Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Plọn Ovi Towe Lẹ

 ADÀ 8

Josia Tindo Họntọn Dagbe Lẹ

Josia Tindo Họntọn Dagbe Lẹ

Be a lẹndọ e nọ vẹawu nado wà nuhe sọgbe wẹ ya?— Mẹsusu wẹ nọ lẹnmọ. Biblu dọna mí dọ e vẹawu taun na visunnu de he nọ yin Josia nado wà nuhe sọgbe. Amọ́, e tindo họntọn dagbe lẹ he gọalọna ẹn. Gbọ mí ni dọhodo Josia po họntọn etọn lẹ po ji.

Amọni he yin ahọlu Juda tọn de wẹ ji Josia. Mẹylankan taun wẹ Amọni yin bosọ nọ sẹ̀n boṣiọ lẹ. To whenue Amọni kú, visunnu etọn Josia lẹzun ahọlu Juda tọn. Amọ́, owhe ṣinatọ̀n poun wẹ e tindo! Be a lẹndọ ewọ yin mẹylankan taidi otọ́ etọn wẹ ya?— Lala!

Zẹfania dọna gbẹtọ lẹ dọ yé ma dona sẹ̀n boṣiọ lẹ

Dile etlẹ yindọ yọpọvu taun wẹ Josia yin, ewọ jlo na setonuna Jehovah. Enẹwutu, e de nado jihọntọn hẹ mẹhe yiwanna Jehovah lẹ kẹdẹ. Podọ họntọn enẹlẹ gọalọna Josia nado wà nuhe sọgbe. Mẹnu lẹ wẹ yin delẹ to họntọn Josia tọn lẹ mẹ?

Dopo to họntọn etọn lẹ mẹ wẹ Zẹfania. Zẹfania yin yẹwhegán de he dọna  mẹhe nọ nọ̀ Juda lẹ dọ Jehovah na sayana yé eyin yé to boṣiọ lẹ sẹ̀n. Josia dotoaina Zẹfania bo ma sẹ̀n boṣiọ lẹ, kakatimọ ewọ sẹ̀n Jehovah.

Họntọn Josia tọn devo wẹ Jelemia. Jelemia po Josia po na dibla tindo owhe dopolọ, podọ yé whẹ́n dopọ to fie ma dẹn do yedelẹ. Yé vẹ́ sọmọ bọ to whenue Josia kú, Jelemia kàn ohàn vonọtaun de gando lehe e jẹdò Josia tọn do go. Jelemia po Josia po gọalọna yedelẹ nado wà nuhe sọgbe, podọ nado setonuna Jehovah.

Josia po Jelemia po gọalọna yedelẹ nado wà nuhe sọgbe

Etẹwẹ a sọgan plọn sọn apajlẹ Josia tọn mẹ?— Dile etlẹ yindọ yọpọvu taun wẹ Josia yin, ewọ jlo na wà nuhe sọgbe. E yọnẹn dọ mẹhe yiwanna Jehovah lẹ wẹ emi dona jihọntọn hẹ. Hiẹ lọsu dona tẹnpọn nado jihọntọn hẹ mẹhe yiwanna Jehovah bo sọgan gọalọna we nado nọ wà nuhe sọgbe lẹ!