Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 94

Devi lẹ Mọ Gbigbọ Wiwe Yí

Devi lẹ Mọ Gbigbọ Wiwe Yí

Azán ao to whenue Jesu ko lẹkọyi olọn mẹ godo, devi etọn lẹ mọ gbigbọ wiwe yí. Pẹntikọsti 33 W.M. wẹ, bọ mẹlẹ wá Jelusalẹm sọn awà voovo lẹ ji nado basi hùnwhẹ lọ. Nudi devi Jesu tọn 120 wẹ pli do abò aga tọn ohọ̀ de tọn mẹ. To ajiji mẹ, nujiawu de jọ. Nuhe taidi miyọ́n de sọawuhia to ota na devi dopodopo bọ yemẹpo jẹ hodọ ji to ogbè voovo lẹ mẹ. Nudidọ he taidi jẹhọn sinsinyẹn de tọn sọ gọ́ ohọ̀ lọ mẹ.

Jonọ he tọ́n sọn otò devo mẹ wá Jelusalẹm lẹ sè nudidọ lọ bo họ̀nwezun yì ohọ̀ lọ mẹ nado pọ́n nuhe to jijọ. Awuji yé nado mọdọ devi lẹ to hodọ to ogbè voovo lẹ mẹ. Yé sọ dọmọ: ‘Galili wẹ omẹ ehelẹ ka wá sọn maa. Nawẹ yé wagbọn do to hodọ to ogbè mítọn lẹ mẹ?’

To whenẹnu, Pita po apọsteli he pò lẹ po ṣite to gbẹtọgun lọ nukọn. Pita dọ lehe Jesu yin hùhù do na mẹlọ lẹ bosọ dọna yé dọ Jehovah ko fọ́n ẹn sọn oṣiọ lẹ mẹ. Pita dọmọ: ‘Todin, Jesu ko tin to adusilọ Jiwheyẹwhe tọn mẹ to olọn mẹ, podọ ewọ ko kọ̀n gbigbọ wiwe he e  dopà etọn lọ jẹgbonu. Nuhe zọ́n bọ mì mọ bosọ sè azọ́njiawu ehelẹ niyẹn.’

Nuhe Pita dọ yinuwado mẹlọ lẹ ji taun, enẹwutu yé kanse dọmọ: “Etẹwẹ mí dona wà?” E dọna yé dọmọ: ‘Mì lẹnvọjọ sọn ylando mìtọn lẹ mẹ bo yin bibaptizi to oyín Jesu tọn mẹ. Mìlọsu na mọ nunina gbigbọ wiwe tọn yí.’ To gbenẹgbe, nudi gbẹtọ 3 000 wẹ yin bibaptizi. Sọn ojlẹ enẹ mẹ sọyi, sọha devi lẹ tọn fọ́n bo to jijideji po awuyiya po to Jelusalẹm. Po alọgọ gbigbọ wiwe tọn po, apọsteli lẹ do agun susu ai nado sọgan plọn devi lẹ nuhe Jesu ko degbe etọn na yé lẹpo.

“Eyin hiẹ yí onù towe titi do lá to gbangba dọ Jesu wẹ Oklunọ, bọ a sọ tindo yise to ahun towe mẹ dọ Jiwheyẹwhe fọ́n ẹn sọn oṣiọ lẹ mẹ, hiẹ na yin whinwhlẹngán.”​—Lomunu lẹ 10:9