Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Hodo Apajlẹ Yise Yetọn Tọn

 WETA ATỌ̀N

“Otọ́ Mẹhe Tindo Yise” Lẹpo Tọn

“Otọ́ Mẹhe Tindo Yise” Lẹpo Tọn

1, 2. Nawẹ aihọn lọ diọ sọn azán Noa tọn gbè gbọn, podọ nawẹ enẹ yinuwado Ablaham ji gbọn?

ABLAHAM jlọkọ̀ pọ́n tẹmpli daho he tin to tòdaho etọn Uli mẹ. Gbẹtọ lẹ to fìnfàn to finẹ, podọ azọ̀ to tìtì sọn tẹmpli lọ mẹ. Yẹwhenọ lẹ wẹ to avọ́sinsan basi whladopo dogọ na yẹwhe osun tọn. Yí nukun homẹ tọn do pọ́n Ablaham dile e lẹ́ okọ̀ etọn dolá bo mimí ota, bosọ ylan nukun mẹ. Dile e wleali dedo whégbè gbọn gbẹtọgun he tin to aliji lẹ ṣẹnṣẹn, vlavo e sọgan ko to nulẹnpọn do boṣiọ-sinsẹ̀n he gbayipe to Uli ji. Lehe sinsẹ̀n lalo ko gbayipe to aihọn lọ mẹ sọn azán Noa tọn gbè do sọ!

2 Owhe awe poun to okú Noa tọn godo wẹ Ablaham yin jiji. To whenue Noa po whẹndo etọn po tọ́n sọn aki mẹ to Singigọ lọ godo, tọgbo enẹ basi avọ́sinsan na Jehovah Jiwheyẹwhe, podọ Jehovah hẹn aidowhẹdo de nado sọawuhia. (Gẹn. 8:20; 9:12-14) To ojlẹ lọ mẹ, sinsẹ̀n-bibasi wiwe ṣeke kẹdẹ wẹ tin to aihọn mẹ. Ṣigba, todin he whẹndo gbẹtọvi tọn aotọ bẹsọn Noa ji ko gbàpe aigba ji, mẹhe nọ basi sinsẹ̀n nugbo lẹ ma sọ sù sọmọ ba. Gbẹtọ lẹ nọ to yẹwhe lalo lẹ sẹ̀n to filẹpo. Podọ otọ́ Ablaham tọn, yèdọ Tela lọsu nọ sẹ̀n boṣiọ, bo sọgan ko nọ basi boṣiọ lẹ.—Jọṣ. 24:2.

Nawẹ Ablaham wagbọn do lẹzun apajlẹ yise tọn ayidego tọn de?

3. Dile owhe lẹ to yìyì, jẹhẹnu tẹwẹ Ablaham wleawuna, podọ etẹwẹ mí sọgan plọn sọn apajlẹ etọn mẹ?

3 Ṣigba, Ablaham gbọnvo taun. Dile owhe lẹ to yìyì, yise etọn zọ́n bọ ewọ gbọnvo na suhugan mẹhe lẹdo e lẹ tọn. Apọsteli Paulu tlẹ yin gbigbọdo to nukọn mẹ nado ylọ ẹ dọ “otọ́ mẹhe tindo yise” lẹpo tọn! (Hia Lomunu lẹ 4:11.) Mì gbọ mí ni pọ́n nuhe gọalọna Ablaham nado wleawuna yise mọnkọtọn. Ehe na gọalọna mílọsu nado plọn nususu gando lehe mí sọgan hẹn yise mítọn lodo dogọ do go.

E Sẹ̀n Jehovah to Singigọ lọ Godo

4, 5. Mẹnu wẹ sọgan ko plọnnu Ablaham gando Jehovah go, podọ naegbọn e do yọnbasi dọ ni yinmọ?

