Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Wẹndagbe de sọn Jiwheyẹwhe Dè!

 NUPINPLỌN 8

Naegbọn Jiwheyẹwhe Jotẹnna Ylanwiwa po Yajiji Po?

Naegbọn Jiwheyẹwhe Jotẹnna Ylanwiwa po Yajiji Po?

1. Nawẹ ylanwiwa bẹjẹeji gbọn?

Jiwheyẹwhe ko na dotẹnmẹ gbẹtọ lẹ nado dugán na ojlẹ he pé nado dohia dọ yé ma sọgan didẹ nuhahun gbẹtọvi lẹ tọn

Ylanwiwa bẹjẹeji to aigba ji to whenue Satani dolalo tintan lọ. Angẹli pipé de wẹ e yin to bẹjẹeji, ṣigba e ma “nọte to nugbo mẹ.” (Johanu 8:44) E jlo dọ gbẹtọ lẹ ni sẹ̀n emi, yèdọ jlọjẹ de he Jiwheyẹwhe kẹdẹ jẹna. Satani dolalo na Evi bo diọlinlẹnna ẹn nado setonuna ewọ kakati nido yin na Jiwheyẹwhe. Adam kọnawudopọ hẹ Evi bo vẹtolina Jiwheyẹwhe. Nudide Adam tọn hẹn yajiji po okú po wá.—Hia Jenẹsisi 3:1-6, 19.

Satani diọnukunsọ nupojipetọ-yinyin Jiwheyẹwhe tọn kavi otẹn etọn taidi Gigogán lọ to whenue e sisẹ́ Evi nado vẹtolina Jiwheyẹwhe. Suhugan gbẹtọvi lẹ tọn ko kọnawudopọ hẹ Satani bo ma jlo dọ Jiwheyẹwhe ni yin Ogán yetọn. Gbọnmọ dali, Satani lẹzun “ogán aihọn tọn.”—Hia Johanu 14:30; 1 Johanu 5:19.

2. Be nudida Jiwheyẹwhe tọn lẹ tindo oblọ wẹ ya?

Pipé wẹ azọ́n Jiwheyẹwhe tọn lẹpo. Gbẹtọ po angẹli he e dá lẹ po sọgan setonuna ẹn mlẹnmlẹn. (Deutelonomi 32:4, 5) Jiwheyẹwhe na mí mẹdekannujẹ nado de nado wà dagbe kavi oylan podọ enẹ nọ hùn dotẹnmẹ dote na mí nado do owanyi mítọn hia ẹ.—Hia Jakọbu 1:13-15; 1 Johanu 5:3.

3. Naegbọn Jiwheyẹwhe jotẹnna yajiji kakajẹ din?

Jehovah jo mẹhe diọnukunsọ nupojipetọ-yinyin etọn lẹ do na ojlẹ de. Etẹwutu? Nado dohia dọ vivẹnudido depope nado dugán matin anademẹ etọn ma na hẹn ale wá na gbẹtọvi lẹ. (Yẹwhehodọtọ 7:29; 8:9) To owhe 6000 gandudu gbẹtọvi tọn godo, gblọndo  lọ họnwun. Gandudu gbẹtọvi tọn ko gboawupo nado de awhàn, sẹ́nhẹngba, mawadodo po azọ̀n po sẹ̀.—Hia Jelemia 10:23; Lomunu lẹ 9:17.

Gandudu Jiwheyẹwhe tọn gbọnvo na gandudu gbẹtọvi tọn, na e nọ hẹn ale wá na mẹhe kẹalọyi i lẹ. (Isaia 48:17, 18) To madẹnmẹ, Jehovah na và gandudu gbẹtọvi tọn lẹpo sudo. Mẹhe jlo dọ gandudu Jiwheyẹwhe tọn ni deanana yé lẹ kẹdẹ wẹ na nọ aigba ji.—Isaia 11:9.—Hia Daniẹli 2:44.

4. Dotẹnmẹ tẹwẹ homẹfa Jiwheyẹwhe tọn na mí?

Satani dọ dọ gbẹtọ lẹ nọ sẹ̀n Jehovah na dagbe he yé nọ mọ sọn e mẹ wutu. Be e na jlo we nado dohia dọ lalo wẹ enẹ ya? Hiẹ sọgan wàmọ! Homẹfa Jiwheyẹwhe tọn na mímẹpo dotẹnmẹ nado dohia eyin gandudu Jiwheyẹwhe tọn wẹ mí na nọgodona kavi gbẹtọ tọn. Gbẹzan mítọn wẹ nọ do nudide mítọn hia.—Hia Jobu 1:8-12; Howhinwhẹn lẹ 27:11.

5. Nawẹ mí sọgan de Jiwheyẹwhe taidi Ogán mítọn gbọn?

Nudide mítọn lẹ nọ dohia vlavo eyin mí de Jiwheyẹwhe taidi Ogán mítọn kavi lala

Mí sọgan de Jiwheyẹwhe taidi Ogán mítọn eyin mí dín sinsẹ̀n-bibasi nugbo he sinai do Biblu ji bo kọnawudopọ hẹ ẹ. (Johanu 4:23) Mí sọgan gbẹ́ gandudu Satani tọn dai gbọn kadaninọ na tonudidọ po awhàn po dile Jesu wà do dali.—Hia Johanu 17:14.

Satani nọ yí huhlọn etọn zan nado ze fẹnnuwiwa po danuwiwa po daga. Eyin mí gbẹ́ aṣa mọnkọtọn lẹ dai, delẹ to họntọn kavi hẹnnumẹ mítọn lẹ mẹ sọgan ṣàn mí kò kavi diọnukunsọ mí. (1 Pita 4:3, 4) Enẹwutu, nudide lọ pò to mílọsu si. Be mí na dogbẹ́ hẹ mẹhe yiwanna Jiwheyẹwhe lẹ ya? Be mí na yìn osẹ́n etọn lẹ he gọ́ na nuyọnẹn po owanyi po ya? Eyin mí wàmọ, mí na dohia dọ lalo wẹ Satani do to whenue e dọ dọ mẹdepope ma na setonuna Jiwheyẹwhe to kọgbidinamẹ glọ.—Hia 1 Kọlintinu lẹ 6:9, 10; 15:33.

Owanyi Jiwheyẹwhe tọn na gbẹtọ lẹ hẹn mí kudeji dọ yajiji na busẹ. Mẹhe yí ehe sè lẹ na nọgbẹ̀ kakadoi to aigba ji.—Hia Johanu 3:16.