Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 41

Davidi po Sauli Po

Davidi po Sauli Po

To whenue Davidi ko hù Goliati godo, Ahọlu Sauli de e taidi awhàngán etọn. Davidi gbawhàn susu bo wá diyin taun. Whedepopenu he Davidi yì funawhàn bo lẹkọ, yọnnu lẹ nọ tọ́n wá pé e bo nọ to wedu bosọ nọ to hànji dọmọ: ‘Sauli ko hù fọtọ́n lẹ bọ Davidi hù fọtọ́n donu ao lẹ!’ Enẹwutu, Sauli jẹ awuwhàn Davidi ji bo jlo na hù i.

Davidi yọ́n ajalẹn hò ganji. To gbèdopo he e to ajalẹn hò na Sauli, ahọlu lọ yìn owhán etọn do e. Pẹẹde wẹ e pò na Davidi, amọ́ e vì na owhán lọ bọ e biọ adó mẹ. Enẹgodo, Sauli tẹnpọn whlasusu nado hù Davidi. To godo mẹ, Davidi gbọ bo yì họ̀n whlá do danfafa ji.

Sauli plan awhànfuntọ 3 000 bo tọ́nyi nado yangbé Davidi tọn. To mayọnẹn mẹ, e yì biọ oslò he mẹ Davidi po omẹ etọn lẹ po họ̀n whlá do. Mẹhe topọ hẹ Davidi lẹ sọ  depá na ẹn dọ: ‘Dotẹnmẹ hundote lọ die nado hù Sauli.’ Davidi wà dẹẹdẹ yì Sauli dè bo sán tónu na awù ahọlu lọ tọn. Sauli ma doayi e go. Amọ́, Davidi wá dowhẹ ede, na e ma do sisi hia ahọlu yiamisisadode Jehovah tọn wutu. E ma dike omẹ etọn lẹ ni tọ́navùn Sauli. E tlẹ dawhá ylọ Sauli bo dọna ẹn dọ emi gán ko hù i to whenue dotẹnmẹ lọ hundote na emi nado wàmọ. Be Sauli na diọlinlẹn gando Davidi go ya?

Lala. Sauli gbẹ́ to ogbé Davidi tọn yàn janwẹ. To zánmẹ gbèdopo, Davidi po ylọnẹn-ylọvi etọn Abiṣai po yì fie Sauli dosla do. Mẹhe to finẹ lẹpo wẹ to amlọndọ kakajẹ Abnẹli, mẹhe nọ basi hihọ́na ahọlu ji. Abiṣai dọmọ: ‘Dotẹnmẹ hundote dagbe lọ die! Dike ma hù i.’ Davidi gblọn dọ: ‘Jehovah lọsu wẹ na yiahọsu to Sauli go. Gbọ mí ni ze owhán po osingo etọn po bo tọ́n sọn fi.’

Davidi sọ hẹ osó he sẹpọ finẹ de ji nado pọ́n osla Sauli tọn mẹ hlan. E dawhá dọmọ: ‘Abnẹli e, naegbọn a ma do basi hihọ́na ahọlu towe? Fie wẹ owhán po osingo Sauli tọn po te?’ Sauli sè ogbè lọ bo yọnẹn dọ Davidi wẹ, e sọ dọmọ: ‘A gán ko hù mi, ṣogan a ma wàmọ. N’yọnẹn dọ hiẹ wẹ na duahọlu bọdego to Islaeli.’ Sauli lẹkọyi họ̀nmẹ etọn. Amọ́, e ma yin mẹhe to whẹndo Sauli tọn mẹ lẹpo wẹ gbẹwanna Davidi.

“Eyin e yọnbasi, dile mì penugo do, mì nọ nọ̀ jijọho mẹ hẹ gbẹtọ lẹpo. Mẹyiwanna lẹ emi, mì yiahọsu na mìde blo, ṣigba mì natẹn homẹgble.”—Lomunu lẹ 12:18, 19

Plọnnu Dogọ

SINIMA

Davidi—E Dejido Jiwheyẹwhe Go

Davidi ṣinuwa to gbẹzan etọn mẹ bosọ pehẹ nuhahun susu, ṣigba e ma doalọtena Jiwheyẹwhe sinsẹ̀n gbede. Apajlẹ dagbe etọn sọgan gọalọna we nado gbọṣi nugbonọ-yinyin mẹ.