4 Nawẹ Ablaham wagbọn do plọnnu gando Jehovah Jiwheyẹwhe  go? Mí yọnẹn dọ Jehovah tindo devizọnwatọ nugbonọ lẹ to aigba ji to ojlẹ enẹlẹ mẹ. Ṣẹm yin dopo to yé mẹ. Dile etlẹ yindọ ewọ ma yin tintan to visunnu atọ̀n Noa tọn lẹ mẹ, ewọ wẹ nọ saba yin sislẹ jẹnukọn to kandai Biblu tọn mẹ. Whẹwhinwhẹ́n lọ sọgan ko yindọ Ṣẹm yin dawe de he tindo yise ayidego tọn. * Ojlẹ delẹ to Singigọ lọ godo, Noa dlẹnalọdo Jehovah taidi “Jiwheyẹwhe Ṣẹm tọn.” (Gẹn. 9:26) Ṣẹm tindo sisi na Jehovah podọ na sinsẹ̀n-bibasi wiwe ṣeke.

5 Be Ablaham yọ́n Ṣẹm ya? E yọnbasi dọ ni yinmọ. Yí nukun homẹ tọn do pọ́n Ablaham to whenue e tin to ovu. Lehe e na ko fọnjlodotena ẹn nado yọnẹn dọ emi tindo tọgbo de he pò togbẹ̀ bo yọ́n nuhe jọ to whenuho gbẹtọvi tọn mẹ sọn owhe 400 jẹnukọnna ojlẹ etọn do sọ! Ṣẹm mọ nuylankan he jọ to aihọn he jẹnukọnna Singigọ lọ mẹ lẹ, e sọ mọ Singigọ he klọ́ aigba wé lọ, bẹjẹeji akọta lẹ tọn dile gbẹtọvi lẹ to susu, podọ ojlẹ ylankan he mẹ Nimlọdi ṣiatẹ sọta Jiwheyẹwhe bo gbá Atọ̀họ̀ Babẹli tọn te. Dawe nugbonọ lọ, Ṣẹm ma tindo mahẹ to atẹṣiṣi lọ mẹ, enẹwutu, to whenue Jehovah wlu ogbè mẹhe to atọ̀họ̀ lọ gbá lẹ tọn, Ṣẹm po whẹndo etọn po gbẹ́ nọ do ogbè he gbẹtọ lẹ nọ do sọn dowhenu lọ, enẹ wẹ ogbè he Noa nọ do. Ablaham yin dopo to hagbẹ whẹndo Ṣẹm tọn mẹ. Enẹwutu, Ablaham na ko tindo sisi sisosiso na Ṣẹm dile e to whinwhẹ́n. Humọ, Ṣẹm po Ablaham po nọgbẹ̀ to ojlẹ dopolọ mẹ na owhe susu. Enẹwutu, Ṣẹm wẹ sọgan ko plọnnu Ablaham gando Jehovah go.

Ablaham gbẹ́ boṣiọ-sinsẹ̀n he gbayipe to Uli dai

6. (a) Nawẹ Ablaham dohia dọ emi mọnukunnujẹ nuhewutu Jiwheyẹwhe do hẹn Singigọ lọ wá mẹ ganji gbọn? (b) Gbẹzan wunmẹ tẹwẹ Ablaham po Sala po zan to pọmẹ?

6 Depope he whẹho lọ na ko yin, Ablaham mọnukunnujẹ nuhewutu Jehovah do hẹn Singigọ lọ wá mẹ ganji. Enẹwutu, e dovivẹnu nado zinzọnlin hẹ Jiwheyẹwhe dile Noa wà do. Nuhe zọ́n niyẹn bọ Ablaham gbẹ́ boṣiọ-sinsẹ̀n dai bo gbọnvo pete na gbẹtọ he nọ nọ̀ Uli lẹ, etlẹ yin hagbẹ whẹndo etọn tọn lẹ lọsu. Ṣigba, e wá mọ gbẹdohẹmẹtọ dagbe de to gbẹ̀mẹ. E wlealọ hẹ Sala, yèdọ yọnnu ayidego tọn de he yin yinyọnẹn na whanpẹ etọn podọ na yise dolido etọn to Jehovah mẹ. Dile etlẹ yindọ yé ma ko jivi, ayihaawe ma tin dọ asu po asi po enẹ mọ ayajẹ susu dile yé to Jehovah sẹ̀n to pọmẹ. Yé sọ plọn Lọti whẹ́n, yèdọ tavẹ-ylọvi Ablaham tọn, mẹhe mẹjitọ etọn lẹ ko kú.

