yin winyando. Sọ pọ́n numọtolanmẹ he e nọ tindo to whenue e yọnẹn dọ Họfini po Finehasi po sọ nọ yí nukunpẹvi do pọ́n osẹ́n Jehovah tọn lẹ gando fẹnnuwiwa go, bo nọ zanhẹ delẹ to yọnnu he nọ wà sinsẹ̀nzọn to gòhọtúntún lọ mẹ lẹ mẹ. (1 Sam. 2:22) Vlavo e tindo todido dọ Eli na yí nude wà nado jla ninọmẹ lọ do.

Samuẹli sọgan ko jẹflumẹ taun to whenue e mọ nuylankan he visunnu Eli tọn lẹ to wiwà

14 Eli wẹ tin to otẹn dagbe mẹ hugan nado didẹ nuhahun he fọ́n bo to yinylan deji enẹ. Taidi yẹwhenọ daho, azọngban etọn wẹ nado deanana nulẹ to gòhọtúntún lọ mẹ. Taidi otọ́ de, azọngban etọn wẹ nado domẹplọnlọ visunnu etọn lẹ go. To popolẹpo mẹ, yé to awuhẹngblena yedelẹ podọ na mẹsusu lẹ to otò lọ mẹ. Ṣigba, Eli gboawupo nado hẹn azọngban etọn taidi otọ́ podọ taidi yẹwhenọ daho di. E gbẹnuna visunnu etọn lẹ to aliho mọmọ tọn mẹ. (Hia 1 Samuẹli 2:23-25.) Ṣigba, visunnu etọn lẹ tindo nuhudo mẹplọnlọ he sinyẹn humọ tọn. Ylando he jẹna okú wà wẹ yé te!

15. Owẹ̀n sinsinyẹn tẹwẹ Jehovah dohlan Eli, podọ nawẹ whẹndo Eli tọn yinuwa gando avase lọ go gbọn?

15 Ninọmẹ nulẹ tọn wá ylan sọmọ bọ Jehovah do yẹwhegán he yinkọ etọn ma yin yinyọnẹn de hlan Eli, yèdọ “omẹ Jiwheyẹwhe tọn de,” nado yì do owẹ̀n whẹdida tọn sinsinyẹn de na ẹn. Jehovah dọna Eli dọmọ: ‘Hiẹ gbògbéna visunnu towe lẹ hú mi.’ Jiwheyẹwhe dọ dọdai dọ visunnu ylankan Eli tọn lẹ na kú to azán dopolọ gbè bọ whẹndo Eli tọn na jiya taun podọ lẹblanulọkẹyi he yé tindo nado yin yẹwhenọ na yin yíyí sọn yé si. Be avase sinsinyẹn ehe whàn whẹndo enẹ nado basi vọjlado ya? Kandai lọ ma dọho gando vọjlado mọnkọtọn go.—1 Sam. 2:27–3:1.

16. (a) Etẹlẹ wẹ mí hia gando nukọnyiyi jọja Samuẹli tọn go? (b) Be nudọnamẹ enẹlẹ miọnhomẹna we ya? Basi zẹẹmẹ.

16 Nawẹ nuhe ma sọgbe ehe lẹpo yinuwa do Samuẹli ji gbọn? Mí hia nudagbe lẹ gando whinwhẹ́n po nukọnyiyi Samuẹli tọn po go sọn  fide jẹ fidevo to kandai he bẹ nujijọ ylankan hẹn ehe mẹ. Flindọ mí hia to 1 Samuẹli 2:18 mẹ dọ Samuẹli yí nugbonọ-yinyin do to “devizọnwa to OKLUNỌ nukọn, yinyin yọpọ de.” Etlẹ yin to ovu whenu, Samuẹli ze ede jo pete na sinsẹ̀nzọn Jiwheyẹwhe tọn. To wefọ 21 weta dopolọ tọn mẹ, mí hia nude he tlẹ sọ miọnhomẹna mẹ humọ dọmọ: ‘Ovi lọ Samuẹli sọ to whinwhẹ́n to Jehovah nukọn.’ Dile e to whinwhẹ́n, haṣinṣan etọn hẹ Otọ́ olọn mẹ tọn etọn to sinsinyẹn deji. Haṣinṣan pẹkipẹki de tintindo hẹ Jehovah wẹ hihọ́-basinamẹnu dagbe hugan he nọ gọalọnamẹ ma nado joawuna nuhe ma sọgbe wunmẹ depope.

