Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 54

Jehovah Fahomẹ hẹ Jona

Jehovah Fahomẹ hẹ Jona

Mẹylankan lẹ kẹdẹ wẹ gọ́ tòdaho Asilianu lẹ tọn he nọ yin Nineve mẹ. Enẹwutu, Jehovah dọna yẹwhegán etọn Jona dọ ni yì Nineve bo na yé avase dọ yé dona diọ walọ yetọn. Amọ́, Jona họ̀n bo dedo awà devo ji. E do tọjihun de he jei Talṣiṣi.

Dile tọjihun lọ to yìyì, yujẹhọn sinsinyẹn de fọ́n bọ obu jẹ húnkùntọ lọ lẹ ji. Yé sọ hodẹ̀ hlan yẹwhe yetọn lẹ bo to kinkanse dọ: ‘Etẹwutu wẹ ehe do to jijọ?’ To godo mẹ, Jona dọna yé dọmọ: ‘Yẹn wẹ zọ́n. Jehovah wẹ zọ́n azọ́n mi bọ n’họ̀n. Mì ze mi dlan ohù lọ mẹ, yujẹhọn lọ nasọ doalọte.’ Húnkùntọ lọ lẹ ma jlo na ze jona dlan sọn tọjihun lọ mẹ, amọ́ e tẹkudeji dọ yé ni wàmọ. Whenue yé wá ze e dlan ohù lọ mẹ, yujẹhọn lọ doalọte.

Jona lẹndọ emi na kú janwẹ. Dile e to ohù lọ mẹ bo to sisiọ, e hodẹ̀ hlan Jehovah. To whenẹnu, Jehovah do whèvi daho de hlan. Whèvi lọ ze Jona mì, amọ́ e ma kú. Jona hodẹ̀ sọn ohò whèvi lọ tọn mẹ dọmọ: ‘N’dopà dọ n’na nọ setonuna we to whelẹponu.’ Jehovah basi hihọ́na Jona to ohò whèvi lọ tọn mẹ na azán atọ̀n, enẹgodo e hẹn whèvi lọ nado tún in do aigba-klo ji.

Na Jehovah ko whlẹn Jona wutu, be enẹ dohia dọ ewọ ma dona yì Nineve ba wẹ ya? Lala. Jehovah sọ vọ́ dọna Jona dọ ni yì dọ́n. To ojlẹ ehe mẹ, Jona setonu. E yì dọ́n bo dọna mẹylankan lọ lẹ dọmọ: ‘To azán 40 godo, Nineve na yin vivasudo.’ To whenẹnu, nuhe e ma donukun de jọ  —Ninevenu lẹ dotoai bo diọ walọ yetọn. Ahọlu Nineve tọn dọna omẹ etọn lẹ dọmọ: ‘Mì dawhá ylọ Jiwheyẹwhe bo lẹnvọjọ. Vlavo enẹ gán zọ́n bọ ewọ ma na và mí sudo.’ Whenue Jehovah mọdọ gbẹtọ lọ lẹ lẹnvọjọ, e masọ và Nineve sudo ba.

E vẹna Jona dọ tòdaho lọ ma yin vivasudo. Lẹnnupọndo ehe ji: Jehovah ko do homẹfa po lẹblanu po hia Jona, ṣigba Jona ma jlo na do lẹblanu hia omẹ Nineve tọn lẹ. Kakatimọ, e yì sinai do oyẹ̀ atinkan de tọn glọ to gbonu tòdaho lọ tọn bo jẹ adidu ji. Enẹgodo, atin lọ kú bọ homẹ sọ gble Jona dogọ. Enẹwutu, Jehovah dọna ẹn dọmọ: ‘Onú atinkan lọ tọn biọlanmẹna we hú omẹ Nineve tọn lẹ tọn. N’do lẹblanu hia yé, enẹ wẹ zọ́n bọ yé do gán.’ Etẹwẹ yin nuagokun lọ? Omẹ Nineve tọn lẹ họakuẹ taun hú atin depope.

“Jehovah . . . to homẹfa na mìtọn wutu, na e ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.”—2 Pita 3:9