7. Nawẹ hodotọ Jesu tọn lẹ dona hodo apajlẹ Ablaham tọn gbọn?

 7 Ablaham ma jo Jehovah do pọ́n gbede nado doafọna boṣiọ-sinsẹ̀n to Uli. Ewọ po Sala po jlo nado gbọnvo mlẹnmlẹn na kọmẹnu yetọn boṣiọ-sẹ̀ntọ enẹlẹ. Mílọsu dona wà nudopolọ, eyin mí na penugo nado wleawuna yise nujọnu tọn. Mí dona tindo ojlo nado gbọnvo na mẹhe lẹdo mí lẹ. Jesu dọ dọ hodotọ emitọn lẹ “ma yin apadewhe aihọn tọn,” podọ taidi kọdetọn de aihọn lọ na gbẹwanna yé. (Hia Johanu 15:19.) Eyin e wá jọ bọ hiẹ tindo numọtolanmẹ dọ hagbẹ whẹndo towe tọn lẹ kavi kọmẹnu towe lẹ gbẹ́ we dai, na a basi dide nado sẹ̀n Jehovah wutu, flindọ mẹdevo lẹ to pipehẹ ninọmẹ dopolọ. Na taun tọn, apajlẹ dagbe he Ablaham po Sala po zedai to Jiwheyẹwhe sinsẹ̀n po nugbonọ-yinyin po mẹ hodo wẹ a te.

“Tọ́nyi sọn Aigba Towe Ji”

8, 9. (a) Nuhe Ablaham ma donukun tẹwẹ e mọyi? (b) Podọ etẹwẹ Jehovah dọna Ablaham?

8 To gbèdopo, Ablaham mọ nuhe e ma donukun de. E mọ wẹndomẹ de yí sọn Jehovah Jiwheyẹwhe dè! Biblu ma na zẹẹmẹ gigọ́ gando aliho he mẹ ewọ mọ owẹ̀n lọ yí te go gba, ṣigba e dọ dọ “Jiwheyẹwhe gigonọ lọ” sọawuhia dawe nugbonọ enẹ. (Hia Owalọ lẹ 7:2, 3.) Vlavo Ablaham sọgan ko mọ gigo jiawu Nupojipetọ wẹkẹ lọ tọn to kleun mẹ gbọn angẹli afọzedaitọ etọn de dali. Mí sọgan yí nukun homẹ tọn do pọ́n lehe homẹ Ablaham tọn na ko hùn do nado mọ vogbingbọn daho he tin to Jiwheyẹwhe ogbẹ̀nọ lọ po boṣiọ he ma tindo gbọfufu he gbẹtọ lẹ nọ sẹ̀n to ojlẹ etọn mẹ lẹ po ṣẹnṣẹn.

9 Etẹwẹ Jehovah dọna Ablaham? E dọna ẹn dọmọ: “Tọ́nyi sọn aigba towe ji podọ sọn hẹnnumẹ towe lẹ mẹ bo yì aigba he yẹn na dohia we lọ ji.” Jehovah ma dọ aigba he ji Ablaham na yì lọ na ẹn, ṣigba e dọna ẹn poun dọ emi na do aigba lọ hia ẹ. Ṣigba jẹnukọn whẹ́, Ablaham dona jo otò etọn po hẹnnumẹ etọn lẹ po do. To aṣa mẹhe nọ nọ̀ lẹdo enẹ mẹ to hohowhenu lẹ tọn mẹ, haṣinṣan whẹndo tọn nọ sinyẹn taun. Gbẹtọ lẹ nọ pọ́n mẹhe jo hagbẹ whẹndo yetọn tọn lẹ do bo sẹtẹn yì fidindẹn de hlan taidi mẹhe yè hodẹ̀do, podọ na mẹdelẹ enẹ tlẹ sọ ylan hú nado kú.

