Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 89

Pita Mọ́n Jesu

Pita Mọ́n Jesu

To whenue Jesu to abò aga tọn lọ mẹ hẹ apọsteli etọn lẹ, e dọna yé dọmọ: ‘Mìmẹpo wẹ na jo mi do to ozán ehe mẹ.’ Pita yihó bo dọmọ: ‘Yẹn ma demẹ! Eyin mẹhe pò lẹpo tlẹ jo we do, yẹn ma na jo we do pọ́n gbede.’ Ṣigba, Jesu dọna Pita dọ: ‘Whẹpo koklo na dosé, a na dọ whla atọ̀n dọ a ma yọ́n mi.’

Whenue awhànfuntọ lẹ plan Jesu yì owhé Kaifa tọn gbè, suhugan apọsteli lẹ tọn wẹ họnyi. Amọ́, awe to yé mẹ hodo gbẹtọgun lọ. Dopo to yé mẹ wẹ Pita. E yì awánu owhé Kaifa tọn mẹ bo to miyọ́n hú. To hinhọ́n miyọ́n lọ tọn nù, deviyọnnu de mọ nukunmẹ Pita tọn bo dọmọ: ‘N’yọ́n we! A nọ zọnhẹ Jesu!’

Pita dọmọ: ‘Lala, e ma yin yẹn! N’ma yọ́n nuhe dọ a te!’ E sọ dedo họngbo lọ ji. To ojlẹ kleun de godo, deviyọnnu devo mọ ẹn bo dọna gbẹtọgun lọ dọmọ: ‘Dawe ehe nọ zọnhẹ Jesu!’ Pita sọ dọmọ: ‘N’ma tlẹ yọ́n Jesu sọn fide!’ Dawe de dọmọ: ‘A yin dopo to yé mẹ! Kọnugbè towe dohia dọ Galilinu wẹ a yin taidi Jesu.’ Ṣigba, Pita whlé dọmọ: ‘N’ma yọ́n ẹn!’

To whenẹnu, koklo dosé. Pita mọdọ Jesu lẹkọ pọ́n emi. E sọ flin hogbe Jesu tọn lẹ bo tọ́njẹgbonu bosọ viavi vivẹ́.

To ojlẹ enẹ mẹ, Whẹdatẹn daho Ju lẹ tọn basi dide nado hẹn Jesu yì owhẹ̀ nukọn to owhé Kaifa tọn gbè. Yé ko magbe jẹnukọn nado hù Jesu, podọ todin yé to whẹjijọ dín nado wàmọ. Amọ́, yé ma mọ nudepope sọta ẹ. To godo mẹ, Kaifa kanse Jesu tlọlọ dọ: ‘Be Visunnu Jiwheyẹwhe tọn wẹ a yin ya?’ Jesu dọmọ: ‘Mọwẹ.’ Kaifa sọ dọmọ: ‘Mí masọ do nuhudo kunnudenu tọn humọ. E zánnu!’ Whẹdatẹn lọ pete kọngbedopọ dọ: ‘Dawe ehe jẹna okú.’ Yé hotómẹ na Jesu, túntán do e go, ṣinyọnnudo nukunmẹ na ẹn bo linú in, bosọ dọna ẹn dọmọ: ‘Eyin a yin yẹwhegán nugbo, bo dọ mẹhe linú we!’

 To whenue ai họ́n, yé plan Jesu yì Whẹdatẹn daho Ju lẹ tọn bosọ vọ́ kanse e dọmọ: ‘Be Visunnu Jiwheyẹwhe tọn wẹ a yin ya?’ Jesu gblọn dọmọ: ‘Mìlọsu ko dọ ẹ.’ Enẹwutu, yé dọ dọ e hùwhẹ nùzinzan tọn bo plan ẹn yì họ̀nmẹ Pọntiu Pilati, he yin ayimatẹn-gán Lomu tọn. Etẹwẹ jọ to enẹgodo? Gbọ mí ni pọ́n.

“Ojlẹ lọ . . . ko wá, whenue dopodopo mìtọn na gbàdo bo yì owhé etọn titi gbè bọ mì na jo yẹn kẹdẹ do. Ṣigba, yẹn ma tin dee ṣo, na Otọ́ tin po yẹn po.”​—Johanu 16:32