Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 75

Lẹgba Tẹ́n Jesu Pọ́n

Lẹgba Tẹ́n Jesu Pọ́n

To whenue Jesu ko yin bibaptizi godo, gbigbọ wiwe deanana ẹn yì danfafa ji. E ma dù nudepope na azán 40 bọ huvẹ wá jẹ hùhù i ji taun. To whenẹnu, Lẹgba wá nado whlé Jesu pọ́n bo dọna ẹn dọmọ: ‘Eyin visunnu Jiwheyẹwhe tọn wẹ a yin nugbonugbo, dọna zannu ehelẹ dọ yé ni lẹzun akla.’ Amọ́, Jesu yihodọ sọn Owe-wiwe lẹ mẹ bo gblọn dọmọ: ‘E ko yin kinkan dọ e ma yin núdùdù kẹdẹ wẹ nọ hẹnmẹ dogbẹ̀. Mí dona nọ dotoaina ohó he Jehovah dọ lẹpo.’

Enẹgodo, Lẹgba whlé Jesu pọ́n bo dọna ẹn dọmọ: ‘Eyin visunnu Jiwheyẹwhe tọn wẹ a yin nugbonugbo, lọ́n jẹte sọn adà tẹmpli lọ tọn he yiaga hugan ji. Na e ko yin kinkan dọ Jiwheyẹwhe na do angẹli etọn lẹ hlan nado basi hihọ́na we.’ Amọ́, Jesu sọ yihodọ sọn Owe-wiwe lẹ mẹ dọmọ: ‘E ko yin kinkan dọ hiẹ ma dona whlé Jehovah pọ́n.’

Enẹgodo, Satani do ahọluduta aihọn tọn lẹpo gọna adọkun po gigo yetọn lẹ po hia Jesu bo dọmọ: ‘Yẹn na na we ahọluduta ehelẹ po gigo yetọn lẹpo po eyin hiẹ basi sinsẹ̀n hlan mi whladopo poun.’ Amọ́, Jesu gblọn dọmọ: ‘Tọ́n sọn fi, Satani! E ko yin kinkan dọ Jehovah kẹdẹ wẹ hiẹ dona nọ sẹ̀n.’

Enẹgodo, Lẹgba yì bọ angẹli lẹ hẹn núdùdù wá na Jesu. Sọn whenẹnu sọyi, Jesu jẹ yẹwheho wẹndagbe Ahọluduta lọ tọn dọ ji. Azọ́n he e yin didohlan aigba ji nado wà lọ niyẹn. Gbẹtọ lẹ yiwanna nuhe Jesu nọ plọn yé lẹ, podọ yé nọ hodo e yì fidepope he e yì.

“Eyin [Lẹgba] dolalo, e nọ dọho sọgbe hẹ ayilinlẹn etọn titi, na lalonọ de wẹ ewọ podọ otọ́ lalo tọn.”​—Johanu 8:44