Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Plọn Ovi Towe Lẹ

 ADÀ 5

Samuẹli Zindonukọn Nado to Nuhe Sọgbe Wà

Samuẹli Zindonukọn Nado to Nuhe Sọgbe Wà

Samuẹli gbẹ́ yin yọpọvu taun to whenue e yin zize yì gòhọtúntún mẹ nado nọ wazọ́n to finẹ. Gòhọtúntún lọ mẹ wẹ gbẹtọ lẹ nọ wá basi sinsẹ̀n hlan Jehovah te. Be a yọ́n nuhewutu Samuẹli do wá to azọ́nwa to gòhọtúntún mẹ ya? Gbọ mí ni dọhodo Hanna, onọ̀ Samuẹli tọn ji whẹ́.

Na ojlẹ dindẹn lẹ, Hanna jlo nado jivi. Amọ́, e ma mọ viji. Enẹwutu, e hodẹ̀ hlan Jehovah bo vẹvẹna ẹn dọ ni gọalọna emi nado mọ viji. E dopà dọ eyin emi ji sunnu, emi na do e hlan nado gbọṣi gòhọtúntún mẹ bo wazọ́n to finẹ. Jehovah sè odẹ̀ etọn bọ e ji visunnu de. E ylọ ovi lọ dọ Samuẹli. To whenue Samuẹli tindo owhe atọ̀n kavi ẹnẹ, Hanna depà he e do lọ bo plan Samuẹli yì gòhọtúntún mẹ na e nido nọ sẹ̀n Jiwheyẹwhe to finẹ.

Eli wẹ yin yẹwhenọ daho to gòhọtúntún lọ mẹ. Visunnu etọn awe lẹ lọsu yin yẹwhenọ to finẹ. Flindọ, gòhọtúntún lọ wẹ yin fie gbẹtọ lẹ nọ wá sẹ̀n Jiwheyẹwhe te, podọ mẹhe nọ nọ̀ finẹ lẹ dona nọ wà nuhe sọgbe. Amọ́, nuhe ylan taun lẹ wẹ visunnu Eli tọn lẹ nọ wà. Samuẹli mọ nuylankan he yé nọ wà lẹ. Be Samuẹli lọsu jẹ nuylankan wà ji taidi visunnu Eli tọn lẹ wẹ ya?— Lala, e zindonukọn nado to nuhe sọgbe wà dile mẹjitọ etọn lẹ ko plọn ẹn do.

Etẹwẹ a lẹndọ Eli dona ko wà na visunnu etọn awe lọ lẹ?— E dona ko domẹplọnlọ yé go. E ma dona ko jo yé do bọ yé na gbẹ́ pò to yẹwhenọ yin to owhé Jiwheyẹwhe tọn gbè. Amọ́, na Eli ma wàmọ wutu, Jehovah gblehomẹ do ewọ po visunnu etọn awe lọ lẹ po go. Jehovah de nado domẹplọnlọ yé go.

Samuẹli do owẹ̀n Jehovah tọn na Eli

To whenue Samuẹli to amlọndọ to ozán de mẹ, e sè bọ mẹde to yiylọ ẹ: ‘Samuẹli!’ E họ̀nwezun yì Eli dè, amọ́ Eli dọna ẹn dọ: ‘N’ma ylọ we nẹ.’ Nudopolọ sọ jọ whla awe. Whla atọ̀ntọ lọ wẹ Eli dọna Samuẹli dọ eyin mẹlọ sọ ylọ ẹ, ni dọmọ: ‘Jehovah, jaale dọho; n’to todo we.’ Nuhe Samuẹli wà pẹpẹ niyẹn. Enẹgodo wẹ Jehovah dọna Samuẹli dọmọ:  ‘Dọna Eli dọ n’na domẹplọnlọ whẹndo etọn go na nuylankan he yé ko wà lẹ.’ Be a lẹndọ e bọawuna Samuẹli nado do owẹ̀n enẹ na Eli ya?— Lala. Nugbo wẹ dọ Samuẹli dibu, amọ́ e wà nuhe Jehovah biọ to e si lọ. Nuhe Jehovah dọ lọ wá jọ. Visunnu awe Eli tọn lẹ yin hùhù bọ Eli lọsu kú.

Apajlẹ dagbe de wẹ Samuẹli yin na mí. Dile e tlẹ mọ bọ mẹdevo lẹ to nuylankan wà, ewọ wà nuhe sọgbe. Hiẹ lo? Be a na hodo apajlẹ Samuẹli tọn bo na zindonukọn nado to nuhe sọgbe wà ya? Eyin a wàmọ, a na hẹn homẹ Jehovah po mẹjitọ towe lẹ po tọn hùn.

HIA TO BIBLU TOWE MẸ