Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 82

Jesu Plọn Dẹ̀hiho Devi Etọn Lẹ

Jesu Plọn Dẹ̀hiho Devi Etọn Lẹ

Whelẹponu wẹ Falesi lẹ nọ to tintẹnpọn nado ze yede daga. Eyin yé wà nudagbe de, yé nọ jlo dọ mẹdevo lẹ ni doayi e go. Yé nọ hodẹ̀ to gbangba, na mẹlẹpo nido mọ yé. Falesi lẹ nọ plọn odẹ̀ gaa lẹ do tamẹ bo nọ vọ́ yé dọ to sinagọgu lẹ mẹ podọ to aliklan lẹ ji to fie mẹdevo lẹ gán mọ yé te. Enẹwutu, e paṣa mẹlẹ taun to whenue Jesu dọna yé dọ: ‘Mì hodẹ̀ taidi Falesi lẹ blo. Yé nọ lẹndọ ohó susu didọ na zọ́n bọ Jiwheyẹwhe na sè odẹ̀ yetọn, amọ́ lalo wẹ. Hodọdopọ de wẹ odẹ̀ yin to mẹdopodopo po Jehovah po ṣẹnṣẹn. Mì ma nọ dọ dọvọdọ nudopolọ lẹ tọn blo. Jehovah nọ jlo dọ mì ni dọ numọtolanmẹ sisosiso mìtọn lẹ na emi.

‘Lehe mì dona nọ hodẹ̀ do die: “Otọ́ mítọn he tin to olọn mẹ, na oyín towe ni yin kinklandowiwe. Na Ahọluduta towe ni wá. Na ojlo towe ni yin  wiwà, kẹdẹdi to olọn mẹ, mọdopolọ to aigba ji.”’ Jesu sọ plọn yé dọ yé dona nọ hodẹ̀ nado biọ núdùdù egbesọ tọn, jona ylando yetọn lẹ tọn podọ gando whẹho mẹdetiti tọn devo lẹ go.

Jesu dọmọ: ‘Mì ma doalọtena dẹ̀hiho blo. Mì nọ to nudagbe lẹ biọ Otọ́ mìtọn, Jehovah, zọnmii. Mẹjitọ lẹpo wẹ nọ jlo na na nudagbe lẹ ovi yetọn. Eyin ovi towe biọ we akla, be a na na ẹn zannu wẹ ya? Eyin e biọ we whèvi, be a na ze odàn jo na ẹn wẹ ya?’

Enẹgodo, Jesu basi zẹẹmẹ nuplọnmẹ lọ tọn dole: ‘Eyin mì yọ́n lehe yè nọ na nunina dagbe ovi mìtọn lẹ do, nẹmunẹmu wẹ Otọ́ mìtọn, Jehovah, ma nado na mì gbigbọ wiwe etọn? Nuhe mì dona wà poun wẹ nado nọ biọ.’ Be a nọ hodo ayinamẹ Jesu tọn ya? Etẹlẹ wẹ a nọ biọ to odẹ̀ mẹ?

“Mì to bibiọ zọnmii, e nasọ yin nina mì; mì to dindin zọnmii, mì nasọ mọ; mì to họ̀nhúhú zọnmii, e nasọ yin hùnhùn na mì.”​—Matiu 7:7