Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 45

Ahọluduta lọ Má

Ahọluduta lọ Má

Dile e dẹnsọ bọ Sọlomọni to Jehovah sẹ̀n, Islaeli tin to jijọho mẹ. Ṣigba, Sọlomọni dà asi susu sọn aigba devo lẹ ji, bọ yọnnu ehelẹ nọ sẹ̀n boṣiọ lẹ. Vudevude, Sọlomọni diọ bo jẹ boṣiọ lẹ sẹ̀n ji ga. Homẹgble Jehovah. E dọna Sọlomọni dọmọ: ‘Islaeli na yin kinklan sọn whẹndo towe go bo na yin mimá do awe. N’na ze adà daho hugan lọ jo na dopo to devizọnwatọ towe lẹ mẹ bọ whẹndo towe na dugán do adà pẹvi lọ kẹdẹ ji.’

Jehovah sọ hẹn nudide etọn họnwun to aliho devo mẹ. Dopo to devizọnwatọ Sọlomọni tọn lẹ mẹ, he nọ yin Jeloboami, to yìyì to aliji bo dukosọ hẹ Ahija yẹwhegán lọ. Ahijah sọ tlẹ́n tewu etọn do 12 bo dọna Jeloboami dọ: ‘Jehovah na yí ahọluduta Islaeli tọn sọn whẹndo Sọlomọni tọn si bo na má ẹn do awe. Yí tintlẹ́n awù lọ tọn ao, na hiẹ na dugán do hẹnnu ao ji.’ Ahọlu Sọlomọni sè nuhe jọ lọ bo jlo na hù Jeloboami! Enẹwutu, Jeloboami họnyi Egipti. To ojlẹ de godo, Sọlomọni kú bọ visunnu etọn Lehoboami lẹzun ahọlu. To Whenẹnu, Jeloboami mọdọ emi gán lẹkọyi Islaeli bọ nude ma na jọ.

Mẹho Islaeli tọn lẹ dọna Lehoboami dọ: ‘Eyin a yinuwa hẹ gbẹtọ lọ lẹ ganji, yé na yin nugbonọ na we.’ Ṣigba, họntọn  Lehoboami tọn jọja lẹ dọna ẹn dọ: ‘A dona hẹn ogbẹ̀ vẹawuna mẹlẹ! Hẹn azọ́n yetọn sinyẹn hú dai tọn!’ Lehoboami dotoaina ayinamẹ jọja lọ lẹ tọn. E ylanhùn do gbẹtọ lọ lẹ go bọ yé wá ṣiatẹ sọta ẹ. Yé yí Jeloboami do doahọlu do hẹnnu ao ji, ehe wá yin yinyọnẹn taidi ahọluduta Islaeli tọn. Hẹnnu awe he pò lẹ wá yin yinyọnẹn taidi ahọluduta Juda tọn bọ yé yin nugbonọ na Lehoboami. Hẹnnu 12 Islaeli tọn lẹ ko yin mimá todin.

Jeloboami ma jlo dọ omẹ etọn lẹ ni nọ yì basi sinsẹ̀n to Jelusalẹm, yèdọ to ahọluduta Lehoboami tọn mẹ. Be a yọ́n nuhe zọ́n ya? E to budi dọ yé na wá gbẹ́ emi dai bo na nọgodona Lehoboami. Enẹwutu, e basi oyìnvu sika tọn awe bo dọna omẹ etọn lẹ dọ: ‘Jelusalẹm ko dẹn gbau. Mì gán basi sinsẹ̀n tofi.’ Gbẹtọ lọ lẹ sọ jẹ sinsẹ̀n basi hlan oyìnvu sika tọn lẹ ji bo wọn Jehovah whladopo dogọ.

“Mì biọ zẹgẹ he ma sọzẹn de glọ hẹ mayisenọ lẹ blo. Na haṣinṣan tẹwẹ dodowiwa po sẹ́nhẹngba po tindo? . . . Kavi kọndopọ tẹwẹ yisenọ de tindo hẹ mayisenọ de?”—2 Kọlintinu lẹ 6:14, 15