10. Naegbọn e sọgan ko vẹawuna Ablaham po Sala po nado jo owhé yetọn do to Uli?

10 E na ko vẹawuna Ablaham nado jo gbẹzan vivomẹninọ tọn etọn do to Uli. Matin ayihaawe, Uli yin otò adọkunnọ de, fie gbẹtọ sù te taun. (Pọ́n apotin lọ “ Tòdaho He mẹ Ablaham po Sala po Tọ́n Sọn.”) Dodinnanu he yin bibasi to fie Uli nọ to hohowhenu dohia dọ ohọ̀ whanpẹnọ lẹ wẹ tin to finẹ dai, bọ delẹ tindo họ̀nù wiawe kavi humọ na hagbẹ whẹndo tọn lẹ po devizọnwatọ lẹ po, podọ kọho yetọn yin titlẹ́. To tòdaho enẹ mẹ, gbẹtọ lẹ tindo adàdo po awulẹpa he nọ tindo  pọmpi-sin lẹ po. Sọ flindọ Ablaham po Sala po masọ yin yọpọvu ba, ewọ na ko tindo nudi owhe 70 bọ Sala nudi owhe 60. Matin ayihaawe, ewọ na ko jlo dọ Sala ni zan gbẹzan vivomẹninọ tọn jẹ obá de mẹ, yèdọ nuhe asu dagbe de nọ jlo na asi etọn. Yí nukun homẹ tọn do pọ́n yé dile yé to hodọ gando azọ́ndenamẹ ehe go, podọ kanbiọ po ahunmẹdunamẹnu he enẹ sọgan ko fọndote to ayiha yetọn mẹ lẹ po. Homẹ Ablaham tọn na ko hùn taun to whenue Sala yigbe nado hodo e! Sala lọsu jlo nado jo gbẹzan vivomẹninọ tọn he mẹ yé tin te to owhé yetọn gbè do.

11, 12. (a) Etẹlẹ wẹ yé dona wleawuna podọ nudide tẹlẹ wẹ yé dona basi whẹpo do tọ́n sọn Uli? (b) Etẹwẹ mí sọgan dọ gando azán he gbè yé tọ́n sọn Uli go?

11 Nudide he Ablaham po Sala po basi enẹ zọ́n bọ yé tindo azọ́n susu nado wà. Yé dona basi tito yìyì yetọn tọn, podọ agbàn susu wẹ yé dona blá. Ṣigba, etẹlẹ wẹ yé na hẹn to gbejizọnlin yetọn yì fihe yé ma yọnẹn lọ whenu, podọ etẹlẹ wẹ yé na jodo? Ṣigba, nuhe sọ yin nujọnu hugan wẹ mẹhe yé na plan sọyi kavi mẹhe yé na jodo lẹ. Nudide tẹwẹ yé na basi gando Tela yọnhonọ lọ go? Yé basi dide nado plan ẹn sọyi bo penukundego dile yé na to yìyì. Ewọ lọsu sọgan ko yigbe po homẹhunhun po nado hodo yé, na kandai lọ dohia dọ taidi tọgbo de, ewọ plan whẹndo etọn tọ́n sọn Uli. Podọ e taidi dọ Tela wá jo boṣiọ-sinsẹ̀n do. Tavẹ-ylọvi Ablaham tọn Lọti sọ hodo yé to gbejizọnlin lọ whenu.—Gẹn. 11:31.

12 To godo mẹ, ojlẹ lọ sọ̀ nado yì. Pọ́n lehe gbejizọnlin basitọ lọ lẹ na ko pli dopọ to adó po osinwhín Uli tọn lẹ po godo do. Yé blá agbàn do kanklosọ́ po kẹtẹkẹtẹ lẹ po ji, yé pli lẹngbọ lẹ dopọ, whẹndo lọ po devizọnwatọ lẹ po ko wleawufo, podọ mẹlẹpo to jejeji nado jẹ ali ji. * Vlavo mẹlẹpo sọgan ko ze nukun yetọn do Ablaham ji, bo to tenọpọn dọ ni degbe dọ e ya. To godo mẹ, ojlẹ lọ sọ̀ na yé nado dedo bo tọ́n sọn Uli bo masọ lẹkọwa pọ́n gbede ba.

