Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Hodo Apajlẹ Yise Yetọn Tọn

Tadona

Tadona

“Nọ hodo apajlẹ mẹhe gbọn yise po sọwhiwhe po dali dugu opagbe lọ lẹ tọn lẹ.”—HEBLU LẸ 6:12.

1, 2. Naegbọn e do yin onú titengbe nado wleawuna yise todin? Na apajlẹ.

YISE. Jẹhẹnu dagbe de wẹ he nọ dọnmẹdogo taun. Etomọṣo, whedepopenu he mí hia kavi sè hogbe enẹ, mí dona nọ flin hogbe devo, enẹ wẹ “Niyaniya-yinyin!” Na eyin mí ma tindo yise, mí dona wleawuna ẹn to niyaniya mẹ. Podọ, eyin mí ko tindo yise, mí dona basi hihọ́na ẹn bo wlebòna ẹn to niyaniya mẹ. Etẹwutu?

2 Mí ni dọ dọ a to gbejizọnlinzin gbọn danfafa gblagada de ji, fie osin nọ hán te. A na tindo nuhudo osin tọn taun. Eyin a mọ osin vude, a dona basi hihọ́na ẹn na owhè nikaa hú i. Podọ a dona bà dehe na pé we kakajẹ vivọnu gbejizọnlin towe tọn do sinhẹnnú towe mẹ. To egbehe, mímẹpo wẹ to gbẹnọ to aihọn he ma tindo ojlo to sinsẹ̀n-bibasi hlan Jehovah mẹ, yèdọ aihọn de he mẹ yise nujọnu tọn he taidi osin hán te, bo sọgan yawu miọn eyin mí ma nọ basi hihọ́na ẹn bo nọ wleawuna ẹn dogọ. Mí tindo nuhudo etọn to niyaniya mẹ; na dile mí ma sọgan nọgbẹ̀ matin osin do, mọdopolọ wẹ mí ma sọgan tindo haṣinṣan dagbe de hẹ Jehovah matin yise do niyẹn.—Lom. 1:17.

3. Etẹwẹ Jehovah wleawuna nado gọalọna mí nado hẹn yise mítọn lodo, podọ onú awe tẹlẹ wẹ mí dona wà?

3 Jehovah yọ́n lehe mí tindo nuhudo yise tọn to niyaniya mẹ do, podọ e sọ yọnẹn dọ e nọ vẹawu nado wleawuna yise bo hẹn e go to egbehe. Matin ayihaawe, enẹ wẹ na ko zọ́n bọ ewọ do wleawu kandai apajlẹ mẹdelẹ tọn na mí nado hodo. Jehovah gbọdo apọsteli Paulu nado wlan dọmọ: “Nọ hodo apajlẹ mẹhe gbọn yise po sọwhiwhe po dali dugu opagbe lọ lẹ tọn lẹ.” (Heb. 6:12) Enẹwutu wẹ titobasinanu Jehovah tọn nọ na mí tuli nado dovivẹnu bo hodo apajlẹ sunnu po yọnnu nugbonọ lẹ po tọn, taidi mẹhe ji mí dọhodo to owe ehe mẹ lẹ. Ṣigba todin, etẹwẹ mí dona wà? Mì gbọ mí ni flin onú awe: (1) Mí dona to yise mítọn hẹn lodo zọnmii; (2) mí dona hẹn todido mítọn do ayiha mẹ gligli.

4. Nawẹ Satani do ede hia taidi kẹntọ yise tọn gbọn, ṣigba naegbọn mí ma dona dibu?

4 To yise towe hẹn lodo zọnmii. Yise tindo kẹntọ daho de, enẹ wẹ Satani. Ogán aihọn tọn ko hẹn titonu ehe zun danfafa de he mẹ e nọ vẹawuna mí nado hẹn yise go te. E tindo huhlọn hugan mí taun. Ṣigba, be mí dona dibu bo lẹndọ mí ma sọgan wleawuna yise bo hẹn e go wẹ ya? Gbede pọ́n! Jehovah wẹ yin Họntọn vivẹ́ mẹhe nọ dovivẹnu nado tindo yise nujọnu tọn lẹpo tọn. E hẹn mí deji dọ eyin Emi tin hẹ mí, mí sọgan diọnukunsọ Lẹgba bọ e na tlẹ họ̀n sọn mí dè! (Jak. 4:7) Mí nọ diọnukunsọ ẹ gbọn whenu yiyizan egbesọegbesọ nado hẹn yise mítọn lodo dogọ dali. Nawẹ mí sọgan wà ehe gbọn?

