Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Wẹndagbe de sọn Jiwheyẹwhe Dè!

 NUPINPLỌN 4

Mẹnu Wẹ Jesu Klisti?

Mẹnu Wẹ Jesu Klisti?

1. Nawẹ gbẹzan Jesu tọn bẹjẹeji gbọn?

Jẹhẹnu tẹlẹ wẹ zọ́n bọ Jesu yọ́n dọnsẹpọ?MATIU 11:29; MALKU 10:13-16.

To vogbingbọn mẹ na gbẹtọvi devo depope, Jesu ko nọgbẹ̀ to olọn mẹ taidi angẹli de whẹpo do wá yin jiji to aigba ji. (Johanu 8:23) Ewọ wẹ omẹ tintan he Jiwheyẹwhe dá podọ e gọalọ nado dá onú he pò lẹpo. Ewọ kẹdẹ wẹ Jehovah dá tlọlọ podọ enẹ wẹ zọ́n bọ e yin yiylọdọ Ovi “detọ́n dopo akàn” Jiwheyẹwhe tọn. (Johanu 1:14) Jesu yinuwa taidi Hoyidọtọ Jiwheyẹwhe tọn, enẹwutu wẹ e sọ yin yiylọdọ “Ohó lọ.”—Hia Howhinwhẹn lẹ 8:22, 23, 30; Kolosinu lẹ 1:15, 16.

2. Naegbọn Jesu do wá aigba ji?

Jiwheyẹwhe do Visunnu etọn hlan aigba ji gbọn ogbẹ̀ etọn didiọ sọn olọn mẹ do vidọ̀ yọnnu alọji Juvi de he nọ yin Malia tọn mẹ dali. Enẹwutu, otọ́ Jesu tọn ma yin gbẹtọvi gba. (Luku 1:30-35) Jesu wá aigba ji (1) nado plọn mí nugbo lọ gando Jiwheyẹwhe go, (2) nado do lehe mí sọgan wà ojlo Jiwheyẹwhe tọn do hia mí, etlẹ yin to whenue mí to nuhahun lẹ mẹ, podọ (3) nado ze ogbẹ̀ pipé etọn jo taidi “ofligọ de.”—Hia Matiu 20:28.

3. Naegbọn mí tindo nuhudo ofligọ de tọn?

Ofligọ yin akuẹ de he nọ yin súsú nado tún mẹde dote sọn whẹgbledomẹ okú tọn si. (Eksọdusi 21:29, 30) E ma yin linlẹn Jiwheyẹwhe tọn to bẹjẹeji dọ gbẹtọ lẹ ni poyọnho bo kú. Nawẹ mí wagbọn do yọnẹn? Jiwheyẹwhe dọna sunnu tintan lọ, Adam, dọ eyin e wà nuhe Biblu ylọdọ “ylando,” e na kú. Enẹwutu, eyin Adam ma waylando, e ma na  ko kú gbede. (Jenẹsisi 2:16, 17; 5:5) Sọgbe hẹ nuhe Biblu dọ, Adam wẹ hẹn okú wá na gbẹtọvi lẹ. Gbọnmọ dali, Adam jo ogú ylando po kọdetọn etọn he yin okú po tọn na kúnkan etọn lẹpo. Mí tindo nuhudo ofligọ de tọn nado tún mí dote sọn whẹgbledomẹ okú tọn he mí dugu etọn sọn Adam si.—Hia Lomunu lẹ 5:12; 6:23.

Mẹnu wẹ sọgan suahọ ofligọ lọ tọn bo tún mí dote sọn okú si? Eyin mí kú, mí nọ suahọ ylando mítọn titi lẹ tọn kẹdẹ. Gbẹtọ mapenọ depope ma sọgan suahọ ylando mẹdevo lẹ tọn.—Hia Salmu lẹ 49:7-9.

4. Naegbọn Jesu do kú?

To vogbingbọn mẹ na míwlẹ, gbẹtọ pipé de wẹ Jesu. Enẹwutu, e ma tindo nuhudo nado kú na ylando etọn lẹ wutu, na e ma waylando pọ́n. Kakatimọ, Jesu kú na ylando mẹdevo lẹ tọn wutu. Jiwheyẹwhe do owanyi jiawu etọn hia gbẹtọvi lẹ gbọn Visunnu etọn didohlan nado kú do ota mítọn mẹ dali. Jesu lọsu do owanyi hia mí gbọn tonusisena Otọ́ etọn po ogbẹ̀ etọn yíyí do sanvọ́ na ylando mítọn lẹ po wutu dali.—Hia Johanu 3:16; Lomunu lẹ 5:18, 19.

5. Etẹ wà wẹ Jesu te todin?

To whenue Jesu tin to aigba ji, e hẹnazọ̀ngbọna awutunọ lẹ, fọ́n oṣiọ lẹ sọnku bo hẹn pọngbọ wá na mẹhe to yaji lẹ. Gbọnmọ dali, e do nuhe e na wà na gbẹtọvi tonusetọ lẹpo to sọgodo hia. (Matiu 15:30, 31; Johanu 5:28) To okú Jesu tọn godo, Jiwheyẹwhe gọ̀ ẹ wá ogbẹ̀ taidi nudida gbigbọnọ de. (1 Pita 3:18) Enẹgodo, Jesu nọte to adusilọ Jiwheyẹwhe tọn mẹ kakajẹ whenue Jehovah na ẹn aṣẹpipa nado dugán taidi Ahọlu do aigba lọ blebu ji. (Heblu lẹ 10:12, 13) Todin, Jesu to gandu taidi Ahọlu to olọn mẹ, podọ hodotọ etọn lẹ to wẹndagbe enẹ lá lẹdo aihọn pé.—Hia Daniẹli 7:13, 14; Matiu 24:14.

To madẹnmẹ, Jesu na yí aṣẹpipa etọn taidi Ahọlu zan nado de yajiji lẹpo po mẹhe nọ hẹn yé wá lẹ po sẹ̀. Mẹhe do yise hia to Jesu mẹ lẹpo gbọn tonusisena ẹn dali na duvivi ogbẹ̀ tọn to paladisi mẹ to aigba ji.—Hia Salmu lẹ 37:9-11.