13. Nawẹ devizọnwatọ Jehovah tọn susu lẹ to egbehe nọ do gbigbọ Ablaham po Sala po tọn nkọ hia gbọn?

13 To egbehe, devizọnwatọ Jehovah tọn susu nọ basi dide nado sẹtẹn yì fie nuhudo wẹnlatọ Ahọluduta lọ tọn sù te lẹ. Mẹdevo lẹ nọ basi dide nado plọn jonọgbè nado gbloada na lizọnyizọn yetọn. Podọ mẹdelẹ nọ basi dide nado tẹ́n aliho kunnudide tọn he yé ma jẹakọ hẹ dai delẹ pọ́n. To paa mẹ, nudide enẹlẹ nọ biọ avọ́sinsan, yèdọ ojlo lọ nado yí gbẹzan vivomẹninọ tọn he agbasanu lẹ nọ namẹ do sanvọ́ jẹ obá de mẹ. Avọ́sinsan enẹlẹ jẹna pipà, podọ lehe yé taidi avọ́sinsan he Ablaham po Sala po basi do sọ! Eyin mí nọ do yise mọnkọtọn hia, mí sọgan kudeji dọ Jehovah na suahọ mí hugan nuhe mí na ẹn lẹ.  Ewọ ma nọ wọn nado suahọ mẹhe do yise hia lẹ pọ́n gbede. (Heb. 6:10; 11:6) Be e suahọ Ablaham na yise he e dohia ya?

Yé Dasá Tọ̀sisa Euflate

14, 15. Nawẹ gbejizọnlin whẹndo lọ tọn yì do sọn Uli jẹ Halani, podọ naegbọn Ablaham sọgan ko basi dide nado sawhé do Halani na ojlẹ de?

14 Dile whẹndo lọ to yìyì, gbejizọnlin lọ wá jẹ mimá yé ji vudevude. Mí sọgan yí nukun homẹ tọn do pọ́n Ablaham po Sala po dile yé nọ zọ̀n afọ na ojlẹ de bosọ nọ hẹ kẹtẹkẹtẹ lẹ ji na ojlẹ de, bọ hodọdopọ yetọn to yìyì to pọmẹ hẹ nudidọ ogàn pẹvipẹvi he yin sìnsìn dokọna kanlin lẹ tọn. Vudevude, mẹhe ma tlẹ tindo numimọ gbejizọnlin bibasi tọn to yé mẹ lẹ lọsu wá plọn nado nọ tlú agbàn yetọn lẹ bo nọ vọ́ yé blá, podọ nado nọ gọalọna Tela yọnhonọ lọ nado sinai ganji to kẹtẹkẹtẹ kavi kanklosọ́ de ji. Yé pànta agewaji-whèyihọ gbọn Tọ̀sisa Euflate tó. Yé zindonukọn to gbejizọnlin yetọn mẹ dile azán lẹ to yìyì bọ osẹ lẹ to yìyì.

15 To godo mẹ, to whenue yé ko basi nudi kilomẹtlu 960 godo, yé jẹ gòhọ Halani tọn lẹ kọ̀n, yèdọ tòdaho adọkunnọ de he tin to lẹdo de mẹ fie ali he ji ajọwatọ he wá sọn whèzẹtẹn po whèyihọ po lẹ nọ gbọn. Whẹndo lọ nọte bo sawhé do finẹ na ojlẹ de. Vlavo, na Tela masọ tindo huhlọn nado zindonukọn to gbejizọnlin lọ mẹ ba wutu.

16, 17. (a) Alẹnu tẹwẹ hẹn homẹ Ablaham tọn hùn? (b) Nawẹ Jehovah dona Ablaham to whenue e nọ Halani gbọn?

 16 To ojlẹ de godo, Tela kú to whenue e tindo owhe 205. (Gẹn. 11:32) Ablaham mọ homẹmiọnnamẹ yí to ojlẹ awubla tọn enẹ mẹ, na Jehovah dọho hẹ ẹ whladopo dogọ. E flinnu in gando anademẹ he e ko na ẹn to Uli lẹ go, bo na ẹn nudọnamẹ devo lẹ dogọ gando opagbe etọn lẹ go. Ablaham na wá lẹzun “akọta daho de,” podọ whẹndo aigba ji tọn lẹpo na yin didona gbọn ewọ gblamẹ. (Hia Gẹnẹsisi 12:2, 3.) Alẹnu he Jiwheyẹwhe basi hẹ Ablaham ehe hẹn homẹ etọn hùn, podọ ewọ mọnukunnujẹemẹ dọ ojlẹ lọ sọ̀ nado zindonukọn to gbejizọnlin lọ mẹ.

