Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Plọn Ovi Towe Lẹ

 ADÀ 1

Aṣli de He Homẹ Mítọn Hùn Nado Yọnẹn

Aṣli de He Homẹ Mítọn Hùn Nado Yọnẹn

Be yè ko dọ aṣli de na we pọ́n ya?— * Biblu dọhodo aṣli titengbe de ji, ehe nọ yin yiylọdọ “aṣli wiwe lọ.” Aṣli lọ yin wiwe, na Jiwheyẹwhe dè wẹ e wá sọn wutu. Podọ e yin yiylọdọ aṣli, na gbẹtọ lẹ ma yọ́n nude gandego wutu. Angẹli lẹ lọsu tlẹ jlo na yọ́n nususu gando aṣli enẹ go. Be a jlo na yọ́n aṣli lọ ya?—

Etẹwẹ a lẹndọ angẹli lẹ jlo na yọnẹn?

E ko dẹn din taun bọ Jiwheyẹwhe dá sunnu po yọnnu tintan lọ po. Yinkọ yetọn wẹ Adam po Evi po. Jiwheyẹwhe na yé owhé whanpẹnọ de he nọ yin yiylọdọ jipa Edẹni tọn. Eyin Adam po Evi po ko setonuna Jiwheyẹwhe wẹ, yewlẹ po ovi yetọn lẹ po na ko hẹn aigba lọ blebu zun paladisi de he na taidi jipa enẹ. Podọ yé na ko nọgbẹ̀ to Paladisi mẹ kakadoi. Amọ́, be a flin nuhe Adam po Evi po wà ya?—

Adam po Evi po vẹtolina Jiwheyẹwhe, podọ nuhe zọ́n bọ mí ma do tin to paladisi de mẹ to egbehe niyẹn. Amọ́, Jiwheyẹwhe dọ dọ emi na hẹn aigba lọ blebu zun nọtẹn whanpẹnọ de, bọ mẹlẹpo na nọgbẹ̀ kakadoi bo nasọ yin ayajẹnọ. Nawẹ ewọ na wà enẹ gbọn? Na ojlẹ dindẹn lẹ, gbẹtọvi lẹ ma yọnẹn. Na aṣli de wẹ e yin wutu.

To whenue Jesu wá aigba ji, e plọn nususu gbẹtọvi lẹ gando aṣli ehe go. E dọ dọ aṣli lọ gando Ahọluduta Jiwheyẹwhe tọn go. Jesu dọna gbẹtọvi lẹ nado nọ hodẹ̀ dọ Ahọluduta ehe ni wá. Ahọluduta enẹ na hẹn aigba lọ zun paladisi whanpẹnọ de.

Be homẹ towe ma hùn nado yọ́n aṣli ehe ya?— Flindọ mẹhe setonuna Jehovah lẹ kẹdẹ wẹ na nọgbẹ̀ to Paladisi mẹ. Otàn susu wẹ tin to Biblu mẹ gando sunnu po yọnnu po he setonuna Jehovah lẹ go. Be e na jlo we nado plọnnu gando yé go ya?— Gbọ mí ni dọhodo delẹ to yé mẹ ji bo pọ́n lehe mí sọgan hodo apajlẹ yetọn do.

^ huk. 3 To alọnuwe ehe blebu mẹ, hiẹ na mọ ohù kleun ehe (—) nkọ de to nukọn na kanbiọ delẹ. Ojlẹ dagbe de niyẹn nado yí agbọ́ bo dike ovi towe ni na gblọndo.