Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Wẹndagbe de sọn Jiwheyẹwhe Dè!

 NUPINPLỌN 1

Etẹwẹ Yin Wẹndagbe Lọ?

Etẹwẹ Yin Wẹndagbe Lọ?

1. Etẹwẹ yin wẹndagbe he wá sọn Jiwheyẹwhe dè lọ?

Jiwheyẹwhe jlo dọ gbẹtọ lẹ ni duvivi ogbẹ̀ tọn to aigba ji. E dá aigba po nuhe to e ji lẹpo po na e yiwanna gbẹtọ lẹ wutu. To madẹnmẹ, e na yinuwa nado wleawuna sọgodo he yọ́n hugan de na gbẹtọ lẹ to filẹpo. E na de gbẹtọ lẹ sọn yajiji lẹpo mẹ.—Hia Jelemia 29:11.

Gandudu depope ma ko penugo nado de danuwiwa, azọ̀n kavi okú sẹ̀ sọn aimẹ. Ṣigba, wẹndagbe de tin. To madẹnmẹ, Jiwheyẹwhe na yí gandudu etọn titi do diọ gandudu gbẹtọvi tọn lẹpo. Mẹhe na nọ gandudu lọ glọ lẹ na duvivi jijọho po agbasalilo po tọn.—Hia Isaia 25:8; 33:24; Daniẹli 2:44.

2. Naegbọn e do yin nujọnu nado sè wẹndagbe lọ todin?

Yajiji na doalọte kiki to whenue Jiwheyẹwhe na de mẹylankan lẹ sẹ̀ sọn aigba ji. (Zefania 2:3) Whetẹnu wẹ enẹ na jọ? Ohó Jiwheyẹwhe tọn ko dọ dọdai ninọmẹ he to nuhahun hẹnwana gbẹtọ lẹ todin lẹ tọn. Nuylankan he to jijọ lẹ dohia dọ ojlẹ he mẹ Jiwheyẹwhe na yinuwa te ko sẹpọ.—Hia 2 Timoti 3:1-5.

3. Etẹwẹ mí dona wà?

Mí dona plọnnu gando Jiwheyẹwhe go sọn Ohó etọn, Biblu mẹ. Biblu taidi wekanhlanmẹ de sọn otọ́ owanyinọ de dè. E dọ lehe mí sọgan duvivi gbẹzan dagbe de tọn do todin podọ lehe mí sọgan duvivi ogbẹ̀ madopodo to aigba ji to sọgodo do tọn. E họnwun dọ homẹ mẹdelẹ tọn ma na hùn dọ hiẹ to alọgọ mọyi nado mọnukunnujẹ Biblu mẹ. Ṣigba, mí ma dona dike dotẹnmẹ hundote lọ nado duvivi sọgodo he yọ́n hugan de tọn ni gbọ mí go.—Hia Howhinwhẹn lẹ 29:25; Osọhia 14:6, 7.

Plọnnu Dogọ

TITO BIBLU PINPLỌN TỌN

Naegbọn Mí Dona Plọn Biblu?

Biblu to alọgọna gbẹtọ livi susu lẹdo aihọn pé nado mọ gblọndo na kanbiọ tangan gbẹ̀mẹ tọn lẹ. Hiẹ lọsu jlo na tin to yé mẹ ya?