Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Wẹndagbe de sọn Jiwheyẹwhe Dè!

 NUPINPLỌN 6

Todido Tẹwẹ Tin Na Mẹhe Kú Lẹ?

Todido Tẹwẹ Tin Na Mẹhe Kú Lẹ?

1. Etẹwẹ yin wẹndagbe lọ gando mẹhe kú lẹ go?

Whenue Jesu wá Bẹtani sẹpọ Jelusalẹm, e ko yì azán ẹnẹ he họntọn etọn Lazalọsi kú. Jesu hodo Malta po Malia po, yèdọ nọviyọnnu dawe he kú lọ tọn lẹ yì yọdò lọ kọ̀n. E ma dẹn bọ gbẹtọgun de pli. Be hiẹ sọgan yí nukun homẹ tọn do pọ́n ayajẹ Malta po Malia po tọn to whenue Jesu fọ́n Lazalọsi sọnku ya?—Hia Johanu 11:21-24, 38-44.

Malta ko yọ́n wẹndagbe he gando oṣiọ lẹ go dai. E yọnẹn dọ Jehovah na fọ́n mẹhe kú lẹ nado nọgbẹ̀ to aigba ji whladopo dogọ.—Hia Jobu 14:14, 15.

2. Etẹwẹ yin ninọmẹ mẹhe kú lẹ tọn?

Jiwheyẹwhe dọna Adam dọmọ: “Kọ́gudu wẹ hiẹ podọ kọ́gudu mẹ wẹ hiẹ nasọ gọ̀ do.”—JENẸSISI 3:19.

Gbẹtọ yin didesọn kọ́gudu mẹ. (Jenẹsisi 2:7; 3:19) Mí ma tindo alindọn jọmaku de he nọ nọ̀ agbasa mítọn mẹ. Eyin mí kú, nude ma nọ tọ́n sọn agbasa mítọn mẹ bo nọ to gbẹnọ zọnmii gba. To okú godo, apọ̀n mítọn ma nọ wazọ́n ba podọ linlẹn mítọn lẹ nọ sudo. Enẹwutu, to whenue Lazalọsi fọnsọnku, e ma dọ dọ nudepope jọ do emi go to okú godo, na oṣiọ lẹ ma yọ́n nude wutu.—Hia Salmu lẹ 146:4; Yẹwhehodọtọ 9:5, 6, 10.

Be Jiwheyẹwhe nọ yí miyọ́n do sayana gbẹtọ lẹ to okú godo wẹ ya? To whenuena e yindọ Biblu dohia dọ oṣiọ lẹ ma yọ́n nude, e họnwun dọ nuplọnmẹ lalo he nọ kọnmasin do Jiwheyẹwhe go wẹ olọnzomẹ yin. Linlẹn lọ tata nado sayana gbẹtọ lẹ to miyọ́n mẹ ma wá ayiha mẹ na ẹn pọ́n.—Hia Jelemia 7:31.

 3. Be mẹhe kú lẹ sọgan dọho hẹ mí ya?

Mẹhe kú lẹ ma sọgan dọho kavi sèhó. (Salmu lẹ 115:17) Ṣigba, angẹli ylankan delẹ tin he sọgan dọho hẹ gbẹtọ lẹ bo doyẹklọmẹ taidi dọ mẹhe kú lọ wẹ to mọwà. (2 Pita 2:4) Jehovah dosẹ́n dọ mí ma dona dọho hẹ mẹhe kú lẹ.—Hia Deutelonomi 18:10, 11.

4. Mẹnu lẹ wẹ na yin finfọnsọnku?

Gbẹtọ livi susu he to yọdò mẹ lẹ na yin finfọnsọnku wá aigba ji. Delẹ to mẹhe ma tlẹ yọ́n Jiwheyẹwhe bo wà onú ylankan lẹ mẹ na yin finfọnsọnku ga.—Hia Luku 23:43; Owalọ lẹ 24:15.

Dotẹnmẹ na yin nina mẹhe yin finfọnsọnku lẹ nado plọn nugbo lọ gando Jiwheyẹwhe go bo do yise hia to Jesu mẹ gbọn tonusisena ẹn dali. (Osọhia 20:11-13) Mẹhe yin finfọnsọnku bo wà dagbe lẹ na duvivi ogbẹ̀ tọn to aigba ji kakadoi.—Hia Johanu 5:28, 29.

5. Etẹwẹ fọnsọnku plọn mí gando Jehovah go?

Jiwheyẹwhe hẹn todido fọnsọnku tọn yọnbasi gbọn Visunnu etọn didohlan nado kú do ota mítọn mẹ dali. Enẹwutu, todido fọnsọnku tọn dohia dọ Jehovah yiwanna mí bo nọ hò mítọn pọ́n. To whenue oṣiọ lẹ na yin finfọnsọnku, mẹnu wẹ hiẹ na jlo taun nado mọ?—Hia Johanu 3:16; Lomunu lẹ 6:23.