Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 56

Josia Yiwanna Osẹ́n Jiwheyẹwhe Tọn

Josia Yiwanna Osẹ́n Jiwheyẹwhe Tọn

Josia lẹzun ahọlu Juda tọn to whenue e tindo owhe ṣinatọ̀n. To azán enẹlẹ gbè, gbẹtọ lẹ nọ doalọ to nujijlẹ po boṣiọ-sinsẹ̀n po mẹ. Whenue Josia tindo owhe 16, e dovivẹnu nado plọn lehe e na nọ sẹ̀n Jehovah to aliho he sọgbe mẹ do. Whenue e tindo owhe 20, e jẹ boṣiọ lẹ po agbà lẹ po họliai ji to aigba lọ pete ji. Podọ to whenue Josia tindo owhe 26, e basi tito na tẹmpli Jehovah tọn nido yin vivọjlado.

To tẹmpli lọ mẹ, yẹwhenọ daho Hilkia mọ owe-hihá he mẹ Osẹ́n Jehovah tọn tin te—vlavo owe-hihá he Mose lọsu yí alọ etọn do kàn lọ. Wekantọ ahọlu tọn Ṣafani ze owe-hihá lọ wá na Josia bo jẹ Osẹ́n lọ hia daga ji. Dile Josia to todoai, e mọdọ akọta lọ ko to tolivẹ na Jehovah na owhe susu. Ahọlu Josia dọna Hilkia dọmọ: ‘Jehovah ko gblehomẹ do mí go taun. Yì kanhose e. Jehovah nasọ dọ nuhe mí dona wà lẹ na mí.’ Jehovah na gblọndo gbọn yẹwhegán-yọnnu Hulda gblamẹ dọmọ: ‘Omẹ Juda tọn lẹ ko gbẹ́ mi dai. Yé na yin yasana, amọ́ e ma na yin to gandudu Josia tọn whenu, na ewọ ko whiwhẹ ede wutu.’

Whenue Ahọlu Josia sè owẹ̀n lọ, e yì tẹmpli mẹ bo ylọ omẹ Juda tọn lẹ pli. Enẹgodo, e hia Osẹ́n Jehovah tọn daga na akọta lọ blebu. Josia po gbẹtọ lọ lẹ po sọ dopà nado yí ahun yetọn lẹpo do setonuna Jehovah.

Akọta Juda tọn ma ko basi hùnwhẹ Juwayi tọn na owhe susu. Ṣigba, whenue Josia hia to Osẹ́n lọ mẹ dọ hùnwhẹ Juwayi tọn dona nọ yin bibasi to whemẹwhemẹ, e dọna akọta lọ dọmọ: ‘Mí na basi hùnwhẹ  Juwayi tọn de hlan Jehovah.’ Enẹwutu, Josia wleawu nado yí kanlin susu do sanvọ́ podọ e basi tito na hànjigbẹ́ de nido jihàn to tẹmpli mẹ. Enẹgodo, akọta lọ basi hùnwhẹ Juwayi tọn po Hùnwhẹ Akla Madotọ́n tọn po na azán ṣinawe. Hùnwhẹ Juwayi tọn ehe nkọ de ma ko yin bibasi pọ́n sọn azán Samuẹli tọn lẹ gbè. Josia yiwanna Osẹ́n Jiwheyẹwhe tọn taun. Be hiẹ lọsu yiwanna nupinplọn gando Jehovah go ya?

“Ohó towe wẹ miyọ́ngbán de na afọ ṣie, podọ hinhọ́n de na ali ṣie.”—Salmu lẹ 119:105