Yì hosọ lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

De ogbè dopo Gungbe

 NUPINPLỌN 99

Gàntọ-Ṣọ́tọ de Mọ Nugbo

Gàntọ-Ṣọ́tọ de Mọ Nugbo

Deviyọnnu de tin to Filipi bo tindo gbigbọ aovi tọn. Aovi lọ nọ yí viyọnnu lọ zan nado dọ dọṣẹ bọ ehe nọ hẹn akuẹ susu wá na klunọ etọn lẹ. Whenue Paulu po Sila po wá Filipi, viyọnnu lọ to hihodo yé pé na azán susu. Aovi lọ hẹn ẹn nado to awhádo dọmọ: “Afanumẹ Jiwheyẹwhe Gigogán lọ tọn lẹ wẹ dawe ehelẹ.” To godo mẹ, Paulu degbedo aovi lọ dọmọ: ‘To oyín Jesu tọn mẹ, tọ́njẹgbonu sọn ewọ mẹ!’ Aovi lọ sọ tọ́nyi sọn viyọnnu lọ mẹ.

Whenue klunọ viyọnnu lọ tọn lẹ mọdọ e ma nasọ hẹn akuẹ wá na yé ba, homẹgble yé taun. Yé sọ dọ̀n Paulu po Sila po yì ogán otò tọn lẹ nukọn bo dọmọ: ‘Dawe ehelẹ to osẹ́n gbà bo to bẹwlu hẹnwa tòdaho lọ pete mẹ!’ Ogán lọ lẹ sọ degbe dọ Paulu po Sila po ni yin hihò bo yin súsú do gànpamẹ. Gàntọ-ṣọ́tọ lọ bẹ yé do fihe jẹ nuglọ bo dózin hugan to gànpa lọ mẹ bosọ ze yé do osópò mẹ.

Paulu po Sila po sọ jẹ ohàn pipà tọn lẹ ji hlan Jehovah ji bọ gàntọ he pò lẹ to sisè. To ajiji mẹ, to zángbodawe mẹ, aigba sisọsisọ daho de jọ bọ gànpa lọ whàn sọn odò yì aga. Ohọ̀n gànhọ lọ tọn lẹ sọ hùn bọ gẹdẹ po osópò lẹ po wẹ́n sọn gàntọ lọ lẹ go. Gàntọ-ṣọ́tọ lọ họ̀nwezun yì gànhọ lọ kọ̀n bo mọdọ ohọ̀n lọ lẹ to nùvo. Na e kudeji dọ gàntọ lọ lẹpo na ko họnyi wutu, e dọ̀n ohí sún bo jlo na hù ede.

Ojlẹ enẹ mẹ pẹẹ wẹ Paulu dawhá dọmọ: ‘A gbleawuna dewe blo! Mímẹpo tofi!’ Gàntọ-ṣọ́tọ lọ họ̀nwezun biọ gànhọ lọ mẹ bo jẹklo to Paulu po Sila po nukọn. E sọ kanse yé dọmọ: “Etẹwẹ yẹn dona wà nado yin whinwhlẹngán?” Yé dọna ẹn dọ: ‘Hiẹ po whédo towe po dona yise to Jesu mẹ.’ Enẹgodo, Paulu po Sila po plọn yé ohó Jehovah tọn bọ gàntọ-ṣọ́tọ lọ po whédo etọn blebu po yin bibaptizi.

“Alọ gbẹtọ lẹ tọn na jẹ mì go bọ yé na dohomẹkẹn mì, bo na ze mì jo na sinagọgu lẹ po gànpa lẹ po. Mì na yin hinhẹn yì ahọlu lẹ po ayimatẹn-gán lẹ po nukọn, na oyín ṣie tọn wutu. Ehe na hùn dotẹnmẹ dote na mì nado dekunnu.”​—Luku 21:12, 13