Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Wẹndagbe de sọn Jiwheyẹwhe Dè!

 NUPINPLỌN 11

Nawẹ Osẹ́n Jiwheyẹwhe Tọn lẹ Nọ Hẹn Ale Wá Na Mí Gbọn?

Nawẹ Osẹ́n Jiwheyẹwhe Tọn lẹ Nọ Hẹn Ale Wá Na Mí Gbọn?

1. Naegbọn mí do tindo nuhudo anademẹ Jiwheyẹwhe tọn?

Etẹwẹ nugbo tangan Biblu tọn lọ dọ ogbẹ̀ yin nunina de sọn Jiwheyẹwhe dè na whàn mí nado wà?—SALMU LẸ 36:9.

Mẹdatọ mítọn yọnnuin hugan mí. Taidi Otọ́ owanyinọ de, e nọ hò mítọn pọ́n. Podọ, e ma dá mí po linlẹn lọ po dọ mí ni deanana míde gba. (Jelemia 10:23) Enẹwutu, kẹdẹdile ovi lẹ nọ tindo nuhudo anademẹ mẹjitọ yetọn lẹ tọn do, mímẹpo wẹ tindo nuhudo anademẹ Jiwheyẹwhe tọn. (Isaia 48:17, 18) Nugbo tangan he tin to Biblu mẹ lẹ nọ deanana mí podọ nunina de wẹ ehe yin sọn Jiwheyẹwhe dè.—Hia 2 Timoti 3:16.

Osẹ́n Jehovah tọn lẹ nọ plọn mí lehe mí na zan gbẹzan mítọn to aliho dagbe hugan mẹ todin do bosọ nọ do nuhe mí dona wà nado mọ ogbẹ̀ madopodo to sọgodo hia. Jiwheyẹwhe tindo jlọjẹ nado na mí osẹ́n lẹ na ewọ wẹ dá mí. Mí dona yọ́n pinpẹn anademẹ owanyinọ etọn tọn bo yìn osẹ́n etọn lẹ po homẹhunhun po.—Hia Salmu lẹ 19:7, 11; Osọhia 4:11.

2. Nawẹ Ohó Jiwheyẹwhe tọn nọ deanana mí gbọn?

Nugbo tangan Biblu tọn delẹ nọ do nuhe Jiwheyẹwhe jlo dọ mí ni wà to ninọmẹ susu lẹ mẹ hia. Osẹ́n devo lẹ nọ gando ninọmẹ taun taun delẹ go. (Deutelonomi 22:8) Mí dona nọ lẹnnupọn ganji nado yọ́n lehe nugbo Biblu tọn de nọ do nuhe mí dona wà to ninọmẹ tangan de mẹ hia do. (Howhinwhẹn lẹ 2:10-12) Di apajlẹ, Biblu plọn mí dọ ogbẹ̀ yin nunina de sọn Jiwheyẹwhe dè. Nugbo enẹ sọgan deanana mí to azọ́nmẹ, to whégbè kavi to whenue mí to gbejizọnlinzin. E nọ gọalọna mí nado hẹn diun dọ mí ma ze ogbẹ̀ mítọn kavi mẹdevo lẹ tọn do owù mẹ.—Hia Owalọ lẹ 17:28.

3. Gbedide awe tẹlẹ wẹ klohugan?

Jesu dlẹnalọdo gbedide awe he klohugan lẹ. Gbedide tintan  lọ do nuhewutu gbẹtọ do yin didá taun hia—enẹ wẹ nado yọ́n Jiwheyẹwhe bo yiwanna ẹn bosọ sẹ̀n ẹn po nugbonọ-yinyin po. Mí dona nọ lẹnnupọndo gbedide tintan ehe ji whẹpo do basi nudide depope. (Howhinwhẹn lẹ 3:6) Mẹhe nọ hodo gbedide ehe lẹ sọgan lẹzun họntọn Jiwheyẹwhe tọn bo mọ ayajẹ nujọnu tọn po ogbẹ̀ madopodo po yí.—Hia Matiu 22:36-38.

Gbedide awetọ sọgan gọalọna mí nado tindo haṣinṣan dagbe hẹ mẹdevo lẹ. (1 Kọlintinu lẹ 13:4-7) Nado yìn gbedide awetọ ehe, e na biọ dọ mí ni nọ yinuwa hẹ gbẹtọ lẹ dile Jiwheyẹwhe nọ yinuwa hẹ yé do.—Hia Matiu 7:12; 22:39, 40.

4. Nawẹ osẹ́n Jiwheyẹwhe tọn lẹ nọ hẹn ale wá na mí gbọn?

Osẹ́n Jiwheyẹwhe tọn lẹ nọ plọn whẹndo lẹ nuhe yé dona wà nado nọpọ́ to owanyi mẹ. (Kolosinu lẹ 3:12-14) Ohó Jiwheyẹwhe tọn sọ nọ basi hihọ́na whẹndo lẹ na e plọn mí nugbo tangan he dona deanana mí de—enẹ wẹ yindọ alọwle dona yin kọndopọ tẹgbẹ tọn.—Hia Jenẹsisi 2:24.

Nuplọnmẹ Biblu tọn lẹ hihodo sọgan gọalọna mí nado hẹn pekọ wá na nuhudo agbasa tọn mítọn lẹ bo hẹn mí tindo vivomẹninọ ahun mẹ tọn. Di apajlẹ, azọ́ngán lẹ nọ saba jlo dọ mẹhe nọ hodo nuhe Biblu dọ do nugbodidọ po azọ́n sinsinyẹn wiwà po ji lẹ wẹ ni wazọ́n na emi. (Howhinwhẹn lẹ 10:4, 26; Heblu lẹ 13:18) Ohó Jiwheyẹwhe tọn sọ plọn mí dọ mí dona tindo pekọ po dandannu gbẹ̀mẹ tọn lẹ po bo wlebòna haṣinṣan he mí tindo hẹ Jiwheyẹwhe hugan nudevo depope.—Hia Matiu 6:24, 25, 33; 1 Timoti 6:8-10.

Osẹ́n Jiwheyẹwhe tọn lẹ hihodo sọgan basi hihọ́na agbasalilo mítọn. (Howhinwhẹn lẹ 14:30; 22:24, 25) Di apajlẹ, osẹ́n Jiwheyẹwhe tọn he dọ dọ mí ma dona nùahànmú nọ basi hihọ́na mí sọn azọ̀nylankan po asidan lẹ po si. (Howhinwhẹn lẹ 23:20) Jehovah nagbè mí nado nùahàn sinsinyẹn ṣigba e dona yin po jlẹkajininọ po. (Salmu lẹ 104:15; 1 Kọlintinu lẹ 6:10) Osẹ́n Jiwheyẹwhe tọn lẹ nọ hẹn ale wá na mí na yé nọ plọn mí nado nọ payi nuyiwa mítọn lẹ go gọna linlẹn mítọn lẹ. (Salmu lẹ 119:97-100) Ṣogan, Klistiani nugbo lẹ ma nọ na sisi nujinọtedo Jiwheyẹwhe tọn lẹ nado hẹn ale wá na yede poun gba. Yé nọ wàmọ nado hẹn homẹ Jehovah tọn hùn.—Hia Matiu 5:14-16.

 

Plọnnu Dogọ

Biọ Nado Plọn Biblu Vọnu

Plọn Biblu vọnu to fie jlo we podọ to ogàn he yọ́n na we mẹ.