5. Nawẹ sunnu po yọnnu nugbonọ he go Biblu donù lẹ po wleawuna yise gbọn? Basi zẹẹmẹ.

 5 Dile mí ko mọ do, sunnu po yọnnu nugbonọ he go Biblu donù lẹ po ma yin jiji po yise po. Gbẹzan yetọn dohia dọ gbigbọ wiwe Jehovah tọn wẹ gọalọna yé nado wleawuna yise. (Gal. 5:22, 23) Yé hodẹ̀ nado mọ alọgọ yí podọ taidi kọdetọn de, Jehovah hẹn yise yetọn lodo vudevude. Mì gbọ mí ni hodo apajlẹ yetọn, bo ma wọn gbede blo dọ Jehovah nọ na gbigbọ wiwe etọn mẹhe nọ biọ ẹ bosọ nọ yinuwa to kọndopọ mẹ hẹ odẹ̀ yetọn lẹ. (Luku 11:13) Be nudevo gbẹ́ pò he mí sọgan wà dogọ ya?

6. Nawẹ mí sọgan mọaleyi to gigọ́ mẹ sọn kandai Biblu tọn lẹ pinplọn mẹ gbọn?

6 Apajlẹ mẹhe wleawuna yise ayidego tọn vude poun tọn wẹ mí gbadopọnna to owe ehe mẹ. Mẹsusu devo lẹ gbẹ́ pò he do yise mọnkọtọn hia! (Hia Heblu lẹ 11:32.) Mí yin tudohomẹna nado hia kandai nugbonọ ehelẹ tọn bo plọnnu sisosiso gando dopodopo yetọn go to oplọn mẹdetiti tọn mítọn whenu. Eyin mí nọ nọ̀ plaplaji nado hia kandai he gando mẹhe do yise hia enẹlẹ go, yise mítọn ma na lodo dile e jẹ do. Nado mọaleyi sọn nuhe hia mí te mẹ to gigọ́ mẹ, mí dona yí whenu zan nado gbadopọnna lẹdo wefọ lọ lẹ tọn po ninọmẹ he mẹ nujijọ lọ lẹ wá aimẹ te po kitokito. Eyin mí nọ flin to whepoponu dọ gbẹtọ mapenọ enẹlẹ tindo “numọtolanmẹ taidi mítọn lẹ nkọ,” yé na lẹzun omẹ nujọnu tọn lẹ na mí dogọ. (Jak. 5:17) Awuvẹmẹ na whàn mí nado doayi numọtolanmẹ he yé na ko tindo to whenue yé pannukọn avùnnukundiọsọmẹnu lẹ po nuhahun he nkọ mí nọ pehẹ lẹ po go.

7-9. (a) Numọtolanmẹ tẹwẹ sunnu po yọnnu po he do yise hia to hohowhenu delẹ na ko tindo nado sẹ̀n Jehovah dile mí to wiwà do to egbehe? (b) Naegbọn mí dona hẹn yise mítọn lodo gbọn nuyiwa mítọn lẹ gblamẹ?

7 Mí sọ nọ hẹn yise mítọn lodo gbọn nudide po nuyiwa mítọn lẹ po gblamẹ. To popolẹpo mẹ, “yise matin azọ́n lẹ yin oṣiọ.” (Jak. 2:26) Pọ́n lehe sunnu po yọnnu he go mí plọnnu gando lẹ po na ko jaya do sọ eyin azọ́n wunmẹ he Jehovah biọ to mí si nado wà to egbehe wẹ yin didena yé!

8 Di apajlẹ, etẹwẹ na ko yin numọtolanmẹ Ablaham tọn eyin Jehovah dọna ẹn nado sẹ̀n emi to sinsẹ̀n-basitọ hatọ he yin tito-basina ganji lẹ ṣẹnṣẹn to Plitẹnhọ Ahọluduta tọn whanpẹnọ lẹ mẹ podọ to plidopọ lẹ ji, fie opagbe he ewọ mọ “hlan olá” lẹ nọ yin hodọdeji bo nọ yin zẹẹmẹ basina to gigọ́ mẹ te, bọ e ma yin to agbà he yè yí zannu do basi lẹ kọ̀n? (Hia Heblu lẹ 11:13.) Podọ, etẹwẹ na yin numọtolanmẹ Elija tọn eyin Jehovah dọna ẹn nado yì dla gbẹtọ lẹ pọ́n to jijọho mẹ bo hẹn owẹ̀n homẹmiọnnamẹ po todido po tọn yì na yé, kakati nado hù yẹwhegán Baali tọn kanylantọ lẹ bosọ sẹ̀n Jehovah to gandudu ahọlu atẹṣitọ de tọn glọ? Nado dọ hójọhó, be homẹ sunnu po yọnnu nugbonọ he do yise hia to hohowhenu enẹlẹ po tọn ma na ko hùn nado sẹ̀n Jehovah dile mí to wiwà do to egbehe ya?

