Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 33

Luti po Naomi Po

Luti po Naomi Po

To ojlẹ de mẹ he huvẹ tọ́n to Islaeli, Islaelivi de he nọ yin Naomi sẹtẹn yì aigba Moabi tọn ji po asu etọn po, gọna visunnu yetọn awe lẹ. To nukọn mẹ, asu Naomi tọn kú. Visunnu etọn lẹ dà Luti po Olpa po, yèdọ yọnnu Moabinu lẹ. E blawu dọ, to ojlẹ de godo, visunnu Naomi tọn lẹ kú.

To whenue Naomi sè dọ huvẹ lọ ko doalọte to Islaeli, e basi dide nado lẹkọyi whé. Luti po Olpa po sọ hodo e, ṣigba to whenue yé to aliji, Naomi dọna yé dọmọ: ‘Asi dagbe wẹ mì ko yin na visunnu ṣie lẹ bosọ yin ovisi dagbe na yẹnlọsu. N’jlo dọ mì omẹ awe lẹ ni mọ asu devo dà. Mì lẹkọyi Moabi.’ Yọnnu lọ lẹ dọmọ: ‘Mí yiwanna we! Mí ma jlo na jo we do.’ Naomi to didọna yé mapote dọ yé ni yì. To godo mẹ, Olpa lẹkọyi whé, amọ́ Luti gbọṣi e dè. Naomi dọna ẹn dọmọ: ‘Olpa ko lẹkọyi omẹ mìtọn lẹ po yẹwhe mìtọn lẹ po dè. Hodo e yì.’ Ṣigba, Luti dọmọ: ‘N’ma na jo we do. Omẹ towe lẹ na lẹzun omẹ ṣie lẹ, podọ Jiwheyẹwhe towe na lẹzun Jiwheyẹwhe ṣie.’ Numọtolanmẹ tẹwẹ a lẹndọ Naomi na ko tindo to whenue Luti dọ mọ?

Luti po Naomi po jẹ Islaeli to whenue jibẹwawhé balekun tọn ṣẹṣẹ bẹ. To gbèdopo, Luti yì jinukun he yin pipò dai lẹ ṣinyan gbé to ogle dawe de he nọ yin Boazi tọn mẹ, yèdọ visunnu Lahabi tọn. Dawe lọ sè dọ Moabinu de wẹ Luti yin bo yí nugbonọ-yinyin do gbọṣi Naomi dè. E dọna azọ́nwatọ etọn lẹ dọ yé ni pò jinukun vude dai dogọ do ogle lọ mẹ, na Luti nido ṣinyan.

 To whèjai enẹ, Naomi kanse Luti dọ: ‘Ogle mẹnu tọn mẹ wẹ a wazọ́n te to egbé?’ Luti dọmọ: ‘To ogle dawe de he nọ yin Boazi tọn mẹ.’ Naomi sọ dọna ẹn dọ: ‘Dopo to hẹnnumẹ asu ṣie tọn lẹ mẹ wẹ Boazi yin. Nọ wazọ́n to ogle etọn mẹ hẹ jọja yọnnu he pò lẹ. A na tin to hihọ́ glọ to finẹ.’

Luti zindonukọn nado to azọ́nwa to ogle Boazi tọn mẹ kakajẹ whenue jibẹwawhé lọ wá vivọnu. Boazi doayi e go dọ azọ́n sinsinyẹnwatọ wẹ Luti yin bosọ yin yọnnu walọ dagbenọ de. To ojlẹ enẹlẹ mẹ, eyin sunnu de kú bo ma ji visunnu de, hẹnnumẹ etọn de nọ dà asi he e kú jodo lọ. Enẹwutu, Boazi dà Luti. Yé sọ ji visunnu de he nọ yin Obẹdi, mẹhe to nukọn mẹ wá lẹzun baba-daho Ahọlu Davidi tọn. E vivi na họntọn Naomi tọn lẹ taun. Yé sọ dọmọ: ‘Jehovah ko na we Luti jẹnukọn, yèdọ mẹhe yinuwa hẹ we to aliho dagbe mẹ, podọ todin a ko sọ tindo ovivi de. Pipà ni tin hlan Jehovah.’

“Họntọn delẹ tin he nọ sẹpọ yede pẹkipẹki hú nọvisunnu.”​—Howhinwhẹn lẹ 18:24

Plọnnu Dogọ

HODO APAJLẸ YISE YETỌN TỌN

Luti—“Yọnnu Walọ Dagbenọ De”

Naegbọn alọwle Luti po Boazi po tọn do jẹna ayidego? Etẹwẹ mí sọgan plọn sọn Luti po Naomi po dè gando whẹndo go?

YẸDIDE OTÀN BIBLU TỌN LẸ TỌN

Luti Yin Họntọn Nugbonọ De

Mahopọnna dọ e ma yin Islaelivi, nugbonọ-yinyin etọn zọ́n bọ e mọ nukundagbe Jiwheyẹwhe tọn podọ ehe hẹn dona jiawu de wá na ẹn.

HODO APAJLẸ YISE YETỌN TỌN

Luti—“Fie Hiẹ Jei Wẹ Yẹn Na Yì”

Naegbọn Luti tindo ojlo nado jo hẹnnumẹ etọn lẹ po otò etọn po do? Jẹhẹnu tẹwẹ e dohia he yin nuhọakuẹ to nukun Jehovah tọn mẹ?

YẸDIDE MẸHE GO BIBLU DONÙ LẸ TỌN

Yẹdide Naomi Tọn

To whenue asu etọn po visunnu etọn lẹ po kú godo, e biọ to họntọn etọn lẹ si nado yí yinkọ devo do ylọ ẹ.

YẸDIDE NUPINPLỌN TỌN LẸ

Họntọn Nugbo Naomi Tọn

Nupinplọn ehe nọ gọalọna ovi he tin to gblagbla owe 3 jẹ 6 tọn mẹ lẹ nado plọnnu gando Naomi po Luti po go.

YẸDIDE NUPINPLỌN TỌN LẸ

Plọnnu sọn Jẹhẹnu Luti Tọn lẹ Mẹ

Nupinplọn ehe nọ gọalọna ovi he tin to gblagbla owhe 6 jẹ 8 tọn mẹ lẹ nado plọn lehe yé na yin họntọn dagbe do.

OWE NUPINPLỌN TỌN LẸ NA OVI LẸ

Jẹhẹnu He Họntọn Dagbe de Nọ Tindo Lẹ

Nupinplọn ehe nọ gọalọna ovi he tin to gblagbla owhe 8 jẹ 12 tọn mẹ lẹ nado wleawuna jẹhẹnu he họntọn dagbe de nọ tindo lẹ.