Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 3

Adam po Evi po Vẹtolina Jiwheyẹwhe

Adam po Evi po Vẹtolina Jiwheyẹwhe

To gbèdopo he Evi to edeṣo, odàn de dọhona ẹn. E kanse e dọ: ‘Be nugbo wẹ dọ Jiwheyẹwhe gbẹ́ dọ mì ni ma dù sọn depope to atin-sinsẹ́n lọ lẹ mẹ blo ya?’ Evi dọmọ: ‘Mí sọgan dù sọn sinsẹ́n atin lọ lẹpo tọn mẹ adavo dopo gee. Eyin mí dù sinsẹ́n atin enẹ tọn, mí na kú.’ Odàn lọ dọmọ: ‘Mì ma na kú. Na nugbo tọn, eyin mì dù sọn e mẹ, mì na taidi Jiwheyẹwhe.’ Be nugbo wẹ ya? Lala, lalo wẹ. Amọ́, Evi yí i sè. Dile Evi to atin-sinsẹ́n lọ pọ́n do sọ, mọ wẹ e to jijlo e do niyẹn. E dù atin-sinsẹ́n lọ bosọ na Adam sọn e mẹ. Adam yọnẹn dọ yé na kú eyin yé vẹtolina Jiwheyẹwhe. Etomọṣo, e dù atin-sinsẹ́n lọ janwẹ.

To whèjai gbenẹgbe, Jehovah dọhona Adam po Evi po. E kàn nuhewutu yé do vẹtolina ẹn sè. Evi dọ dọ odàn lọ wẹ zọ́n, bọ Adam dọ dọ Evi wẹ zọ́n. Na Adam po Evi po vẹtolina Jehovah wutu, e de yé sọn jipa lọ mẹ. E sọ ze angẹli lẹ po ohí he to miyọ́n-gbò de po do họngbo lọ nù, na yé nikaa lẹkọyi jipa lọ mẹ.

Jehovah dọ dọ mẹhe dolalo na Evi lọsu na jiya ga. Na taun tọn, e ma yin odàn lọ wẹ dọhona Evi. Jehovah ma na nugopipe odàn lẹ nado nọ dọho. Angẹli ylankan de wẹ hẹn odàn lọ nado dọho. E wàmọ nado klọ Evi. Angẹli enẹ nọ yin Satani Lẹgba. To sọgodo, Jehovah na và Satani sudo bọ e ma nasọ nọ klọ gbẹtọ lẹ nado wà nuylankan ba.

“Lẹgba . . . hlọnhutọ de wẹ ewọ sọn bẹjẹeji, e masọ nọ nọte to nugbo mẹ, na nugbo ma tin to ewọ mẹ wutu.” —Johanu 8:44, nudọnamẹ odò tọn