9 Enẹwutu, mì gbọ mí ni to yise mítọn hẹn lodo zọnmii gbọn nuyiwa mítọn lẹ gblamẹ. Dile mí to mọwà, mí na penugo nado hodo apajlẹ yise sunnu po yọnnu po he go Ohó gbọdo Jiwheyẹwhe  tọn donù lẹ tọn. Dile mí ko dọ do to Homẹbibiọ owe ehe tọn mẹ, mí na yiwanna yé taidi họntọn mítọn lẹ. Ṣigba to sọgodo, mí na nọpọ́ hẹ yé bọ yé na lẹzun họntọn jọ họntọn mítọn lẹ.

10. Ayajẹ nankọ wẹ mí na tindo to Paladisi mẹ?

10 Hẹn todido towe do ayiha mẹ gligli. Sunnu po yọnnu nugbonọ lẹ po nọ mọ huhlọn yí sọn todido he Jiwheyẹwhe zedonukọnna yé mẹ to whelẹponu. Etẹwẹ dogbọn hiẹ dali? Di apajlẹ, yí nukun homẹ tọn do pọ́n ayajẹ he mí na tindo nado mọ devizọnwatọ nugbonọ Jiwheyẹwhe tọn lẹ dile yé na lẹkọwa ogbẹ̀ to “fọnsọnku dodonọ lẹ” tọn whenu. (Hia Owalọ lẹ 24:15.) Etẹwẹ yin delẹ to kanbiọ he hiẹ na jlo nado kanse yé lẹ mẹ?

11, 12. To aihọn yọyọ lọ mẹ, kanbiọ tẹlẹ wẹ hiẹ sọgan kanse (a) Abẹli? (b) Noa? (c) Ablaham? (d) Luti? (e) Abigaili? (f) Ẹsteli?

11 To whenue hiẹ na mọ Abẹli, be hiẹ na yí jejejininọ do kàn omẹ alọpa he mẹjitọ etọn lẹ yin sè e ya? Kavi hiẹ sọgan kanse e dọmọ: “Be hiẹ dọhona kelubimi he ṣọ́ ali he biọ jipa Edẹni tọn mẹ lọ lẹ pọ́n ya? Be yé gblọnna we ya?” Etẹwẹ dogbọn Noa dali? Hiẹ sọgan kanse e dọmọ: “Be hiẹ nọ dibuna Nẹfilimi lẹ wẹ ya? Nawẹ hiẹ penukundo kanlin enẹ lẹpo go na owhe dopo to aki lọ mẹ gbọn?” Eyin a dukosọ hẹ Ablaham, a sọgan kanse e dọmọ: “Be a mọ Ṣẹm pọ́n ya? Mẹnu wẹ plọnnu we gando Jehovah go? Be e vẹawuna we nado tọ́n sọn Uli wẹ ya?”

12 Mọdopolọ, lẹnnupọndo kanbiọ delẹ ji he a sọgan jlo nado kanse yọnnu nugbonọ he na yin finfọnsọnku lẹ. “Luti, etẹwẹ whàn we nado lẹzun sinsẹ̀n-basitọ Jehovah tọn?” “Abigaili, be a dibu nado dọna Nabali dọ a gọalọna Davidi wẹ ya?” “Ẹsteli, etẹwẹ wá jọ do hiẹ po Mọldekai po go to whenue kandai mìtọn to Biblu mẹ wá vivọnu godo?”

13. (a) Kanbiọ tẹlẹ wẹ mẹhe na yin finfọnsọnku lẹ sọgan kanse we? (b) Numọtolanmẹ tẹwẹ a tindo gando todido lọ nado mọ sunnu po yọnnu hohowhenu tọn lẹ po to aihọn yọyọ lọ mẹ go?

13 Matin ayihaawe, sunnu po yọnnu nugbonọ enẹlẹ po sọgan tindo kanbiọ susu lẹ nado kanse hiẹ lọsu. Ojlofọndotenamẹnu wẹ e na yin nado dọhona yé gando nujijọ ayidego tọn he wá aimẹ to azán godo tọn lẹ mẹ po lehe Jehovah dona omẹ etọn lẹ to ojlẹ awusinyẹn tọn lẹ mẹ do po go. Matin ayihaawe, awú na ji yé nado yọ́n lehe Jehovah hẹn opagbe etọn lẹpo di do. To aihọn yọyọ lọ mẹ, mí ma na tindo nuhudo nado nọ yí nukun homẹ tọn do pọ́n devizọnwatọ nugbonọ Jiwheyẹwhe tọn he yin nùdego to Biblu mẹ lẹ ba. Yé na tin to finẹ po mí po to Paladisi mẹ! Enẹwutu, nọ wà nuhe go a pé lẹpo todin nado dike omẹ enẹlẹ ni lẹzun omẹ nujọnu tọn na we. To apajlẹ yise yetọn tọn hodo zọnmii. Odẹ̀ mítọn wẹ yindọ hiẹ ni mọ ayajẹ to Jehovah sinsẹ̀n mẹ to pọmẹ hẹ yé taidi họntọn vivẹ́ towe lẹ kakadoi podọ doidoi!