17, 18. (a) Nawẹ jọja Klistiani lẹ sọgan hodo apajlẹ Samuẹli tọn to whenue mẹhe lẹdo yé lẹ to nuhe ma sọgbe wà gbọn? (b) Etẹwẹ dohia dọ Samuẹli basi dide nado setonuna Jehovah?

17 E na ko bọawuna Samuẹli nado lẹndọ eyin yẹwhenọ daho po ovi etọn lẹ po sọgan joawuna ylando, be emi lọsu sọgan wà nuhe jlo emi. Ṣigba, nuhe ma sọgbe he mẹdevo lẹ to wiwà gọna dehe mẹhe to otẹn aṣẹpipa tọn mẹ lẹ to wiwà, ma yin whẹjijọ nado waylando gba. To egbehe, jọja Klistiani susu wẹ nọ hodo apajlẹ Samuẹli tọn bo nọ ‘to whinwhẹ́n to Jehovah nukọn,’ etlẹ yin to whenue mẹhe lẹdo yé lẹ ma to nuhe sọgbe wà.

18 Etẹwẹ yin kọdetọn lọ to whenue Samuẹli basi dide nado setonuna Jehovah? Mí hia dọmọ: “Ovi lọ Samuẹli sọ to whinwhẹ́n, bosọ tin to nukundagbe mẹ to OKLUNỌ dè podọ to gbẹtọ lẹ dè ga.” (1 Sam. 2:26) Enẹwutu e whè gbau, mẹdelẹ yiwanna Samuẹli, yèdọ mẹhe linlẹn yetọn sọgbe lẹ. Jehovah lọsu yiwanna visunnu ehe, na nugbonọ-yinyin etọn wutu. Podọ na taun tọn, Samuẹli yọnẹn dọ Jiwheyẹwhe emitọn na yinuwa gando walọ ylankan he to yìyì to Ṣilo lẹ go, ṣigba e na ko nọ kanse ede dọ, whetẹnu wẹ ewọ na wàmọ? Kanbiọ mọnkọtọn mọ gblọndo to zánmẹ gbèdopo.

 “To Hodọ; Na Devi Towe to Sisè”

19, 20. (a) Dọ nuhe jọ do Samuẹli go to zánmẹ gbèdopo to gòhọtúntún lọ mẹ. (b) Nawẹ e yinuwa hẹ Eli gbọn? (c) Nawẹ Samuẹli wagbọn do yọ́n mẹhe to hodọna ẹn?

19 To afọnnu fuu wẹ, ṣigba zinvlu gbẹ́ do bọ miyọ́ngbán daho he tin to gòhọtúntún mẹ lọ gbẹ́ pò to titá. To ajiji mẹ, Samuẹli sè ogbè de he to yinkọ etọn ylọ. Ewọ lẹndọ Eli wẹ, yèdọ mẹhe ko poyọnho taun bo masọ nọ mọnú ganji. Samuẹli fọ́n bo “dowezun” yì dawe yọnhonọ lọ dè. Be hiẹ sọgan yí nukun homẹ do pọ́n jọja lọ dile ewọ to awuya nado yọ́n nuhe sin nuhudo Eli tindo ya? E jẹna ayidego nado yọnẹn dọ Samuẹli yí sisi po homẹdagbe po do yinuwa hẹ Eli. Mahopọnna nuṣiwa sinsinyẹn Eli tọn lẹpo, ewọ wẹ gbẹ́ yin yẹwhenọ daho Jehovah tọn.—1 Sam. 3:2-5.

20 Samuẹli fọ́n Eli bo dọmọ: “Yẹn tin tofi; na hiẹ to yiylọ mi.” Ṣigba, Eli gblọnna ẹn dọ emi ma ylọ ẹ gba, bo dọna ẹn nado lẹkọyi mlọnai. Nudopolọ sọ jọ whla awetọ podọ whla atọ̀ntọ! To godo mẹ, Eli doayi nuhe to jijọ go. E ko dẹn bọ Jehovah do numimọ de hia kavi do owẹ̀n dọdai tọn de hlan omẹ etọn lẹ, podọ e ma vẹawu nado yọ́n nuhewutu wẹ. Eli mọnukunnujẹemẹ dọ Jehovah wẹ to hodọ whladopo dogọ todin, na visunnu lọ! Enẹwutu, Eli dọna Samuẹli nado gọyì mlọnai bo na ẹn nudọnamẹ gando nuhe ewọ na dọ to whenue ogbè lọ na ylọ ẹ devo go. Samuẹli setonu. E ma dẹn bọ e sọ sè ogbè lọ he dọmọ: “Samuẹli, Samuẹli.” Visunnu lọ yigbe dọmọ: “To hodọ; na devi towe to sisè.”—1 Sam. 3:1, 5-10.

