Susu Islaelivi lẹ tọn sọ vọ́ jẹ boṣiọ sẹ̀n ji, enẹwutu Jehovah jo aigba yetọn do alọ Filistinu lẹ tọn mẹ. Ṣigba, Islaelivi delẹ gbẹ́ yiwanna Jehovah. Dopo to yé mẹ wẹ dawe de he nọ yin Manoa. Ewọ po asi etọn po ma tindo ovi depope. To gbèdopo, Jehovah do angẹli de hlan asi Manoa tọn dè. Angẹli lọ dona ẹn dọmọ: ‘Hiẹ na ji visunnu de. Ewọ wẹ na whlẹn Islaeli sọn alọ Filistinu lẹ tọn mẹ. Nazili de wẹ ewọ na yin.’ Be a yọ́n mẹhe nọ yin yiylọdọ Nazili lẹ ya? Devizọnwatọ Jehovah tọn delẹ wẹ he nọ sẹ̀n ẹn to aliho vonọtaun mẹ. Nazili lẹ ma nọ yin dotẹnmẹna nado pà oda yetọn.

To nukọn mẹ, visunnu Manoa tọn yin jiji, bọ e ylọ ẹ dọ Samsọni. Whenue Samsọni whẹ́n, Jehovah na ẹn huhlọn taun. E sọgan yí alọ tata do hù kinnikinni. To gbèdopo, Samsọni kẹdẹ hù Filistinu 30. Filistinu lẹ gbẹwanna ẹn bo nọ to ayiha kàn nado hù i. To zánmẹ gbèdopo, dile Samsọni to amlọndọ to Gaza, yé yì nọtepọn ẹn to họngbo tòdaho lọ tọn kọ̀n nado hù i to wunkẹngbe. Ṣigba to zánhomẹ, Samsọni fọ́n bo yì họngbo tòdaho lọ tọn kọ̀n bosọ sún họngbo lọ sẹ̀ sọn adó mẹ. E sọ ze họngbo lọ do abọ́ etọn lẹ ji bo hẹji yì osó de ji sẹpọ Heblọni!

To godo mẹ, Filistinu lẹ yì asi mọdo-aliji Samsọni tọn he nọ yin Dẹlila dè, bo dọna ẹn dọ: ‘Mí na na we fataka-kuẹ fọtọ́n susu eyin a tẹnpọn bo yọ́n nuhewutu Samsọni do dohuhlọn sọmọ. Mí jlo na wle e bo ze e do gànpamẹ.’ Akuẹ lọ biọ nukun mẹ na Dẹlila, enẹwutu e yigbe. To bẹjẹeji, Samsọni gbẹ́ nado dọ nuhewutu e do dohuhlọn sọmọ na ẹn. Ṣigba, yọnnu lọ to tuklado e sọmọ bọ e gbọ bo dọ aṣli etọn na ẹn. E dọna ẹn dọmọ: ‘Oda ṣie ma ko yin pipà pọ́n gbede, na Nazili de wẹ n’yin wutu. Eyin oda ṣie yin pipà, n’ma nasọ dohuhlọn ba.’ Samsọni ma dona ko dọ mọ na yọnnu lọ, kavi na?

 Dẹlila yawu yì mọ Filistinu lẹ bo dọna yé dọmọ: ‘N’ko yọ́n aṣli etọn!’ E sọ hẹn Samsọni damlọn do akọ̀n etọn ji, enẹgodo e ylọ mẹde bọ e wá pà oda etọn sẹ̀. Dẹlila sọ dawhá dọmọ: ‘Samsọni, Filistinu lẹ tọ́ngbé towe!’ Samsọni yín fọ́n bo masọ dohuhlọn ba. Filistinu lẹ wle e bo tọ́nnukunna ẹn bosọ ze e do gànpamẹ.

To gbèdopo, Filistinu fọtọ́n susu pli dopọ to tẹmpli yẹwhe yetọn Dagọni tọn mẹ bo to awhádo dọmọ: ‘Yẹwhe mítọn ko jo Samsọni do alọ mítọn mẹ! Mì dọ̀n Samsọni tọ́n! Mì gbọ ni wá do nukiko na mí.’ Yé hẹn ẹn ṣite to dòtin awe ṣẹnṣẹn bosọ to ṣinṣàn ẹn kò. Samsọni sọ dawhá dọmọ: ‘Jehovah E, jaale bo na mi huhlọn whladopo ehe poun.’ To ojlẹ enẹ mẹ, oda Samsọni tọn ko sọ vọ́ wú ganji. E yí huhlọn etọn lẹpo do sisẹ́ dòtin tẹmpli lọ tọn lẹ. Ohọ̀ lọ blebu sọ họ́ bo hù mẹhe to tẹmpli lọ mẹ lẹpo, bọ Samsọni lọsu kú.

“To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.”​—Filipinu lẹ 4:13