Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 44

Tẹmpli de Yin Gbigbá Na Jehovah

Tẹmpli de Yin Gbigbá Na Jehovah

To whenue Sọlomọni lẹzun ahọlu Islaeli tọn godo, Jehovah dọna ẹn dọ: ‘Etẹwẹ a jlo dọ yẹn ni na we?’ Sọlomọni dọmọ: ‘Jọja de poun wẹ n’yin bo masọ nọ yọ́n nuhe wà n’te. Jaale, na mi nuyọnẹn nado penukundo omẹ towe lẹ go.’ Jehovah sọ dọmọ: ‘Na a biọ nuyọnẹn wutu, yẹn na hẹn we zun mẹhe yọnnuin hugan to aigba ji. N’nasọ hẹn we jẹ adọkun taun. Podọ eyin a setonuna mi, a na nọgbẹ̀ dẹn.’

Sọlomọni jẹ tẹmpli lọ gbá ji. E yí sika, fataka, owhlẹ po zannu dagbe hugan lẹ po zan. Sunnu po yọnnu po azọ́nyọnẹntọ fọtọ́n susu wẹ wazọ́n nado gbá tẹmpli lọ. To owhe ṣinawe godo, tẹmpli lọ ko yin gbigbá fó bọ ojlẹ sọ̀ nado klan ẹn do wiwe na Jehovah. Agbà de tin to e mẹ, ehe ji avọ́nunina lẹ te. Sọlomọni jẹklo to agbà lọ nukọn bo hodẹ̀ dọmọ: ‘Jehovah E, tẹmpli ehe ma klo kavi yọnwhanpẹ sọmọ nado hẹn we, ṣigba jaale bo kẹalọyi sinsẹ̀n-bibasi mítọn bo nọ dotoaina odẹ̀ mítọn lẹ.’ Etẹwẹ Jehovah lẹn gando tẹmpli lọ po odẹ̀ Sọlomọni tọn po go? Tlolo he Sọlomọni dotana odẹ̀ etọn, miyọ́n de tọ́n sọn agahomẹ bo fiọ avọ́nunina he to agbà lọ ji lẹ. Jehovah kẹalọyi tẹmpli lọ. Whenue Islaelivi lẹ mọ ehe, yé gọ́ na ayajẹ.

Ahọlu Sọlomọni yin yinyọnẹn na nuyọnẹn etọn to aigba Islaeli tọn pete ji podọ kaka yì fidindẹn lẹ. Gbẹtọ lẹ nọ wá Sọlomọni dè na e nido gọalọna yé nado didẹ nuhahun yetọn lẹ. Ahọsi Ṣeba tọn lọsu tlẹ wá e dè nado yí kanbiọ gigẹdẹ lẹ do tẹ́n ẹn pọ́n. Whenue e sè gblọndo etọn lẹ, e dọmọ: ‘N’ma yí nuhe gbẹtọ lẹ dọna mi gando gowe sè, amọ́ n’ko wá mọ todin dọ a yọnnuin hugan lehe yé dọ do. Jehovah Jiwheyẹwhe towe ko dona we.’ Gbẹninọ bọawuna akọta Islaeli tọn bọ mẹlẹ sọ tindo ayajẹ. Ṣigba, nulẹ na diọ to madẹnmẹ.

“Pọ́n! mẹde he hugan Sọlomọni tin tofi.”​—Matiu 12:42