21. Nawẹ mí sọgan nọ dotoaina Jehovah gbọn to egbehe, podọ naegbọn e yọ́n dọ mí ni nọ wàmọ?

21 Todin, Jehovah wá tindo devizọnwatọ de to Ṣilo he nọ dotoaina ẹn. Podọ Samuẹli sọ dotoaina Jehovah to gbẹzan etọn lẹpo mẹ. Be hiẹ lọsu nọ wàmọ ya? Mí ma nọ donukun dọ ogbè vonọtaun de ni dọhona mí to zánmẹ. Ṣigba to linlẹn de mẹ, mí nọ sè ogbè Jiwheyẹwhe tọn to egbehe ga. Ewọ nọ dọhona mí gbọn Ohó etọn Biblu gblamẹ. Obá he mẹ mí dotoaina Jiwheyẹwhe bo setonuna ẹn jẹ, mọ wẹ yise mítọn na lodo do niyẹn. Mọdopolọ wẹ e yì do na Samuẹli.

Mahopọnna obu, Samuẹli dowẹn whẹdida Jehovah tọn na Eli po nugbonọ-yinyin po

22, 23. (a) Nawẹ owẹ̀n he Samuẹli dibu to tintan whenu nado do lọ wá mọ hẹndi gbọn? (b) Nawẹ Samuẹli fọ́n bo to awuwlena yinkọ dagbe taidi yẹwhegán nugbonọ de gbọn?

22 Nujijọ he wá aimẹ to ozán enẹ mẹ to Ṣilo lẹ yin nujijọ ayidego tọn de to gbẹzan Samuẹli tọn mẹ, na ewọ biọ haṣinṣan vonọtaun de mẹ hẹ Jehovah bo lẹzun yẹwhegán po hoyidọtọ etọn po. To tintan whenu, visunnu lọ dibu nado dowẹn Jehovah tọn na Eli, na nulila godo tọn ehe dohia dọ dọdai he yin didọ sọta whẹndo Eli tọn na mọ hẹndi to madẹnmẹ. Ṣigba, Samuẹli yí adọgbigbo do dowẹn lọ, podọ Eli gbọn whiwhẹ dali kẹalọyi whẹdida Jiwheyẹwhe tọn. E ma dẹn bọ nuhe Jehovah dọ lẹpo mọ hẹndi: Islaelivi lẹ yì nado funawhàn hẹ  Filistinu lẹ bọ Họfini po Finehasi po yin hùhù to azán dopolọ gbè, podọ Eli lọsu kú to whenue e sè dọ Filistinu lẹ yí Aki wiwe Jehovah tọn.—1 Sam. 3:10-18; 4:1-18.

23 Ṣigba, Samuẹli fọ́n bo to awuwlena yinkọ dagbe taidi yẹwhegán nugbonọ de. Kandai lọ dọmọ: “OKLUNỌ sọ tin po e po” bo yidogọ dọ Jehovah hẹn ẹn diun dọ dọdai he Samuẹli dọ lẹpo mọ hẹndi.—Hia 1 Samuẹli 3:19.

“Samuẹli Ylọ Hlan OKLUNỌ”

24. Dile ojlẹ to yìyì, nudide tẹwẹ Islaelivi lẹ basi, podọ naegbọn ehe do yin ylando sinsinyẹn de?

24 Be Islaelivi lẹ hodo apajlẹ Samuẹli tọn bo lẹzun gbẹtọ gbigbọnọ podọ nugbonọ ya? Lala. Dile ojlẹ to yìyì, yé basi nudide dọ emi ma jlo dọ yẹwhegán de poun ni nọ dawhẹna emi. Yé jlo dọ gbẹtọvi de ni duahọlu do emi ji dile e te do na akọta devo lẹ. Sọgbe hẹ gbedide Jehovah tọn, Samuẹli kẹalọyi obiọ yetọn. Ṣigba, e dona do obá he mẹ ylando Islaelivi lẹ tọn sinyẹn jẹ hia yé. Jehovah lọsu wẹ yé gbẹdai, e ma yin gbẹtọvi de poun! Enẹwutu, e basi oylọna yé nado pli to Gilgali.

Samuẹli hodẹ̀ po yise po bọ Jehovah na ẹn gblọndo gbọn jikun sinsinyẹn de dali

25, 26. To Gilgali, nawẹ Samuẹli yọnhonọ lọ wá gọalọna omẹ etọn lẹ nado mọ obá he mẹ yé waylando sọta Jehovah jẹ gbọn?

