Yì hosọ lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

De ogbè dopo Gungbe

 NUPINPLỌN 86

Jesu Fọ́n Lazalọsi Sọnku

Jesu Fọ́n Lazalọsi Sọnku

Jesu tindo họntọn vivẹ́ atọ̀n delẹ he nọ nọ̀ Bẹtani. Yinkọ yetọn lẹ wẹ Lazalọsi gọna nọviyọnnu etọn awe lẹ, Malia po Malta po. To gbèdopo, whenue Jesu to awà awetọ Jọdani tọn ji, Malia po Malta po dowẹn niyaniya tọn de hlan ẹn dọmọ: ‘Lazalọsi to azọ̀njẹ sinsinyẹn. Jaale bo yawu wá!’ Ṣigba, Jesu ma yì to afọdopolọji. E nọte na azán awe dogọ bo wá dọna devi etọn lẹ dọmọ: ‘Mì gbọ mí ni yì Bẹtani. Lazalọsi to amlọndọ bọ n’jlo na yì dọ́n nado fọ́n ẹn.’ Apọsteli lẹ dọmọ: ‘Eyin amlọndọ wẹ Lazalọsi te, be enẹ na gọalọna ẹn nado jẹgangan.’ Enẹwutu, Jesu gbọ bo dọna yé tlọlọ dọ: ‘Lazalọsi ko kú.’

Whenue Jesu jẹ Bẹtani, e ko yì azán ẹnẹ he Lazalọsi kú bo yin dìdì. Mẹsusu ko wá nado miọnhomẹna Malta po Malia po. Whenue Malta sè dọ Jesu wá, e họ̀nwezun yì pé e bo dọmọ: “Oklunọ, eyin hiẹ ko tin tofi wẹ, nọvisunnu ṣie ma na ko kú.” Jesu dọna ẹn dọmọ: ‘Nọvisunnu towe na gọwá ogbẹ̀. A yí ehe sè ya, Malta?’ Yọnnu lọ dọmọ: ‘N’yise dọ e na fọ́n to fọnsọnku whenu.’ Jesu sọ dọna ẹn dọmọ: “Yẹn wẹ fọnsọnku po ogbẹ̀ po.”

Enẹgodo, Malta yì Malia dè bo dọna ẹn dọ: ‘Jesu ko wá.’ Malia họ̀nwezun yì Jesu dè bọ gbẹtọgun de hodo e. E sọ jẹklo to afọ etọn lẹ kọ̀n bo to avivi mapote. E dọmọ: ‘Oklunọ, eyin hiẹ ko tin tofi wẹ, nọvisunnu mítọn na gbẹ́ pò togbẹ̀!’ Jesu mọ lehe awubla etọn sinyẹn sọ bọ ewọ lọsu bẹ avi. Whenue gbẹtọgun lọ mọdọ e viavi, yé dọmọ: ‘Mì pọ́n lehe Jesu yiwanna Lazalọsi do.’ Ṣigba, mẹdelẹ to kinkanse yede dọ: ‘Bọ etẹwutu e ma do whlẹn họntọn etọn?’ Etẹwẹ Jesu na wà din?

Jesu yì yọdò lọ kọ̀n, ehe zannu daho de ko yin yíyí do sú nùvo etọn. E sọ degbe dọmọ: ‘Mì bli zannu lọ sẹ̀.’ Malta dọmọ: ‘E ko yì azán ẹnẹ be! Oṣiọ etọn na ko to wánlùn.’ Etomọṣo, yé bli zannu lọ sẹ̀, bọ Jesu hodẹ̀ dọmọ: ‘Otọ́, n’dopẹna we dọ hiẹ nọ sè ṣie. N’yọnẹn dọ a nọ sè ṣie to whepoponu, ṣigba n’to hodọ daga, na omẹ ehelẹ  nido yọnẹn dọ hiẹ wẹ do mi hlan.’ Enẹgodo, e dawhá dọmọ: “Lazalọsi, tọ́njẹgbonu wá!” Nujiawu de sọ jọ: Lazalọsi tọ́njẹgbonu sọn yọdò lọ mẹ, bọ avọ̀ he yin biblá do e go lẹ gbẹ́ pò to e go. To whenẹnu, Jesu dọmọ: “Mì tún in bo gbọ e ni yì.”

Mẹsusu wẹ mọ nujijọ ehe bo yí Jesu sè. Amọ́, mẹdelẹ yì dọna Falesi lẹ. Bẹsọn gbenẹgbe, Falesi lẹ jlo na hù Lazalọsi po Jesu po. Dopo to apọsteli 12 lẹ mẹ, yèdọ Juda Iskaliọti, yì Falesi lẹ dè to nuglọ bo kanse yé dọ: ‘Nẹmu wẹ mì na na mi eyin n’gọalọna mì nado mọ Jesu?’ Yé sọ kọngbedopọ nado na ẹn fataka-kuẹ 30 bọ Juda jẹ dotẹnmẹ hundote de dín ji nado sà Jesu do alọ Falesi lẹ tọn mẹ.

“Jiwheyẹwhe he nọ whlẹnmẹ wẹ Jiwheyẹwhe nugbo lọ yin na míwlẹ; podọ Jehovah Oklunọ Nupojipetọ lọ wẹ nọ deali họ̀ngán tọn sọn okú si.”​—Salmu lẹ 68:20