Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 25

Gòhọtúntún de Na Sinsẹ̀n-Bibasi

Gòhọtúntún de Na Sinsẹ̀n-Bibasi

To whenue Mose to Osó Sinai ji, Jehovah dọna ẹn dọ ni gbá gòhọ vonọtaun de he na nọ yin yiylọdọ gòhọtúntún, na Islaelivi lẹ nido nọ sẹ̀n Emi to e mẹ. Yé na nọ ze gòhọtúntún lọ pé dile yé na to tẹnsẹ.

Jehovah dọmọ: ‘Dọna omẹ lọ lẹ dọ yé ni na nudepope he go yé pé, na gòhọtúntún lọ nido yin gbigbá.’ Islaelivi lẹ na sika, fataka, gànvẹẹ, zannu akuẹgegenu tọn lẹ po aṣọ́donu lẹ po. Yé sọ na sekan, alavọ, ayú kanlin lẹ tọn po nususu devo lẹ po. Yé hẹn nunina susu wá sọmọ bọ Mose gbọ bo dọna yé dọ: ‘E pé! Mì masọ hẹn nude wá dogọ blo.’

Sunnu po yọnnu po azọ́nyọnẹntọ susu wẹ gọalọ nado gbá gòhọtúntún lọ. Jehovah na yé nuyọnẹn nado wazọ́n lọ. Mẹdelẹ gbẹ̀n sekan, lọ̀n alavọ lẹ kavi kó yẹdide lẹ do avọ̀ lẹ go. Mẹdevo lẹ to zannu lẹ debọdo dego, yí sika do wazọ́n, kavi pà owhlẹ lẹ.

Yé gbá gòhọtúntún lọ kẹdẹdile Jehovah dọna yé do. Yé basi họmẹgbòvọ̀ dagbedagbe de nado má gòhọtúntún lọ do awe, enẹ wẹ Fiwiwe lọ po Fiwiwe Gbaugbau lọ po. Apotin alẹnu tọn he yè yí owhlẹ akasia tọn po sika po do basi lọ yin zizedo Fiwiwe Gbaugbau lọ mẹ. Miyọ́ngbán-tin sika tọn po tafo de po, gọna agbà he ji nuyọnwan nọ yin mimẹ̀ te wẹ nọ nọ̀ Fiwiwe lọ mẹ. Basia gànvẹẹ tọn de po agbà daho de po yin zizedo awánu lọ mẹ. Apotin alẹnu tọn lọ nọ flinnu Islaelivi lẹ dọ yé ko dopà nado setonuna Jehovah. Be a yọ́n  nuhe alẹnu de zẹẹmẹdo ya? Pàdido titengbe de wẹ.

Jehovah de Aalọn po visunnu etọn lẹ po nado nọ wazọ́n taidi yẹwhenọ lẹ to gòhọtúntún lọ mẹ. Yé dona nọ penukundego bo nọ basi avọ́nunina lẹ hlan Jehovah to finẹ. Aalọn he yin yẹwhenọ daho lọ kẹdẹ wẹ tindo jlọjẹ nado biọ Fiwiwe Gbaugbau lọ. E nọ biọ e mẹ whladopo to owhe dopo mẹ nado basi avọ́sinsan de na ylando edetiti tọn lẹ, whẹndo etọn tọn lẹ po akọta Islaeli tọn blebu tọn po.

Islaelivi lẹ gbá gòhọtúntún lọ fó owhe dopo to whenue yé ko tọ́n sọn Egipti godo. Todin, yé tindo nọtẹn de he mẹ yé na nọ sẹ̀n Jehovah te.

Jehovah yí gigo etọn do gọ́ gòhọtúntún lọ mẹ bo hẹn aslọ de sọawuhia to e ji. Eyin aslọ lọ gbọṣi aga na gòhọtúntún lọ, Islaelivi lẹ nọ gbọṣi fihe yé te. Ṣigba eyin aslọ lọ sẹtẹn, yé nọ yọnẹn dọ ojlẹ ko sọ̀ na yé nado dedo. Yé nọ tún gòhọtúntún lọ bo nọ hodo aslọ lọ.

“Enẹwutu, n’sè ogbè lélé de sọn ofìn lọ kọ̀n dọmọ: ‘Mì pọ́n! Gòhọ Jiwheyẹwhe tọn tin to gbẹtọvi lẹ dè, ewọ nasọ nọhẹ yé, yé nasọ yin omẹ etọn lẹ. Podọ Jiwheyẹwhe lọsu na tin po yé po.’”—Osọhia 21:3

Plọnnu Dogọ

OWE WIWE LẸ—LẸDOGBEDEVOMẸ AIHỌN YỌYỌ TỌN

Gòhọtúntún po Yẹwhenọ Daho Po

Pọ́n yẹdide gòhọtúntún lọ tọn gọna awù he yẹwhenọ daho Islaeli tọn nọ do lẹ.