Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 77

Yọnnu He to Dotọ̀ Tó Lọ

Yọnnu He to Dotọ̀ Tó Lọ

To Juwayi lọ godo, Jesu po devi etọn lẹ po zingbejizọnlin gbọn Samalia to whenue yé lẹkọ jei Galili. Sẹpọ tòdaho Sikali tọn, Jesu nọte to fide he nọ yin yiylọdọ dotọ̀ Jakọbu tọn. Dile e to gbigbọjẹ to finẹ, devi etọn lẹ yì tòdaho lọ mẹ nado họ̀ núdùdù.

Nawe de wá dotọ̀ lọ kọ̀n nado dọ̀n osin. Jesu dọna ẹn dọmọ: “Na mi osin vude nado nù.” Nawe lọ dọ: ‘Naegbọn hiẹ do to hodọna mi? Yọnnu Samalianu de wẹ n’yin. Ju lẹ ma nọ dọho hẹ Samalianu lẹ.’ Jesu dọna ẹn dọmọ: ‘Eyin a yọ́n mẹhe n’yin wẹ, hiẹ wẹ na ko biọ mi osin bọ n’na na we osin ogbẹ̀ tọn.’ Yọnnu lọ sọ kanse dọ, ‘Etẹ na dọ a te? A ma tlẹ hẹn sindànu de.’ Jesu dọmọ: ‘Nugbla ma na vọ́ hù mẹdepope he nù osin he yẹn na na ẹn.’ Nawe lọ dọmọ: “Mẹdaho, na mi osin enẹ.”

To whenẹnu, Jesu dọna ẹn dọ: ‘Yì plan asu towe wá fi.’ Amọ́, yọnnu lọ dọmọ: ‘N’ma tindo asu de.’ Jesu dọmọ: ‘Nugbo wẹ a dọ. A ko dà asu whla atọ́n, podọ a ma wlealọ hẹ sunnu he sin họmẹ a te todin.’ Nawe lọ dọmọ: ‘N’mọdọ yẹwhegán de wẹ hiẹ. Omẹ ṣie lẹ yise dọ mí gán basi sinsẹ̀n hlan Jiwheyẹwhe to osó ehe ji, amọ́ Ju lẹ dọ dọ Jelusalẹm kẹdẹ wẹ mí gán basi sinsẹ̀n te. N’yise dọ to whenue Mẹsia lọ na wá, e na dọ lehe mí na basi sinsẹ̀n gbọn na mí.’ To whenẹnu, Jesu dọ nude he e ma ko dọna mẹdevo depope pọ́n dọmọ: ‘Yẹn wẹ Mẹsia lọ.’

 Yọnnu lọ họ̀nwezun yì tòdaho etọn mẹ bo dọna Samalianu lẹ dọ: ‘N’lẹndọ n’ko mọ Mẹsia lọ. E yọ́n nuhe jọ gando go e lẹpo. Mì wá pọ́n!’ Yé sọ hodo e yì dotọ̀ lọ kọ̀n bo dotoaina nuplọnmẹ Jesu tọn lẹ.

Samalianu lẹ biọ to Jesu si dọ ni gbọṣi tòdaho yetọn mẹ. E plọnnumẹ to finẹ na azán awe, podọ mẹsusu yise to ewọ mẹ. Yé dọna yọnnu Samalianu lọ dọmọ: ‘To whenue mí dotoaina dawe ehe godo, mí yọnẹn nugbonugbo dọ ewọ wẹ mẹwhlẹngántọ aihọn tọn.’

“‘Wá!’ gbọ mẹdepope he nugbla to hùhù ni wá; gbọ mẹdepope he jlo ni yí osin ogbẹ̀ tọn vọnu.”​—Osọhia 22:17

Plọnnu Dogọ

JESU—ALIHO LỌ, NUGBO LỌ PO OGBẸ̀ PO

E Plọnnu Yọnnu Samalianu De

Jesu dọ nude na ẹn he e ma ko dọna mẹdevo de pọ́n.