17 Ṣigba, to ojlẹ ehe mẹ, agbàn he yé na blá lẹ sọ sù dogọ na Jehovah dona Ablaham to whenue yé tin to Halani. Kandai Biblu tọn dọho gando “nubẹpli he yé ko bẹpli lẹpo, po gbẹtọ he yé ko tindo to Halani lẹpo po” go. (Gẹn. 12:5) Nado sọgan lẹzun akọta de, Ablaham na tindo nuhudo adọkunnu lẹ po devizọnwatọ lẹ po tọn, yèdọ whédo daho de. Jehovah ma nọ hẹn devizọnwatọ etọn lẹ jẹ adọkun to whelẹponu, ṣigba e nọ na yé nudepope he yé tindo nuhudo etọn nado sọgan wà ojlo etọn. Alọgọ enẹlẹ zọ́n bọ Ablaham po whẹndo etọn po zindonukọn to gbejizọnlin yetọn mẹ yì fie yé ma yọnẹn lọ.

E ma bọawuna Ablaham po Sala po nado jo gbẹzan vivomẹninọ tọn yetọn do to Uli

18. (a) Whetẹnu wẹ nujijọ ayidego tọn de wá aimẹ to whenuho omẹ Jiwheyẹwhe tọn lẹ tọn mẹ? (b) Nujijọ ayidego tọn he gando Nisan 14tọ go devo tẹlẹ wẹ wá aimẹ to owhe lẹ godo? (Pọ́n apotin lọ “ Azán Ayidego Tọn de to Whenuho Biblu Tọn Mẹ.”)

18 To azán susu lẹ godo, yé jẹ Kalkẹmiṣi, yèdọ fie gbejizọnlinzintọ lẹ nọ saba dasá Tọ̀sisa Euflate te. Vlavo to finẹ wẹ nujijọ ayidego tọn de wá aimẹ te to whenuho omẹ Jiwheyẹwhe tọn lẹ tọn mẹ. Matin ayihaawe, to azán 14tọ osun he wá yin yiylọdọ Nisan to owhe 1943 J.W.M. tọn wẹ Ablaham plan mẹhe to gbejizọnlinzin hẹ ẹ lẹ dasá tọ̀sisa enẹ. (Eks. 12:40-43) To agewaji otọ̀ lọ tọn wẹ aigba he Jehovah dopà nado dohia Ablaham lọ tin te. To gbenẹgbe, alẹnu Jiwheyẹwhe tọn hẹ Ablaham jẹ nuyiwa ji.

19. Etẹwẹ opagbe he Jehovah do na Ablaham bẹhẹn, podọ etẹwẹ enẹ sọgan ko hẹn Ablaham nado flin?

19 Ablaham jugbọn aigba lọ ji pànta hùwaji podọ gbejizọnlinzintọ lọ lẹ whèsla do fihe atin daho Mọle tọn lẹ tin te sẹpọ Ṣẹkẹmi. To finẹ, Jehovah sọ dọhona Ablaham whladopo  dogọ. Todin, opagbe Jiwheyẹwhe tọn bẹ kúnkan kavi ovivi Ablaham tọn lẹ hẹn, yèdọ mẹhe na wá dugu aigba lọ tọn lẹ. Be Ablaham flin dọdai he Jehovah dọ to Edẹni mẹ gando “okún” kavi ovivi de he na whlẹn gbẹtọvi lẹ to gbèdopo go wẹ ya? (Gẹn. 3:15; 12:7) E sọgan ko yinmọ. Ewọ sọgan ko jẹ nukunnumọjẹemẹ ji dọ emi na yí adà de wà to lẹndai jiawu Jehovah tọn mẹ.