25 Mì gbọ mí ni yí nukun homẹ tọn do pọ́n whenue ewọ to hodọna Islaelivi lẹ to Gilgali. To finẹ, Samuẹli yọnhonọ lọ flinnu Islaelivi lẹ gando lehe ewọ yí nugbonọ-yinyin do hẹn tenọgligo do go. Enẹgodo, mí hia dọmọ: “Samuẹli ylọ hlan OKLUNỌ.” E biọ to Jehovah si nado do jikun sinsinyẹn de hlan.—1 Sam. 12:17, 18.

26 Be jikun sinsinyẹn de sọgan ja to akú whenu ya? Onú mọnkọ ma ko jọ pọ́n to whenẹnu! Eyin gbẹtọ lọ lẹ tlẹ tindo ayihaawe kavi ṣàn yẹwhegán lọ kò, e ma dẹn bọ ehe doalọte. To ajiji mẹ, agahomẹ sú. Jẹhọn to likun lẹ fúnfún to ogle lẹ mẹ. Hẹviosò to abì de bo to núdọ po zingidi po. Podọ jikun bẹjẹeji. Nawẹ gbẹtọ lọ lẹ yinuwa gbọn? Kandai lọ dọ dọ “gbẹtọ lẹpo sọ dibusi OKLUNỌ tlala po Samuẹli po.” Yé wá mọ obá he mẹ ylando yetọn sinyẹn jẹ to godo mẹ.—1 Sam. 12:18, 19.

27. Nawẹ Jehovah nọ suahọ mẹhe nọ hodo apajlẹ yise Samuẹli tọn lẹ gbọn?

27 Jehovah gọalọna Samuẹli to whenue e yinuwado ahun gbẹtọ atẹṣitọ enẹlẹ tọn ji. E gbọnmọ dali suahọ Samuẹli na yise he e tindo. Jehovah ko to alọgọna Samuẹli sọn ovu whenu etọn gbọ́n. Jehovah ma ko diọ kakajẹ egbé. E gbẹ́ nọ nọgodona mẹhe nọ hodo apajlẹ yise Samuẹli tọn lẹ.

^ huk. 5 Nazilinu lẹ nọ dopà de he nọ biọ dọ yé ma na nùahàn sinsinyẹn kavi pà oda yetọn. Suhugan yetọn nọ dopà enẹ nado yin Nazilinu na ojlẹ de, ṣigba vude to yé mẹ taidi Samsọni, Samuẹli po Johanu Baptizitọ po yin Nazilinu na gbẹzan yetọn blebu.

^ huk. 9 Gòhọtúntún lọ dite na nudi mẹtlu 13 bo gblo na nudi mẹtlu 4, yèdọ gòhọ daho de he yin bibasi po owhlẹ he yin gigla lẹ po. Ṣigba, e yin bibasi po nuyizan dagbe hugan lẹ po taidi kanlin-yú, avọ̀linlọn whanpẹnọ lẹ, owhlẹ akuẹgegenu tọn he yè sá fataka po sika po do lẹ. Gòhọtúntún lọ tin to awánu de mẹ, ehe dite na nudi mẹtlu 45 bo gblo na nudi mẹtlu 22, podọ e bẹ agbà daho he nọ yin yiyizan na avọ́sinsan de hẹn. Dile ojlẹ to yìyì, ohọ̀ devo lẹ wá yin gbigbá bọdo gòhọtúntún lọ go, na yẹwhenọ lẹ nido nọ yí yé zan. E taidi dọ ohọ̀ mọnkọtọn de mẹ wẹ Samuẹli nọ dọ́.

^ huk. 12 Kandai lọ donù apajlẹ sisi matindo tọn awe go. Tintan, Osẹ́n lọ donù adà avọ́nunina lọ tọn he yẹwhenọ lẹ sọgan dù lẹ go. (Deut. 18:3) Ṣigba, to gòhọtúntún lọ mẹ, yẹwhenọ ylankan enẹlẹ nọ yinuwa to aliho he gbọnvo pete mẹ. Yé nọ dọna devi yetọn lẹ nado yí ṣivi fẹ̀nnọ daho lẹ zan nado yí adà he yọ́n hugan lẹ sọn olàn he to adò ji lọ mẹ! Awetọ, eyin gbẹtọ lẹ hẹn avọ́nunina lẹ wá nado mẹ̀ to agbà lọ ji, yẹwhenọ ylankan enẹlẹ nọ do devi yetọn de hlan nado yì gbidikọna yé bo biọ olàn-mú to yé si to whenue ojó avọ́nunina lọ tọn ma ko yin nina hlan Jehovah.—Lev. 3:3-5; 1 Sam. 2:13-17.