Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 27

Yé Ṣiatẹ Sọta Jehovah

Yé Ṣiatẹ Sọta Jehovah

To ojlẹ de godo, whenue Islaelivi lẹ gbẹ́ to danfafa ji, Kola, Datani, Abilami po omẹ 250 devo lẹ po ṣiatẹ sọta Mose. Yé dọna Mose po Aalọn po dọmọ: ‘Agbọ́ mìtọn ko pé mí! Naegbọn e do yindọ hiẹ wẹ yin nukọntọ mítọn bọ Aalọn yin yẹwhenọ daho? Mímẹpo wẹ Jehovah tin hẹ, e ma yin hiẹ po Aalọn po kẹdẹ.’ Ehe ma vivi na Jehovah. E pọ́n nuyiwa yetọn hlan taidi dọ ewọ wẹ yé to atẹṣi sọta!

Mose dọna Kola po godonọnamẹtọ etọn lẹ po dọmọ: ‘Mì yí nuyọnwan do miyọ́n-hẹnnú mìtọn lẹ mẹ bo hẹn yé wá gòhọtúntún lọ kọ̀n to osọ. Jehovah na do mẹhe ewọ ko de hia mí.’

To aihọngbè, Kola po sunnu 250 lọ lẹ po yì pé Mose to gòhọtúntún lọ kọ̀n. Yé sọ mẹ̀ nuyọnwan to finẹ taidi dọ yẹwhenọ wẹ yé yin nkọ. Jehovah dọna Mose po Aalọn po dọmọ: ‘Mì klan mìde dovo na Kola po omẹ etọn lẹ po.’

Dile etlẹ yindọ Kola wá pé Mose to gòhọtúntún lọ kọ̀n, Datani, Abilami po whẹndo yetọn lẹ po gbẹ́ dọ emi ma ja. Jehovah dọna Islaelivi lẹ dọ yé ni sẹ̀ jẹla na gòhọ Kola, Datani po Abilami po tọn lẹ.  To afọdopolọji, Islaelivi lẹ sẹ̀ jẹla. Datani, Abilami po whẹndo yetọn lẹ po sọ ṣite to gòhọ yetọn lẹ nukọn. To ajiji mẹ, aigba zẹ̀ do awe bo ze yé mì! To gòhọtúntún lọ kọ̀n, miyọ́n de wá sọn olọn mẹ bo fiọ Kola po sunnu 250 etọn lẹ po.

Enẹgodo, Jehovah dọna Mose dọmọ: ‘Yí opò de sọn nukọntọ hẹnnu dopodopo tọn si bo kàn yinkọ yetọn do opò lọ lẹ go. Ṣigba, yinkọ Aalọn tọn wẹ a ni kàn do opò whẹndo Levi tọn go. Bẹ opò lọ lẹ do gòhọtúntún lọ mẹ, podọ opò sunnu he yẹn de lọ tọn na wú vounvoun lẹ.’

To azán he bọdego gbè, Mose bẹ opò lọ lẹpo tọ́n bo do yé hia nukọntọ lọ lẹ. Vounvoun po sinsẹ́n almọndi tọn he bia lẹ po ko wú do opò Aalọn tọn go. Gbọnmọ dali, Jehovah dohia dọ Aalọn wẹ emi de nado yin yẹwhenọ daho.

“Mì nọ setonuna mẹhe to anadenanu to ṣẹnṣẹn mìtọn lẹ bo nọ litai.”​—Heblu lẹ 13:17

Plọnnu Dogọ

YẸDIDE MẸHE GO BIBLU DONÙ LẸ TỌN

Yẹdide Kola He to Biblu mẹ Tọn

Mí sọgan plọn onú titengbe de sọn nuṣiwa etọn lẹ mẹ.