Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Wẹndagbe de sọn Jiwheyẹwhe Dè!

 NUPINPLỌN 14

Naegbọn Jiwheyẹwhe Tindo Titobasinanu De?

Naegbọn Jiwheyẹwhe Tindo Titobasinanu De?

1. Naegbọn Jiwheyẹwhe basi titona akọta Islaeli hohowhenu tọn?

Jiwheyẹwhe basi titona kúnkan Ablaham tọn lẹ bo hẹn yé zun akọta de bosọ na yé todohukanji osẹ́n lẹ tọn. E ylọ akọta lọ dọ “Islaeli” podọ akọta ehe kẹdẹ wẹ tẹdo sinsẹ̀n-bibasi nugbo po ohó etọn po go. (Salmu lẹ 147:19, 20) Enẹwutu, omẹ akọta lẹpo tọn sọgan mọaleyi gbọn Islaeli gblamẹ.—Hia Jenẹsisi 22:18.

Jiwheyẹwhe de Islaelivi lẹ nado yin kunnudetọ etọn lẹ. Otàn yetọn do lehe osẹ́n Jiwheyẹwhe tọn lẹ yìnyìn nọ hẹn ale wá na gbẹtọ lẹ do hia. (Deutelonomi 4:6) Enẹwutu, gbọn Islaelivi lẹ gblamẹ, mẹdevo lẹ sọgan plọn nado yọ́n Jiwheyẹwhe nugbo lọ.—Hia Isaia 43:10, 12.

2. Naegbọn Klistiani nugbo lẹ yin tito-basina?

To ojlẹ de godo, Islaeli hẹn nukundagbe Jiwheyẹwhe tọn bu bọ Jehovah yí agun Klistiani tọn do diọ akọta enẹ. (Matiu 21:43; 23:37, 38) Todin, Klistiani nugbo lẹ to Jehovah sẹ̀n taidi kunnudetọ etọn lẹ to otẹn Islaelivi lẹ tọn mẹ.—Hia Owalọ lẹ 15:14, 17.

Jesu basi titona hodotọ etọn lẹ na yé nido nọ dọyẹwheho bo nọ hẹn gbẹtọ lẹ sọn akọta lẹpo mẹ zun devi. (Matiu 10:7, 11; 24:14; 28:19, 20) Mí to gbẹnọ to vivọnu titonu ehe tọn, podọ azọ́n lọ na yin tadona to madẹnmẹ. Whla tintan die to whenuho mẹ he Jehovah bẹ gbẹtọ livi susu pli sọn akọta lẹpo mẹ do sinsẹ̀n-bibasi nugbo lọ mẹ. (Osọhia 7:9, 10) Klistiani nugbo lẹ yin tito-basina nado nọ na tuli bo nọ gọalọna ode awetọ. Lẹdo aihọn pé, yé nọ duvivi tito-to-whinnu sinai do Biblu ji dopolọ tọn to opli yetọn lẹ ji.—Hia Heblu lẹ 10:24, 25.

 3. Nawẹ titobasinanu egbezangbe tọn Kunnudetọ Jehovah tọn lẹ tọn bẹjẹeji gbọn?

To owhe 1870 tọn lẹ mẹ, pipli pẹvi Biblu plọntọ delẹ tọn jẹ nugbo Biblu tọn he ko bu na ojlẹ dindẹn lẹ mọ ji. Yé yọnẹn dọ Jesu basi titona agun Klistiani tọn nado dọyẹwheho wẹ, enẹwutu yé bẹ nujijla yẹwhehodidọ Ahọluduta lọ tọn de jẹeji lẹdo aihọn pé. To 1931, yé kẹalọyi yinkọ lọ Kunnudetọ Jehovah tọn lẹ.—Hia Owalọ lẹ 1:8; 2:1, 4; 5:42.

4. Nawẹ Kunnudetọ Jehovah tọn lẹ yin tito-basina gbọn?

To owhe kanweko tintan whenu, hagbẹ anademẹtọ he kẹalọyi Jesu taidi Ota agun lọ tọn de wẹ penukundo agun Klistiani tọn lẹ go. (Owalọ lẹ 16:4, 5) Mọdopolọ to egbehe, Hagbẹ Anademẹtọ he bẹ mẹho numimọnọ lẹ hẹn de wẹ nọ deanana Kunnudetọ Jehovah tọn lẹ lẹdo aihọn pé. E nọ deanana wekantẹn alahọ tọn Kunnudetọ Jehovah tọn lẹ tọn he nọ basi lẹdogbedevomẹ, nọ zín owe lẹ jẹgbonu bo nọ má owe sinai do Biblu ji lẹ to ogbè he hugan 600 lẹ mẹ. Gbọnmọ dali, Hagbẹ Anademẹtọ lọ nọ wleawuna tulinamẹ po anademẹ Owe-wiwe tọn lẹ po na agun he hugan 100 000 lẹ lẹdo aihọn pé. To agun dopodopo mẹ, sunnu he pegan lẹ nọ wadevizọn taidi mẹho agun tọn kavi nugopọntọ lẹ. Sunnu ehelẹ nọ yí owanyi do penukundo lẹngbọpa Jiwheyẹwhe tọn go.—Hia 1 Pita 5:2, 3.

Kunnudetọ Jehovah tọn lẹ yin tito-basina nado dọyẹwheho wẹndagbe lọ tọn bo hẹn gbẹtọ lẹ zun devi. Taidi apọsteli lẹ, mí nọ dọyẹwheho sọn whédegbè jẹ whédegbè. (Owalọ lẹ 20:20) Mí sọ nọ biọ to ahunjijlọnọ he yiwanna nugbo lẹ si nado plọn Biblu hẹ yé. Ṣigba, Kunnudetọ Jehovah tọn lẹ ma yin titobasinanu de poun gba. Whẹndo he tindo Otọ́ owanyinọ de wẹ mí yin. Mí sọ yin mẹmẹsunnu po mẹmẹyọnnu he nọ hò ode awetọ tọn pọ́n lẹ po. (2 Tẹsalonikanu lẹ 1:3) To whenuena e yindọ omẹ Jehovah tọn lẹ yin tito-basina nado wà ojlo Jiwheyẹwhe tọn bo gọalọna mẹdevo lẹ, yewlẹ wẹ yin whẹndo ayajẹnọ hugan to aigba ji.—Hia Salmu lẹ 33:12; Owalọ lẹ 20:35.

 

Plọnnu Dogọ

Omẹ Nankọ Wẹ Kunnudetọ Jehovah Tọn lẹ Yin?

Kunnudetọ Jehovah tọn nẹmu wẹ a yọnẹn? Etẹwẹ a yọnẹn taun gando mí go?