20. Nawẹ Ablaham do pinpẹn-nutọn-yinyọnẹn etọn hia na lẹblanulọkẹyi he Jehovah na ẹn gbọn?

20 Ablaham yọ́n pinpẹn lẹblanulọkẹyi he Jehovah na ẹn lọ tọn taun. Dile e to yìyì sọn fide jẹ fide to aigba lọ ji, vlavo po aṣejininọ po na Kenaninu lẹ gbẹ́ nọ nọ̀ aigba lọ ji wutu, Ablaham nọte bo basi agbà lẹ na Jehovah, tintan sẹpọ atin daho Mọle tọn lẹ, podọ to enẹgodo sẹpọ Bẹtẹli. Ewọ ylọ oyín Jehovah tọn to finẹ, vlavo nado dopẹna Jiwheyẹwhe etọn sọn ahun mẹ wá dile e to nulẹnpọn do sọgodo kúnkan etọn lẹ tọn ji. Ewọ sọgan ko dekunnuna kọmẹnu etọn Kenaninu lẹ. (Hia Gẹnẹsisi 12:7, 8.) Na nugbo tọn, yise Ablaham tọn na wá yin whiwhlepọn whlasusu to aliho sinsinyẹn mẹ to gbẹzan etọn mẹ. Ablaham gbọn nuyọnẹn dali bo ma ze ayidonugo etọn do gbẹzan vivomẹninọ tọn he e jodo to Uli lọ ji. Kakatimọ, e ze ayidonugo etọn do opagbe Jehovah tọn lẹ ji. Heblu lẹ 11:10 dọ gando Ablaham go dọmọ: “Ewọ to nukundo tòdaho lọ he tindo dodonu nujọnu tọn lẹ, yèdọ tòdaho he Jiwheyẹwhe wẹ yin didotọ po basitọ etọn po.”

21. Nawẹ nukunnumọjẹnumẹ he mí tindo gando Ahọluduta Jiwheyẹwhe tọn go gbloada hugan Ablaham tọn gbọn, podọ etẹwẹ a magbe nado wà?

21 To egbehe, míwlẹ he to Jehovah sẹ̀n yọ́n nususu hugan Ablaham gando tòdaho yẹhiadonu tọn enẹ go, yèdọ Ahọluduta Jiwheyẹwhe tọn. Mí yọnẹn dọ Ahọluduta lọ ko to gandu to olọn mẹ, podọ to madẹnmẹ, e na hẹn titonu ylankan ehe wá opodo, podọ mí yọnẹn dọ Okún Ablaham tọn he Jiwheyẹwhe dopà gandego sọn ojlẹ dindẹn die lọ, yèdọ Jesu Klisti wẹ yin Ahọlu Ahọluduta lọ tọn todin. Lẹblanulọkẹyi daho de wẹ e na yin na mí nado mọ whenue Ablaham na yin finfọnsọnku bo na wá mọnukunnujẹ lehe lẹndai Jiwheyẹwhe tọn enẹ mọ hẹndi do mẹ to gigọ́ mẹ. Be e na jlo we nado mọ lehe Jehovah na hẹn opagbe etọn lẹ di do ya? Eyin mọ wẹ, nujọnu wẹ e yin dọ a ni zindonukọn nado nọ wà nuhe Ablaham wà lẹ. Nọ do gbigbọ mẹde-yido-sanvọ́ tọn hia, nọ setonu, bo nọ do pinpẹn-nutọn-yinyọnẹn hia to odẹ̀ mẹ na lẹblanulọkẹyi he Jehovah na we lẹ. Dile hiẹ to apajlẹ yise Ablaham tọn hodo, “otọ́ mẹhe tindo yise” lẹpo tọn na lẹzun otọ́ towe to linlẹn de mẹ!

^ huk. 4 Mọdopolọ, Ablaham nọ saba yin sislẹ jẹnukọn to visunnu Tela tọn lẹ mẹ, dile etlẹ yindọ ewọ ma yin viplọnji etọn.

^ huk. 12 Weyọnẹntọ delẹ dọ dọ kanklosọ́ lẹ ma nọ yin yiyizan to whégbè to ojlẹ Ablaham tọn mẹ. Ṣigba, yé ma penugo nado na kunnudenu he dutomẹji lẹ. Biblu dọ whlasusu dọ Ablaham tindo kanklosọ́ lẹ.—Gẹn. 12:16; 24:35.