Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 48

Visunnu Asuṣiọsi de Tọn Gọwá Ogbẹ̀

Visunnu Asuṣiọsi de Tọn Gọwá Ogbẹ̀

To akúdido lọ whenu, Jehovah dọna Elija dọmọ: ‘Yì tòdaho Zalefati tọn mẹ. Asuṣiọsi de na na we núdùdù to finẹ.’ To họngbo tòdaho lọ tọn ji, Elija mọ asuṣiọsi wamọnọ de he to nake ṣinyan. E biọ ẹ osin kọfo dopo. Dile e jei osin lọ ba gbé, Elija sọ ylọ ẹ bo dọna ẹn dọmọ: ‘Jaale, hẹn akla vude wá na mi.’ Amọ́, asuṣiọsi lọ dọna ẹn dọmọ: ‘Akla depope ma to asi e bọ n’na na we. Linfin pẹẹde po amì vude po wẹ n’tindo nado wleawuna núdùdù kleun de bọ yẹn po visunnu ṣie po na dù.’ Elija dọna ẹn dọmọ: ‘Jehovah ko dopà dọ eyin a wleawu akla de tọn na mi, linfin towe po amì towe po ma na vọ̀ kaka jikun nado ja.’

Enẹwutu, asuṣiọsi lọ yì whégbè bo wleawu akla lọ tọn na yẹwhegán Jehovah tọn. Kẹdẹdile Jehovah ko dopagbe etọn do, asuṣiọsi lọ po visunnu etọn po ma ba núdùdù pò kaka bọ akúdido lọ do wá vivọnu. Ozẹ́n etọn he mẹ linfin te po dehe mẹ amì te lọ po ma jẹvọ́.

 Enẹgodo, nuylankan de jọ. Visunnu pẹvi asuṣiọsi lọ tọn jẹazọ̀n sinsinyẹn bo kú. Nawe lọ vẹ̀ Elija nado gọalọna ẹn. Elija ze visunnu lọ sọn awà etọn mẹ bo hẹn ẹn yì abò aga tọn de mẹ to owhé yọnnu lọ tọn gbè. E sọ tẹ́ ẹ do adọzan de ji bo hodẹ̀ dọmọ: ‘Jehovah, jaale bo hẹn ovi ehe gọwá ogbẹ̀.’ Be a yọ́n nuhewutu nuhe e biọ dọ Jehovah ni wà enẹ do jiawu ya? Na kakajẹ whenẹnu, mẹde ma ko kú bo gọwá ogbẹ̀ pọ́n. Podọ asuṣiọsi lọ po visunnu etọn po ma tlẹ yin Islaelivi.

Ṣigba, ogbẹ̀ visunnu lọ tọn gọwá bọ e jẹ gbigbọ ji! Elija sọ dọna asuṣiọsi lọ dọmọ: ‘Pọ́n! Visunnu towe togbẹ̀.’ Homẹhun nawe lọ sọmọ bọ e dọna Elija dọmọ: ‘Omẹ Jiwheyẹwhe tọn de wẹ hiẹ yin nugbonugbo. N’yọ́n ehe, na nuhe Jehovah dọna we lẹ kẹdẹ wẹ a nọ dọ.’

“Mì doayi ohọ́n lẹ go: Yé ma nọ do jinukun kavi gbẹ̀n; yé ma nọ tindo zínhọ kavi agbànhọ; ṣogan Jiwheyẹwhe nọ na núdùdù yé. Be mìwlẹ ma họakuẹ tlala hú ohẹ̀ lẹ wẹ ya?”​—Luku 12:24

Plọnnu Dogọ

ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN

Asuṣiọsi Zalefati Tọn Mọ Ahọsumẹ Yí Na Yise Etọn Wutu

Fọnsọnku visunnu etọn tọn yin dopo to nujijọ he hẹn yise etọn lodo hugan lẹ mẹ to gbẹzan etọn mẹ. Etẹwẹ mí sọgan plọn sọn ewọ dè?