Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 17

Mose De Nado Sẹ̀n Jehovah

Mose De Nado Sẹ̀n Jehovah

To Egipti, whẹndo Jakọbu tọn wá yin yinyọnẹn taidi Islaelivi lẹ. To okú Jakọbu po Josẹfu po tọn godo, Falo yọyọ de jẹ gandu ji. E dibu to whenue e mọdọ Islaelivi lẹ jẹ huhlọn tindo ji hú Egiptinu lẹ. Enẹwutu, Falo ehe yí Islaelivi lẹ do basi afanumẹ. E nọ hẹn yé po huhlọn po nado mẹ̀ bliki lẹ bo wazọ́n sinsinyẹn to glemẹ. Ṣigba, lehe Egiptinu lẹ to hinhẹn yé po huhlọn po nado wazọ́n sinsinyẹn sọ, mọ wẹ Islaelivi lẹ nọ to susudeji to sọha mẹ do niyẹn. Na ehe ma vivi na Falo wutu, e degbe dọ eyin Islaelivi de jivi bọ e yin sunnu, ovi lọ dona yin hùhù. Be a gán yí nukun homẹ tọn do pọ́n lehe Islaelivi lẹ na ko dibu do sọ ya?

Yọnnu Islaelivi de he nọ yin Jokebẹdi ji visunnu he yọnwhanpẹ taun de. Nado basi hihọ́na ẹn, e ze e do ohà de mẹ bo whlá ẹ do ofánkan Tọ̀sisa Nile tọn lẹ ṣẹnṣẹn. Nọviyọnnu viyẹyẹ lọ tọn, Miliami, nọte sẹpọ filọ nado pọ́n nuhe na jọ.

Viyọnnu Falo tọn wá awulẹ gbé to tọ̀sisa lọ mẹ bo mọ ohà lọ. E mọ viyẹyẹ he to avivi  de to e mẹ bọ onú ovi lọ tọn biọlanmẹna ẹn. Miliami sọ kanse e dọ: ‘Be n’gán yì dín yọnnu de wá he na penukundo ovi lọ go na we ya?’ Viyọnnu Falo tọn yigbe bọ Miliami yì plan onọ̀ etọn Jokebẹdi wá. To whenẹnu, viyọnnu Falo tọn dọna ẹn dọmọ: ‘Ze ovi ehe bo penukundego na mi, yẹn nasọ suahọ we.’

Whenue ovi lọ ko whẹ́n godo, Jokebẹdi plan ẹn jo na viyọnnu Falo tọn bọ ewọ do yinkọ na ẹn dọ Mose bo plọn ẹn taidi visunnu etọn titi. Mose yin pinplọn whẹ́n taidi ahọvi de bo gán mọ nuhe jlo e lẹpo yí. Ṣigba, Mose ma wọn Jehovah gbede. E yọnẹn ganji dọ Islaelivi de wẹ emi yin, emi ma yin Egiptinu. Podọ e de nado sẹ̀n Jehovah.

To whenue Mose tindo owhe 40, e de nado gọalọna omẹ etọn lẹ. To gbèdopo he Mose mọdọ Egiptinu de to afanumẹ Islaelivi de hò, e linú Egiptinu lọ sinsinyẹn bọ e kú. Enẹgodo, e whlá oṣiọ lọ do okọ́ glọ. Whenue Falo sè nuhe jọ, e tẹnpọn nado hù Mose. Ṣigba, Mose họnyi aigba Midiani tọn ji. Jehovah penukundego to dọ́n.

“Gbọn yise dali . . . Mose . . . gbẹ́ nado yin yiylọdọ visunnu viyọnnu Falo tọn tọn, bo de nado yin yasana po omẹ Jiwheyẹwhe tọn lẹ po.—Heblu lẹ 11:24, 25