Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Plọn Ovi Towe Lẹ

 ADÀ 4

E Hẹn Homẹ Otọ́ Etọn po Jehovah po Tọn Hùn

E Hẹn Homẹ Otọ́ Etọn po Jehovah po Tọn Hùn

Opà tẹwẹ Jẹfta to dido na Jehovah?

E ma bọawuna viyọnnu Jẹfta tọn, amọ́ e wanu sọgbe hẹ opà he otọ́ etọn do

Be a mọ viyọnnu he to yẹdide lọ mẹ ya?— Dawe de he nọ yin Jẹfta sin ovi wẹ. Biblu ma dọ yinkọ viyọnnu lọ tọn na mí, ṣigba mí yọnẹn dọ e hẹn homẹ otọ́ etọn po Jehovah po tọn hùn. Gbọ mí ni dọhodo ewọ po otọ́ etọn Jẹfta po ji.

Jẹfta yin mẹde he nọ wà nudagbe podọ e nọ yí whenu susu zan nado plọnnu viyọnnu etọn gando Jehovah go. E sọ tindo huhlọn bo yin nukọntọ dagbe. Enẹwutu, Islaelivi lẹ biọ to e si nado nọ nukọnna yé na yé nido funawhàn sọta kẹntọ yetọn lẹ.

Jẹfta hodẹ̀ dọ Jiwheyẹwhe ni gọalọna emi nado duto awhàn lọ ji. Jẹfta dopà dọ eyin emi gbawhàn lọ, omẹ tintan he na tọ́n sọn owhé emitọn gbè nado wá pé emi to whenue emi na lẹkọja whégbè wẹ emi na na hlan Jehovah. Mẹlọ na nọ nọ̀  lẹdo gòhọtúntún Jiwheyẹwhe tọn mẹ bo na wazọ́n to gòhọtúntún lọ mẹ na pipotọ gbẹzan etọn tọn. Fie gbẹtọ lẹ nọ yì basi sinsẹ̀n hlan Jiwheyẹwhe te to hohowhenu wẹ nọ yin yiylọdọ gòhọtúntún. Na nugbo tọn, Jẹfta gbawhàn lọ! Amọ́ to whenue e lẹkọja whégbè, be a yọ́n omẹ tintan he tọ́n sọn owhé etọn gbè nado wá pé e ya?—

Viyọnnu Jẹfta tọn wẹ! Ovi dopo gee he e tindo niyẹn, podọ todin ewọ dona do e hlan gòhọtúntún lọ mẹ. Ehe hẹn Jẹfta blawu taun. Amọ́, flindọ ewọ ko dopà de. To afọdopolọji, viyọnnu etọn dọna ẹn dọ: ‘Papa, mì ko dopà na Jehovah, enẹwutu mì dona wà nuhe mì dọ.’

Họntọn viyọnnu Jẹfta tọn lẹ nọ wá dla ẹ pọ́n to whemẹwhemẹ

Viyọnnu Jẹfta tọn lọsu blawu ga. Eyin ewọ yì gòhọtúntún lọ mẹ, e ma na dà asu, mọ e ma na jivi. Amọ́, ewọ jlo vẹkuvẹku nado wanu sọgbe hẹ opà he otọ́ etọn do podọ nado hẹn homẹhun Jehovah. Onú awe enẹlẹ yin nujọnu na ẹn hugan asu didà kavi vijiji. Enẹwutu, e yì sọn whégbè bo wazọ́n to gòhọtúntún lọ mẹ na pipotọ gbẹzan etọn tọn.

Be a lẹndọ nuhe e wà lọ hẹn homẹ otọ́ etọn po Jehovah po tọn hùn ya?— Mọwẹ! Eyin a nọ setonu bosọ yiwanna Jehovah, a sọgan taidi viyọnnu Jẹfta tọn. Hiẹ lọsu sọgan hẹn homẹ mẹjitọ towe lẹ tọn po Jehovah tọn po hùn ga.