Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Wẹndagbe de sọn Jiwheyẹwhe Dè!

 NUPINPLỌN 7

Etẹwẹ Ahọluduta Jiwheyẹwhe Tọn Yin?

Etẹwẹ Ahọluduta Jiwheyẹwhe Tọn Yin?

1. Etẹwẹ Ahọluduta Jiwheyẹwhe tọn yin?

Naegbọn Jesu do yin Ahọlu dagbe hugan lọ?—MALKU 1:40-42.

Ahọluduta Jiwheyẹwhe tọn yin gandudu de he tin to olọn mẹ. E na diọtẹnna gandudu he pò lẹpo bo na hẹn ojlo Jiwheyẹwhe tọn nado yin wiwà to olọn mẹ podọ to aigba ji. Wẹndagbe de wẹ ehe yin. Gbẹtọ lẹ tindo nuhudo gandudu dagbe de tọn podọ to madẹnmẹ, Ahọluduta Jiwheyẹwhe tọn na hẹn pekọ wá na nuhudo enẹ. E na hẹn pọninọ yọnbasi to mẹhe nọ nọ̀ aigba ji lẹpo ṣẹnṣẹn.—Hia Daniẹli 2:44; Matiu 6:9, 10; 24:14.

Ahọluduta de dona tindo ahọlu. Jehovah ko de Visunnu etọn, Jesu Klisti, nado yin Ahọlu Ahọluduta Etọn tọn.—Hia Osọhia 11:15.

2. Naegbọn Jesu do yin Ahọlu dagbe hugan lọ?

Visunnu Jiwheyẹwhe tọn wẹ Ahọlu dagbe hugan lọ, na e jọmẹ bo nọ yiavùnlọna nuhe sọgbe. (Johanu 1:14) E sọ tindo nugopipe nado gọalọna gbẹtọ lẹ na e na dugán do aigba ji sọn olọn mẹ wutu. To fọnsọnku etọn godo, e hẹji yì olọn mẹ bo sinai to adusilọ Jehovah tọn mẹ bo to tenọpọn ojlẹ he mẹ e na yin zizedo gánzinpo ji. (Heblu lẹ 10:12, 13) To godo mẹ, Jiwheyẹwhe na ẹn huhlọn nado jẹ gandu ji.—Hia Daniẹli 7:13, 14.

3. Mẹnu lẹ wẹ na dugán hẹ Jesu?

Pipli de he yin yiylọdọ “omẹ wiwe lẹ” na dugán hẹ Jesu to olọn mẹ. (Daniẹli 7:27) Omẹ tintan he yin dide taidi mẹwiwe lẹ wẹ apọsteli nugbonọ Jesu tọn lẹ. Jehovah gbẹ́ to  sunnu po yọnnu nugbonọ lẹ po de taidi mẹwiwe lẹ kakajẹ din. Taidi Jesu, yé nọ yin finfọnsọnku taidi nudida gbigbọnọ lẹ.—Hia Johanu 14:1-3; 1 Kọlintinu lẹ 15:42-44.

Omẹ nẹmu wẹ jei olọn mẹ? Jesu ylọ yé dọ “lẹngbọpa pẹvi.” (Luku 12:32) Sọha yetọn wẹ 144 000. Yewlẹ po Jesu po na dugán do aigba ji.—Hia Osọhia 14:1.

4. Etẹwẹ jọ to whenue Jesu jẹ gandu ji?

Ahọluduta Jiwheyẹwhe tọn bẹ gandudu jẹeji to 1914. * Onú tintan he Jesu wà taidi Ahọlu wẹ nado yàn Satani po aovi etọn lẹ po hlan aigba ji. Satani biọ adi sinsinyẹn mẹ bo jẹ nuhahun fọndote ji to aigba ji. (Osọhia 12:7-10, 12) Sọn whenẹnu gbọ́n, nuhahun gbẹtọvi tọn lẹ ko jideji tlala. Awhàn, huvẹ, azọ̀nylankan po aigba sisọsisọ po yin apadewhe “ohia” de tọn he nọ na mí kunnudenu dọ Ahọluduta lọ na jẹ anadena aigba ji to madẹnmẹ.—Hia Luku 21:7, 10, 11, 31.

5. Etẹwẹ Ahọluduta Jiwheyẹwhe tọn to wiwà todin podọ etẹwẹ e na wà to sọgodo?

Gbọn azọ́n yẹwhehodidọ lẹdo aihọn pé tọn de gblamẹ, Ahọluduta Jiwheyẹwhe tọn ko to gbẹtọ susugege de bẹpli sọn akọta lẹpo mẹ. Ahunjijlọnọ livi susu to lilẹzun mẹjidugando Jesu tọn lẹ. Ahọluduta Jiwheyẹwhe tọn na basi hihọ́na yé to whenue e na và aihọn ylankan ehe sudo. Enẹwutu, mẹhe jlo dọ Ahọluduta Jiwheyẹwhe tọn ni basi hihọ́na yé lẹpo dona plọn nado yin mẹjidugando tonusetọ Jesu tọn lẹ.—Hia Osọhia 7:9, 14, 16, 17.

To ojlẹ owhe 1000 tọn de gblamẹ, Ahọluduta lọ na hẹn linlẹn he Jiwheyẹwhe tindo to bẹjẹeji na gbẹtọvi lẹ di. Aigba lọ blebu na lẹzun paladisi. To godo mẹ, Jesu na gọ̀ Ahọluduta lọ jo na Otọ́ etọn. (1 Kọlintinu lẹ 15:24-26) Be hiẹ yọ́n mẹde he a sọgan dọhona gando Ahọluduta Jiwheyẹwhe tọn go ya?—Hia Salmu lẹ 37:10, 11, 29.

 

^ huk. 6 Na zẹẹmẹ gigọ́ do lehe dọdai Biblu tọn lẹ dlẹnalọdo owhe 1914 do ji, pọ́n weda 215-218 to owe lọ Etẹwẹ Biblu Plọn Mí Taun? mẹ.

Plọnnu Dogọ

Nawẹ Kunnudetọ Jehovah Tọn lẹ Nọ Basi Titona Azọ́n Yẹwhehodidọ Tọn Yetọn Gbọn?

Mí nọ hodo apajlẹ he Jesu zedai to whenue e tin to aigba ji. Etẹwẹ yin delẹ to aliho yẹwhehodidọ tọn he e yizan lẹ mẹ?