Ojlẹ vude to whenue Jesu ko sọawuhia apọsteli lẹ godo, Pita de nado yì hù whèvi to Ohù Galili tọn ji. Tọmasi, Jakọbu po Johanu po gọna devi devo lẹ sọ hodo e yì. To ozán lọ blebu mẹ, yé yìn odọ̀ amọ́ yé ma mọ whèvi depope wle.

To wunkẹngbe afọnnu fuu, yé mọdọ dawe de ṣite to ohù lọ tó. Dawe lọ dawhá ylọ yé dọmọ: ‘Be mì mọ whèvi de wle ya?’ Yé dọna ẹn dọ: “Lala!” Dawe lọ sọ dọmọ: “Mì yìn odọ̀ mìtọn hlan adusiwhé tọjihun lọ tọn.” To whenue yé wàmọ, whèvi gọ́ odọ̀ lọ mẹ sọmọ bọ yé ma gán dọ̀n ẹn biọ ohún lọ mẹ. To ajiji mẹ, Johanu doayi e go dọ Jesu wẹ dawe lọ bo dọmọ: “Oklunọ wẹ!” To afọdopolọji, Pita lọ́n biọ otọ̀ lọ mẹ bo lìnsin wá agé. Devi he pò lẹ sọ kùn tọjihun lọ hodo e.

Whenue yé jẹ agé, yé mọ akla po whèvi po hlan miyọ́n ji. Jesu dọna yé dọ yé ni yí delẹ to whèvi lọ lẹ mẹ wá nado yí yé dogọna diẹ lẹ. Enẹgodo, e dọmọ: ‘Mì wá dù núdùdù afọnnu tọn.’

 To whenue yé ko dùnú fó, Jesu kanse Pita dọ: ‘Be hiẹ yiwanna mi hú whèhuhu ya?’ Pita dọmọ: ‘Mọwẹ, Oklunọ, hiẹ yọnẹn dọ n’yiwanna we.’ Jesu dọmọ: ‘Eyin mọ wẹ, nọ na núdùdù lẹngbọ ṣie lẹ.’ Jesu sọ kanse dọ: ‘Pita, be a yiwanna mi ya?’ Pita dọmọ: ‘Oklunọ, hiẹ yọnẹn dọ n’yiwanna we.’ Jesu dọmọ: “Nọ yìn lẹngbọ pẹvi ṣie lẹ.” Jesu vọ́ kanbiọ dopolọ kanse e whla atọ̀ntọ. Pita gblehomẹ taun. E dọmọ: ‘Oklunọ, a yọ́n nulẹpo. A yọnẹn dọ n’yiwanna we.’ Jesu dọmọ: “Nọ na núdùdù lẹngbọ pẹvi ṣie lẹ.” Enẹgodo, e dọna Pita dọ: “To hihodo mi zọnmii.”

“[Jesu] dọna yé dọmọ: ‘Mì hodo mi, yẹn nasọ yí mì do basi whèhutọ gbẹtọ lẹ tọn.’ To afọdopolọji, yé jo odọ̀ yetọn lẹ do bo hodo e.”​—Matiu 4:19, 20