Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 29

Jehovah De Jọṣua

Jehovah De Jọṣua

To whenue Mose ko deanana akọta Islaeli tọn na owhe susu godo, e wá poyọnho pete. Jehovah dọna ẹn dọmọ: ‘E ma yin hiẹ wẹ na plan Islaelivi lẹ yì Aigba Pagbe tọn lọ ji. Amọ́, n’na dike bọ a na mọ aigba lọ hlan.’ Enẹwutu, Mose dọna Jehovah dọ ni de nukọntọ devo nado penukundo mẹlọ lẹ go. Jehovah dọna ẹn dọmọ: ‘Yì Jọṣua dè bo dọna ẹn dọ ewọ wẹ yẹn de.’

Mose dọna akọta lọ dọ emi na kú to madẹnmẹ, podọ Jehovah ko de Jọṣua taidi nukọntọ he na plan yé yì Aigba Pagbe tọn lọ ji. Enẹgodo, Mose dọna Jọṣua dọ: ‘A dibu blo. Jehovah na gọalọna we.’ Ojlẹ vude to enẹgodo, Mose yì aga pete Osó Nebo tọn bọ Jehovah do aigba he E ko dopagbe etọn na Ablaham, Isaki po Jakọbu po lọ hia ẹ. Owhe 120 wẹ Mose tindo to whenue e kú.

Jehovah dọna Jọṣua dọmọ: ‘Dasá Tọ̀sisa Jọdani bo yì Kenani. N’na gọalọna we dile n’gọalọna Mose do. Hẹn ẹn diun dọ a nọ hia Osẹ́n ṣie egbesọegbesọ. Ma dibu blo. Yin adọgbotọ. Yì bo wà nuhe yẹn ko degbena we nado wà.’

 Jọṣua do amẹ́ awe hlan tòdaho Jẹliko tọn mẹ. To otàn he bọdego mẹ, mí na plọnnu dogọ gando nuhe jọ to finẹ go. To whenue yé lẹkọ, yé dọ dọ ojlẹ dagbe lọ die nado yì Kenani. To wunkẹngbe, Jọṣua dọna akọta lọ dọ yé ni wleawu nado dedo. Enẹgodo, e dọna yẹwhenọ he hẹn apotin alẹnu tọn lọ lẹ nado nọ nukọn na yé yì Tọ̀sisa Jọdani kọ̀n. To ojlẹ enẹ mẹ, otọ̀ lọ ko gọ́. Ṣigba, tlolo he afọ yẹwhenọ lọ lẹ tọn biọ osin lọ mẹ, otọ̀ lọ doalọtena sisà bọ osin he to e mẹ hú! Yẹwhenọ lọ lẹ zinzọnlin gbọn aigba húhú ji yì ṣẹnṣẹn tọ̀sisa lọ tọn bo nọte to finẹ kaka akọta Islaeli tọn pete do dasá yì awà awetọ ji. Be a lẹndọ azọ́njiawu ehe na ko hẹn yé flin nuhe Jehovah wà to Ohù Vẹẹ kọ̀n ya?

To godo mẹ, to owhe planplan enẹlẹ godo, Islaelivi lẹ ko wá tin to Aigba Pagbe tọn lọ ji. Yé sọgan gbá ohọ̀ lẹ bo do tòdaho lẹ ai. Yé sọgan lẹ̀ ogle bo do vẹngle po atin he na de sinsẹ́n tọ́n lẹ po. Aigba he ji anọ́sin po owín po to sisà te de wẹ.

“Jehovah na nọ deanana we to whepoponu bo na nọ hẹn pekọ wá na we etlẹ yin to aigba-klo de ji.”​—Isaia 58:11