Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Hodo Apajlẹ Yise Yetọn Tọn

 Hodidọ Jẹnnukọn

Wekanhlanmẹ de sọn Hagbẹ Anademẹtọ lọ Dè

Wekanhlanmẹ de sọn Hagbẹ Anademẹtọ lọ Dè

Hlan Mẹmẹsunnu po Mẹmẹyọnnu Vivẹ́ Mítọn lẹ Po:

Bẹsọn 1er janvier 2008, hosọ he fọnjlodotenamẹ de jẹ awusọhia ji to Atọ̀họ̀-Nuhihọ́ lọ Tọn zinjẹgbonu mẹlẹpo tọn mẹ, ehe nọ yin yiylọdọ “Hodo Apajlẹ Yise Yetọn Tọn.” Sọn whenẹnu, susu to hosọ ehelẹ mẹ yin zinzinjẹgbonu, podọ mí nọ duvivi yetọn taun!

Nawẹ hosọ ehe yinuwado mẹhe nọ hia ẹ lẹ ji gbọn? To whenue mẹmẹyọnnu de hia hosọ he dọhodo Malta ji godo, e wlan dọmọ: “N’konu to whenue n’hia otàn lọ, na aliho he mẹ n’nọ yinuwa te pẹpẹ niyẹn, n’nọ to tuklajẹ nado yí jonọ bo nọ hẹn alọnu ṣie ján sọmọ bọ n’nọ wọn nuhudo lọ nado nọte vude bo duvivi gbẹdido hẹ họntọn lẹ tọn.” To whenue jọja aflanmẹ yọnnu de hia otàn Ẹsteli tọn, e dọmọ: “N’mọdọ nusisọ́ po aṣọ́ he to zoji lẹ po nọ jlo jọja lẹ taun. Nugbo wẹ dọ mí dona doaṣọ́ ganji, etomọṣo mí ma dona zẹ̀pá.” E yidogọ dọmọ: “Mẹhe mí yin to homẹ wẹ nọ duahunmẹna Jehovah.” Podọ hosọ de he dọhodo apọsteli Pita ji whàn mẹmẹyọnnu de nado dọ po zohunhun po dọmọ: “To whenue n’to otàn lọ hia, e yinuwado ji e taun. E taidi dọ n’tin to nujijọ lọ tẹnmẹ wẹ nkọ! N’yí nukun homẹ tọn do mọ nuhe ma yin nùdego tlọlọ to kandai Biblu tọn mẹ lẹ.”

Wehiatọ ehelẹ, gọna mẹsusu devo lẹ he kanwehlan mí nado do pinpẹn-nutọn-yinyọnẹn yetọn hia na hosọ enẹlẹ, kọngbedopọ hẹ nuhe apọsteli Paulu kàn sọn ojlẹ dindẹn die dọmọ: “Nuhe ko yin kinkandai jẹnukọn lẹpo yin kinkandai na oplọn mítọn.” (Lom. 15:4) Na nugbo tọn, Jehovah hẹn ẹn diun dọ kandai otàn ehelẹ tọn tin to Biblu mẹ na mí nido sọgan plọn onú họakuẹ lẹ sọn yé mẹ. Mímẹpo wẹ sọgan plọnnu sọn yé mẹ, mahopọnna owhe he mí ko yizan to nugbo lọ mẹ.

Mí dotuhomẹna we nado yawu hia owe ehe dile e na yọnbasi do. Basi tito nado nọ yí i zan to sinsẹ̀n-bibasi whẹndo tọn whenu, yọpọvu lẹ na yiwanna ẹn taun! To whenue owe lọ na yin pinplọn to Biblu Pinplọn Agun tọn whenu, a dike osẹ dopo tata ni gbọ gowe blo! Yí whenu zan nado hia ẹ po sọwhiwhe po. Yí nukun homẹ tọn do pọ́n nujijọ lọ lẹ bo mọ dewe taidi mẹhe to mahẹ tindo to yé mẹ. Tẹnpọn nado tindo numọtolanmẹ dopolọ hẹ mẹhe yin nùdego to Biblu mẹ lọ lẹ, nado sọgan yí nukun homẹ tọn do mọ nuhe yé mọ lẹ. Yí aliho he mẹ yé yinuwa te to ninọmẹ lọ mẹ jlẹdo lehe hiẹ na ko yinuwa do go.

Homẹ mítọn hùn nado wleawu owe ehe tọn na we. Odẹ̀ mítọn wẹ yindọ owe ehe ni yin dona de na hiẹ po whẹndo towe po. Mí yiwanna we taun,

Hagbẹ Anademẹtọ Kunnudetọ Jehovah tọn lẹ tọn