Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 51

Awhànfuntọ lọ po Viyọnnu Pẹvi lọ Po

Awhànfuntọ lọ po Viyọnnu Pẹvi lọ Po

Viyọnnu pẹvi Islaelivi de tin to aigba Silia tọn ji, yèdọ fide he dẹn do owhé etọn gbè taun. Awhànpa Silianu lẹ tọn wẹ hò e yí sọn mẹjitọ etọn lẹ si, bọ e wá lẹzun deviyọnnu na asi awhàngán de he nọ yin Naamani tọn. Jehovah wẹ viyọnnu pẹvi lọ nọ sẹ̀n, mahopọnna dọ mẹhe lẹdo e lẹ ma nọ wàmọ.

Naamani to azọ̀n agbasa go tọn sinsinyẹn de jẹ bo nọ to awufiẹsa mẹ to whelẹponu. Viyọnnu pẹvi lọ jlo taun nado gọalọna ẹn. Enẹwutu, e dọna asi Naamani tọn dọmọ: ‘N’yọ́n mẹde he gán gbọazọ̀nna asu mìtọn. Yẹwhegán Jehovah tọn de tin to Islaeli bo nọ yin Eliṣa. E gán hẹn asu mìtọn jẹgangan.’

Asi Naamani tọn dọ nuhe viyọnnu pẹvi lọ dọna ẹn na Naamani. Na Naamani jlo na wà nuhe go e pé lẹpo nado jẹgangan wutu, e yì owhé Eliṣa tọn gbè to Islaeli. Naamani donukun dọ Eliṣa na yí emi taidi mẹjọmẹ de. Ṣigba, kakati Eliṣa nido dọhona Naamani tlọlọ, e do devizọnwatọ  etọn hlan nado dọnudo e bo dọna ẹn dọmọ: ‘Yì, bo lawu to Tọ̀sisa Jọdani mẹ whla ṣinawe. To whenẹnu, a na jẹgangan.’

Ehe vẹna Naamani taun. E dọmọ: ‘N’vẹdó dọ yẹwhegán ehe na ylọ Jiwheyẹwhe etọn bo na ze alọ etọn lẹ do ji e nado gbọazọ̀nna mi wẹ sin. Kakatimọ, tọ̀sisa Islaeli tọn enẹ mẹ wẹ e dọ ma yì lawu te. Tọ̀sisa he yọ́n humọ lẹ to Silia pọ́. Naegbọn n’ma gán yì dọ́n poun?’ Naamani gblehomẹ bo tlọ́n owhé Eliṣa tọn gbè.

Devizọnwatọ Naamani tọn lẹ gọalọna ẹn nado lẹnnupọn ganji. Yé dọna ẹn dọmọ: ‘Be e ma yin nuhe go mì pé lẹpo wẹ mì na wà nado jẹgangan ya? Nuhe yẹwhegán lọ dọ dọ mì ni wà ma vẹawu nẹ. Naegbọn mì ma gán wà ẹ poun?’ Naamani dotoaina yé. E yì Tọ̀sisa Jọdani mẹ bo whèadin demẹ whla ṣinawe. To whenue Naamani ko ylọn ede do osin lọ mẹ whla ṣinawe godo, azọ̀n etọn gbọ pete. E vivi na ẹn sọmọ bọ e lẹkọyi Eliṣa dè nado dopẹna ẹn. Naamani dọmọ: ‘N’ko wá yọnẹn todin dọ Jehovah wẹ Jiwheyẹwhe nugbo lọ.’ Numọtolanmẹ tẹwẹ a lẹndọ viyọnnu pẹvi Islaelivi lọ na ko tindo to whenue Naamani lẹkọwa whé bọ azọ̀n etọn ko gbọ?

“Sọn onù yọpọvu lẹ po viyẹyẹ lẹ po tọn mẹ wẹ hiẹ ko hẹn pipà wá sọn.”​—Matiu 21:16