Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 97

Kọneliọsi Mọ Gbigbọ Wiwe Yí

Kọneliọsi Mọ Gbigbọ Wiwe Yí

Awhàngán Lomu tọn nukundeji de tin to Sesalea bo nọ yin Kọneliọsi. Dile etlẹ yindọ e ma yin Ju de, Ju lẹ nọ na ẹn sisi taun. E nọ gbọn alọtútlú dali gọalọna wamọnọ lẹ po agbátọnọ lẹ po. Kọneliọsi yí Jehovah sè bo nọ hodẹ̀ hlan ẹn whẹwhẹ. To gbèdopo, angẹli de sọawuhia Kọneliọsi bo dọmọ: ‘Jiwheyẹwhe ko sè odẹ̀ towe lẹ. Todin, domẹhlan tòdaho Jọppa tọn mẹ, fihe Pita te, bo biọ to e si nado wá dè we.’ To afọdopolọji, Kọneliọsi do sunnu atọ̀n hlan Jọppa, he tin to hùwaji bo dẹn do finẹ na nudi kilomẹtlu 50.

To ojlẹ dopolọ mẹ to Jọppa, Pita mọ numimọ de. E mọ kanlin delẹ he osẹ́n ko yin didona Ju lẹ ma nado dù, enẹgodo e sè ogbè de he to didọna ẹn dọ ni dù yé. Pita gbẹ́, bo dọmọ: ‘N’ma ko dù kanlin mawé de pọ́n to gbẹzan ṣie mẹ.’ Ogbè lọ sọ dọna ẹn dọmọ: ‘Ma ylọ kanlin ehelẹ dọ mawé blo. Jiwheyẹwhe ko hẹn yé zun wiwe.’ E sọ yin didọna Pita dọmọ: ‘Sunnu atọ̀n delẹ tin to ohọ̀n towe ji. Hodo yé yì.’ Pita yì ohọ̀n lọ ji bo kàn nuhe hẹn dawe lọ lẹ wá sè yé. Yé sọ gblọnna ẹn dọmọ: ‘Awhàngán Lomu tọn Kọneliọsi wẹ do mí hlan. A dona hodo mí yì owhé  etọn gbè to Sesalea.’ Pita basi oylọna dawe lọ lẹ nado dọ́ jẹ wunkẹngbe. Whenue ai họ́n, e hodo yé yì Sesalea to pọmẹ hẹ mẹmẹsunnu Jọppa tọn delẹ.

Whenue Kọneliọsi wá mọ Pita, e jẹklo. Amọ́, Pita dọna ẹn dọ: ‘Fọ́n! Gbẹtọ hiẹ nkọ wẹ yẹnlọsu. Jiwheyẹwhe wẹ dọ ma wá whé towe gbè, dile etlẹ yindọ Ju lẹ ma nọ yì owhé Kosi lẹ tọn gbè. Todin, jaale bo dọ nuhewutu a do ylọ mi wá na mi.’

Kọneliọsi sọ dọna Pita dọmọ: ‘To azán ẹnẹ die, n’to dẹ̀ho hlan Jiwheyẹwhe bọ angẹli de dọna mi dọ ma domẹhlan dè we. Jaale, plọn ohó Jehovah tọn mí.’ Pita dọmọ: ‘N’mọdọ Jiwheyẹwhe ma nọ homẹnukuntapọn. Mẹdepope he jlo na sẹ̀n ẹn wẹ e nọ kẹalọyi.’ Pita plọn nususu yé gando Jesu go. Enẹgodo, gbigbọ wiwe jẹ Kọneliọsi po mẹhe to finẹ hẹ ẹ lẹ po ji, bọ yemẹpo yin bibaptizi.

“To akọta lẹpo mẹ, mẹhe nọ dibusi [Jiwheyẹwhe] bo nọ wà dodo wẹ e nọ kẹalọyi.”​—Owalọ lẹ 10:35