Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Nuplọnmẹ Delẹ sọn Biblu Mẹ

 NUPINPLỌN 83

Jesu Na Núdùdù Gbẹtọ Fọtọ́n Lẹ

Jesu Na Núdùdù Gbẹtọ Fọtọ́n Lẹ

Ojlẹ vude jẹnukọnna Juwayi owhe 32 W.M., apọsteli lẹ lẹkọ sọn yẹwhehodọ gbé. Agbọ́ ko pé yé, enẹwutu Jesu plan yé biọ tọjihun de mẹ yì Bẹtsaida, na yé nido gbọjẹ. Ṣigba, to whenue tọjihun lọ sẹpọ agé, Jesu mọdọ gbẹtọ fọtọ́n susu ko hodo yé wá finẹ. Dile etlẹ yindọ ojlo Jesu tọn wẹ nado gbọjẹ hẹ apọsteli etọn lẹ, e yí homẹdagbe do yí yé. E hẹnazọ̀ngbọna omẹ yetọn he to azọ̀njẹ lẹ bosọ jẹ nuplọn yé ji. Jesu yí azán lọ blebu do plọnnu yé gando Ahọluduta Jiwheyẹwhe tọn go. To whenue e jẹ whèjai, apọsteli etọn lẹ dọnsẹpọ ẹ bo dọmọ: ‘Huvẹ na ko to mẹlọ lẹ hù taun. Do yé hlan, na yé nido yì dín nude dù.’

Jesu dọmọ: ‘E ma biọ dọ yé ni yì. Mì na yé nude nado dù.’ Apọsteli lẹ kanse e dọmọ: ‘Be a jlo dọ mí ni yì họ̀ akla wá na yé wẹ ya?’ Filipi he yin dopo to apọsteli lẹ mẹ dọmọ: ‘Eyin mí tlẹ tindo akuẹ susu, mí ma na penugo nado họ̀ akla he na pé gbẹtọgun daho ehe.’

Jesu sọ kanse dọ: ‘Núdùdù tẹlẹ wẹ mí tindo?’ Andle dọmọ: ‘Mí tindo akla atọ́n po whèvi pẹvi awe po. Enẹ ma gán pé yé.’ Jesu dọmọ: ‘Mì bẹ akla po whèvi lọ lẹ po wá na mi.’ E dọna mẹlọ lẹ dọ yé ni sinai do ogbé lẹ ji bo má yede do pipli omẹ 50 po 100 po tọn lẹ mẹ. Jesu ze akla po whèvi lọ lẹ po bo pọ́n olọn bosọ hodẹ̀. E sọ yí núdùdù lọ na apọsteli etọn lẹ bọ yé má ẹn na gbẹtọgun lọ. Sunnu 5 000 he to finẹ lẹ gọna yọnnu lẹ po ovi lẹ po sọ dùnú bo gọ́ho. Enẹgodo, apọsteli lẹ bẹ dupò lọ lẹ pli bọ nudepope ma yin  hinhẹngú. Dupò lọ lẹ sọ gọ́ ohà 12! Azọ́njiawu daho de wẹ ehe, kavi na?

Awuji gbẹtọ lẹ sọmọ bọ yé jlo na yí Jesu do doahọlu. Amọ́, Jesu yọnẹn dọ ojlẹ lọ ma ko sọ̀ na Jehovah, na emi nido yin ahọlu. Enẹwutu, e do gbẹtọgun lọ lẹ hlan bo dọna apọsteli etọn lẹ dọ yé ni yì awà awetọ Ohù Galili tọn ji. Yé biọ tọjihun yetọn mẹ dedo bọ Jesu hẹji yì osó de ji edeṣo. Etẹwutu? Na e jlo na vò nado hodẹ̀ hlan Otọ́ etọn wutu wẹ. Mahopọnna lehe alọnu Jesu tọn tlẹ ján do, e nọ de whenu dovo nado hodẹ̀ janwẹ.

“Mì wazọ́n, e ma yin na núdùdù he nọ gble gba, ṣigba na núdùdù he nọ gbọṣi aimẹ kakajẹ ogbẹ̀ madopodo, ehe Visunnu gbẹtọ tọn na na mì.”​—Johanu 6:27